1, 2. Ke’ng seo yo mongwe le yo mongwe wa rena a swanetšego go kgodišega ka sona? (Bona seswantšho se se lego ka mo godimo.)

GO ETŠA ge re ithutile sehlogong se se fetilego, Diabolo o re Jehofa ga a kgone go buša e bile o re batho ba be ba tla phela gakaone ge nkabe ba sa bušwe ke Jehofa. Na o a rereša? Mo lefaseng go be go tla ba bjang ge batho bao ba ipušago ba be ba ka phela ka mo go sa felego? Na bophelo bo be bo tla ba bose? Na wena o be o tla thaba e le ka kgonthe ge nkabe o ipuša e bile o phela ka mo go sa felego?

² Ke wena feela o ka ikarabelago dipotšišo tšeo. Yo mongwe le yo mongwe wa rena o swanetše go naganišiša ka taba yeo. Ge re ka dira bjalo, re tla bona gore go phela ka ntle le go bušwa ke Modimo go tliša manyami feela. Ka gona, Jehofa ke yena feela a kgonago go buša. Le gona re swanetše go thekga bogoši bja gagwe ka pelo ka moka. Beibele e re thuša go kgolwa taba yeo. Ka mohlala, nagana ka seo Mangwalo a re botšago sona ka tshwanelo ya Jehofa ya go buša.

3. Ke ka baka la’ng Jehofa e le yena feela yo a swanetšego go buša?

³ Jehofa o na le tshwanelo ya go buša dilo ka moka ka gobane ke Modimo Ramatlaohle le Mmopi. (1 Dikor. 29:11; Dit. 4:24) Go Kutollo 4:11, batho ba 144 000 bao ba tlago go buša le Kriste, ba bontšhwa  ponong ba bolela gore: “Wena Jehofa Modimo wa rena o swanelwa ke go amogela letago, kgodišo le matla, gobane o bopile dilo ka moka gomme di bile gona le go bopša ka baka la thato ya gago.” Ee, ka ge Jehofa a bopile dilo ka moka, o na le tshwanelo e feletšego ya go buša batho le barongwa.

4. Ke ka baka la’ng go se kwe Jehofa e le go diriša tokologo ya rena gampe?

⁴ Sathane ga se a bopa selo. Ka baka leo, ga a na tshwanelo ya go buša selo le ge e le sefe. Ge yena le banyalani ba pele ba be ba gana go bušwa ke Jehofa, ba be ba bontšha gore ba a ikgogomoša. (Jer. 10:23) Ke therešo gore ka ge Jehofa a be a ba bopile ba na le tokologo ya go ikgethela, ba be ba ka kgetha go ipuša. Eupša na ba be ba na le tshwanelo ya go dira bjalo? Aowa. Tokologo ya go ikgethela e thuša batho gore ba dire diphetho tše dintši tše dibotse letšatši le letšatši. Lega go le bjalo, ga e ba nee tshwanelo ya go se kwe Mmopi wa bona le yo a ba neilego bophelo. Ka gona, ge re sa kwe Jehofa, re tla ba re diriša gampe tokologo ya rena ya go ikgethela. Ka ge Jehofa e le yena a re bopilego, re swanetše go ikokobeletša pušo ya gagwe ya go loka.

5. Ke ka baka la’ng re ka kgodišega gore ka mehla Modimo o dira dilo ka toka?

⁵ Go na le lebaka le lengwe leo le dirago gore Jehofa e be yena feela a swanetšego go buša. O re buša ka toka e phethagetšego. O boletše gore: “Ke nna Jehofa, Yo a bontšhago botho, toka le toko lefaseng; gobane ke kgahlwa ke dilo tše.” (Jer. 9:24) Jehofa ga a šomiše melao yeo e dirilwego ke batho bao ba sa phethagalago gore a tsebe se se nepagetšego le se se fošagetšego. Yena ka boyena o na le toka, ke ka baka leo a kgonnego go beela batho melao. “Toko le kahlolo ke motheo wa kgonthe wa sedulo sa [gagwe] sa bogoši,” ka gona re ka kgodišega gore melao ya gagwe ka moka, melao ya gagwe ya motheo le diphetho tšeo a di dirago di lokile. (Ps. 89:14; 119:128) Eupša Sathane yena o paletšwe ke go dira gore mo lefaseng go dule go na le toka gaešita le ge a duletše go bolela gore Jehofa ga a kgone go buša.

