1, 2. Jehofa o re homotša bjang ditlaišegong tša rena, gona Lentšu la gagwe le re nea kgonthišetšo efe?

NGWANABO RENA wa lesogana yoo a sego a nyala, yoo re tlago go mmitša Eduardo, o ile a botša mogolo yo a nyetšego e lego Stephen seo se mo tshwenyago. Eduardo o be a dutše a nagana ka seo re se balago go 1 Bakorinthe 7:28 yeo e rego: “Bao ba tsenago lenyalong ba tla ba le tlaišego nameng.” O ile a botšiša Stephen a re: “‘Tlaišego’ yeo go bolelwago ka yona temaneng ye ke eng, gona nka lebeletšana bjang le yona ge e ba nka nyala?” Pele ga ge Stephen a ka araba potšišo yeo, o ile a kgopela Eduardo gore a nagane ka selo se sengwe seo moapostola Paulo a se ngwadilego. Moapostola Paulo o ngwadile gore Jehofa ke “Modimo wa khomotšo yohle, yo a re homotšago ditlaišegong tša rena tšohle.”—2 Bakor. 1:3, 4.

² Ruri Jehofa ke Tate yo lerato, le gona o a re homotša ge re na le mathata. Go ka direga gore le wena o kile wa ba le mathata gomme Modimo a go thekga le go go hlahla, gantši a diriša Lentšu la gagwe. Re ka kgodišega gore o nyaka gore dilo di re sepelele gabotse, go etša  ge a ile a thuša bahlanka ba gagwe ba nakong e fetilego gore dilo di ba sepelele gabotse.—Bala Jeremia 29:11, 12.

3. Re tlo ahlaahla dipotšišo dife?

³ Re ka kgona go lebeletšana le mathata le ditlaišego ge e ba re tseba sebaki sa dilo tše. Go bjalo le ka tlaišego yeo e lego gona lenyalong goba bophelong bja lapa. Ka gona, tše dingwe tša dilo tšeo di ka bakago “tlaišego nameng” yeo Paulo a boletšego ka yona ke dife? Ke mehlala efe ya mehleng ya ge Beibele e be e sa ngwalwa le ya mehleng yeno yeo e ka re neago khomotšo yeo re e hlokago? Go ithuta ka mehlala ye go tlo re thuša go lebeletšana le mathata ka katlego.

4, 5. Ke dilo dife tše dingwe tšeo di bakago “tlaišego nameng”?

⁴ Beibele e re botša ka mantšu ao Modimo a ilego a a bolela ge a be a sa tšwa go bopa motho, ao a rego: ‘Monna o tla tlogela tatagwe le mmagwe, a kgomarela mosadi wa gagwe gomme bona e tla ba nama e tee.’ (Gen. 2:24) Jehofa o boletše mantšu a ge a be a nyadiša batho ba mathomo. Lega go le bjalo, ka baka la go se phethagale, ge monna le mosadi ba nyalana gomme ba thoma lapa le lefsa, seo se ka dira gore malapa a gabo bona a se kwane. (Baroma 3:23) Lebaka ke gore monna o tlo swanelwa ke go etelela pele lapa la gagwe le lefsa, ka go re’alo batswadi ga ba sa ba laola. Modimo o neile monna boikarabelo bja go ba hlogo ya mosadi wa gagwe. (1 Bakor. 11:3) Banna ba bangwe le basadi bao ba sa tšwago go nyalana ba thatafalelwa ke go amogela taba ye. Go ya ka Lentšu la Modimo, mosadi o swanetše go amogela gore o tlo laolwa