6. Le lengwe la mabaka a gore Jehofa a swanelege go re buša ke lefe?

⁶ Go feta moo, Jehofa o na le tshwanelo ya go re buša ka gobane o na le tsebo le bohlale tšeo di nyakegago go hlokomela legohle. Ka mohlala, nagana ka taba ya gore Modimo o ile a nea Morwa wa gagwe matla a go fodiša batho malwetši ao dingaka di bego di sa kgone go a alafa. (Mat. 4:23, 24; Mar. 5:25-29) Jehofa o be a sa lebelele seo Jesu a bego a se dira e le mohlolo. Lebaka ke gore Jehofa o be a tseba seo Jesu a bego a se dira le gore o kgona go bušetša dilo tše di senyegilego sekeng. Go bjalo le ka mehlolo yeo Jesu a bego a e dira ya go tsoša bahu le go thibela dikotsi tša tlhago.

7. Ke’ng seo se bontšhago gore bohlale bja Jehofa bo feta kgole bja batho ka moka bao ba bušwago ke Sathane?

⁷ Batho bao ba bušwago ke Sathane ba sa leka go hwetša tsela ya go rarolla dikgohlano le dintwa tša mo lefaseng. Jehofa yena o a tseba gore o tlo tliša bjang khutšo mo lefaseng. (Jes. 2:3, 4; 54:13) Ge re dutše re ithuta ka tsebo yeo Jehofa a nago le yona le bohlale bja gagwe, re ikwa go swana le moapostola Paulo, yoo Modimo a mo dirišitšego go ngwala gore: “A bodiba bja mahumo a Modimo, bohlale le tsebo! Ruri dikahlolo tša gagwe ke tšeo di sa nyakišišegego gomme ditsela tša gagwe ke tše di sa latišegego!”—Baroma 11:33.

8. Ke’ng seo se go thabišago tseleng yeo Jehofa a re bušago ka yona?

⁸ Beibele ga e re botša feela gore Jehofa o swanelwa ke go buša. Eupša e re botša le gore ke ka baka la eng go se na mmuši yo a swanago le yena. Lebaka le lengwe ke gore o buša ka lerato. Ee, re thaba kudu ge re nagana ka tsela yeo a re bušago ka yona. Ke “yo a gaugelago le yo a šokelago,  yo a diegago go galefa, yo a tletšego botho le therešo.” (Ek. 34:6) Jehofa o swara bahlanka ba gagwe ka seriti le ka tlhompho. O re hlokomela ka tsela yeo rena re sa kgonego go itlhokomela ka yona. Go fapana le maaka ao Diabolo a a bolelago, Jehofa ga a time barapedi ba gagwe selo. Go tiišetša taba yeo, o re neile gaešita le Morwa wa gagwe yo a rategago gore re tle re kgone go hwetša bophelo bjo bo sa felego!—Bala Psalme 84:11; Baroma 8:32.

9. Re tseba bjang gore Jehofa o tshwenyega ka yo mongwe le yo mongwe wa batho ba gagwe?

⁹ Jehofa ga a tshwenyege ka batho ba gagwe e le sehlopha feela. O tshwenyega le ka yo mongwe le yo mongwe wa bona. Ka mohlala, nagana ka mengwaga e 300 yeo go yona Jehofa a ilego a kgetha baahlodi gore ba hlakodiše setšhaba sa Isiraele manabeng a sona. Mehleng yeo e thata, Jehofa o ile a kgona go bona motho yo mongwe yo e bego e se Moisiraele, e lego Ruthe. Ruthe o ile a dira boikgafo bjo bogolo gore e be morapedi wa Jehofa. Jehofa o ile a šegofatša Ruthe ka monna le morwa. Eupša ga go felele moo. Ge Ruthe a tlo tsošwa bahung, o tlo tseba gore morwa wa gagwe o bile le karolo go tšweletšeng Mesia. Le gona nagana kamoo a tlago go thaba kudu ka gona ge a tla be a tseba gore kanegelo ya bophelo bja gagwe e ngwadilwe ka Beibeleng gomme ya bitšwa ka leina la gagwe!—Ruthe 4:13; Mat. 1:5, 16.

10. Ke ka baka la’ng tsela yeo Jehofa a re bušago ka yona e se ya go re gatelela?

¹⁰ Jehofa ga a re buše gampe goba go re gatelela. O re nea tokologo le go re thuša gore re dule re thabile. (2 Bakor. 3:17) Dafida o bontšhitše taba yeo gabotse ge a be a re: “Seriti le letago di pele ga gagwe [Modimo], matla le lethabo di lefelong la gagwe.” (1 Dikor. 16:7, 27) Mopsalme Ethane le yena o ngwadile gore: “Go thaba batho bao ba tsebago go hlalala. Ba dula ba sepela seetšeng sa sefahlego sa gago, wena Jehofa. Ba thabela leina la gago letšatši ka moka e bile ba phagamišwa ka toko ya gago.”—Ps. 89:15, 16.

11. Ke’ng seo se ka re thušago go se belaele tsela yeo Jehofa a re bušago ka yona?

¹¹ Ge re ka dula re naganišiša ka dilo tše dibotse tšeo Jehofa a re direlago tšona, re ka se belaele gore o re buša gabotse kudu. Re tlo ikwa go swana le mopsalme yo a itšego: “Letšatši letee ke le malapeng a gago le phala a sekete (1 000) ke le lefelong le lengwe.” (Ps. 84:10) Ga go therešo yeo e fetago yeo! Ka ge Jehofa e le Mohlami le Mmopi yo lerato, o tseba dilo tšeo re di hlokago gore re thabe, e bile o re nea dilo tšeo ka bontši. Jehofa o a tseba gore selo le ge e le sefe seo a rego re se dire se tlo thuša rena le go re thabiša, gaešita le ge tše dingwe tša dilo tšeo di nyaka gore re ikgafe.—Bala Jesaya 48:17.

12. Morero wa rena o mogolo wa go thekga bogoši bja Jehofa ke ofe?

¹² Beibele e bontšha gore ka morago ga Pušo ya Kriste ya Mengwaga e Sekete, batho ba bangwe ba tlo kgetha go hlanogela pušo ya Jehofa. (Kut. 20:7, 8) Ke’ng seo se ka tlago sa ba šušumeletša go dira bjalo? Ga go pelaelo gore Diabolo, yoo ka nako yeo a tla bego a lokolotšwe kgolegong, o tla lwa ka matla go timetša batho ka go dira gore ba be le boithati. O tla dira bjalo ka gore woo ke mokgwa wa gagwe. Go ka direga gore a tle a leke go kgodiša batho go dumela gore go na le tsela e nngwe ya go hwetša bophelo bjo bo sa felego ntle le go kwa Jehofa. Re a tseba gore ao e tla ba e le maaka a matala. Eupša potšišo ya bohlokwa še: Na go ka direga gore ba bangwe ba rena re tle re dumele maaka ao? Ge e ba re rata Jehofa le go mo hlankela ka gobane a re hlokomela le ka gobane re bona e le yena a swanetšego go re buša, gona re ka se tle ra dumela maaka ao a Sathane! Le ka mohla re ka se nyake go phela ka tlase ga mmuši yo mongwe ka ntle le Jehofa, yoo a re bušago ka lerato le ka toka.

13. Re ka bontšha bjang gore re thekga bogoši bja Jehofa?

¹³ Ruri re swanetše go thekga bogoši bja Jehofa ka pelo ka moka. Go etša ge re ithutile, Jehofa ke yena a nago le tshwanelo ya go buša, e bile ga go na yo a ka mo phalago ka go buša. Re ka thekga bogoši bja Jehofa ka go dula re botega le ka go mo hlankela ka pelo ka moka. Re ka bontšha bjang gape gore re thekga bogoši bja Jehofa? Ka go dira dilo go swana le yena. Ge re dira dilo go swana le Jehofa, re bontšha gore re rata tsela yeo a bušago ka yona le go e thekga.—Bala Baefeso 5:1, 2.

14. Bagolo le dihlogo tša malapa ba ka ekiša Jehofa bjang?

¹⁴ Beibele e re botša gore Jehofa o diriša matla a gagwe a taolo ka lerato. Ka baka leo, dihlogo tša malapa le bagolo bao ba ratago tsela ya Jehofa ya go buša ba ka se gatelele ditho tša lapa goba tša phuthego, ba itira eka le bona ke babuši. Go e na le moo, ba tla ekiša Jehofa. Paulo ke yo mongwe wa bao ba ilego ba ekiša Modimo le Morwa wa gagwe. (1 Bakor. 11:1) Paulo ga se a ka a nyenyefatša ba bangwe goba go ba gapeletša go dira dilo ka tsela ya gagwe. Go e na le moo, o be a ba lopa. (Baroma 12:1; Baef. 4:1; Fil. 8-10) Ye ke tsela yeo Jehofa a dirago dilo ka yona. Ka gona, bohle bao ba ratago tsela ya gagwe ya go buša le go e thekga ba swanetše go mo ekiša.

15. Re bontšha bjang gore re rata tsela yeo Jehofa a bušago ka yona ge re hlompha bao a ba kgethilego gore ba re etelele pele?

¹⁵ Re dirišana bjang le batho bao Jehofa a ba kgethilego gore ba re etelele pele? Ge re ba hlompha e bile re dirišana le bona gabotse, re bontšha gore re thekga bogoši bja Jehofa. Gaešita le ge ba ka dira phetho yeo re sa e kwešišego gabotse goba yeo re sa dumelelanego le yona, re tla dula re ba kwa ka ge ba kgethilwe ke Jehofa. Tsela ye ya go dira dilo e fapane kudu le ya batho ba lefase, eupša ke kamoo dilo di dirwago ka gona ka tlase ga pušo ya Jehofa. (Baef. 5:22, 23;  6:1-3; Baheb. 13:17) Ge re ka thekga tsela yeo ya go dira dilo re tla holega, ka gobane Modimo o nyaka gore dilo di re sepelele gabotse.

16. Bao ba thekgago bogoši bja Jehofa ba dira diphetho tša bona bjang?

¹⁶ Re ka bontšha gape gore re thekga bogoši bja Jehofa ka diphetho tšeo re di dirago. Jehofa ga se Modimo yo a nyakago go re beela molao selong se sengwe le se sengwe. Go e na le moo, tsela yeo a re hlahlago ka yona e re utollela tsela yeo a naganago ka yona. Ka mohlala, Jehofa ga se a ngwala melao ya kamoo Bakriste ba swanetšego go apara ka gona. Go e na le moo, kganyogo ya gagwe ke gore re kgethe diaparo tša bothakga le go itokiša ka tsela yeo e swanelago bao ba ipolelago gore ke bahlanka ba gagwe. (1 Tim. 2:9, 10) Le gona ga a rate ge re kgopiša ba bangwe goba re gobatša matswalo a bona ka diphetho tšeo re di dirago. (1 Bakor. 10:31-33) Ge re naganišiša pele re dira dilo, e sego go no itirela boithatelo, eupša re naganišiša pele ka dilo tšeo Jehofa a di nyakago, re bontšha gore rata tsela yeo a bušago ka yona le go e thekga.

17, 18. Banyalani ba ka bontšha ka ditsela dife tše dingwe gore ba thekga bogoši bja Jehofa?

¹⁷ Anke re boleleng ka karolo yeo go yona banyalani ba Bakriste ba ka bontšhago gore ba rata tsela ya Jehofa ya go dira dilo, ka go re’alo ba thekga bogoši bja gagwe. Go thwe’ng ge e ba lenyalong la lena go na le mathata? Go thwe’ng ge e ba mohlomongwe o nagana le go hlala? Ema ganyenyane gomme o naganišiše ka tsela yeo Jehofa a ilego a dirišana le Baisiraele. Jehofa o ile a bolela gore o bjalo ka monna wa setšhaba seo sa bogologolo. (Jes. 54:5; 62:4) Ruri lenyalo leo la seswantšhetšo e be e le mathata feela! Lega go le bjalo, Jehofa ga se a ka a kitimela go hlala setšhaba seo sa Isiraele. O ile a se bontšha kgaugelo gantši gomme a botegela kgwerano yeo a bego a e dirile le sona. (Bala Psalme 106:43-45.) Na ga re ikwe re rata Jehofa ka baka la lerato leo la gagwe le go se fele pelo?

¹⁸ Ka mo go swanago, banyalani ba Bakriste bao ba ratago tsela ya Jehofa ya go dira dilo ba a mo ekiša. Ga ba leke go tšwa lenyalong leo le nago le mathata ka go roba molao wa gagwe. Ba a gopola gore Jehofa o ba tlemagantše jokong e tee le gore o nyaka gore ba ‘kgomarelane.’ Lebaka le nnoši la Mangwalo leo le dumelelago yo mongwe wa banyalani go hlala le go nyala goba go nyalwa gape, ke ge yo mongwe wa bona a itshwere gampe ka tša thobalano le motho yo mongwe. (Mat. 19:5, 6, 9) Ge banyalani ba leka ka matla go lokiša mathata a lenyalong la bona, ba bontšha gore ba thekga tsela e botse yeo Jehofa a bušago ka yona.

19. Ge re ka palelwa ke go thekga bogoši bja Modimo, re swanetše go dira’ng?

¹⁹ Ka ge re sa phethagala, ka dinako tše dingwe re tlo dira dilo tšeo di nyamišago Jehofa. Jehofa o tseba seo, ke ka baka leo a re neilego Kriste gore a re hwele e le sehlabelo sa topollo. Ka gona, ge re ka dira phošo le ge e le efe, re swanetše go kgopela Jehofa gore a re lebalele. (1 Joh. 2:1, 2) Go e na le gore re hlwe re ipona molato, re swanetše go ithuta diphošong tša rena. Ge re ka dula kgauswi le Jehofa, o tla re lebalela dibe tša rena gomme a re thuša go fola le go phema diphošo tše di swanago nakong e tlago.—Ps. 103:3.

20. Ke ka baka la’ng re swanetše go thekga bogoši bja Jehofa gona bjale?

²⁰ Lefaseng le lefsa, ka moka ga rena re tlo bušwa ke Jehofa gomme ra ithuta ditsela tša gagwe tša go loka. (Jes. 11:9) Eupša se se kgahlišago ke gore rena re ithuta dilo tše dintši ka Jehofa gaešita le gona bjale. Le gona go šetše nako e nyenyane gore Jehofa a rarolle taba ya gore ke mang a nago le tshwanelo ya go buša magareng ga gagwe le Sathane. Ga bjale ke nako ya gore re thekge bogoši bja Modimo ka go dula re botega, ka go mo hlankela le ka go leka ka matla go mo ekiša dilong ka moka tšeo re di dirago.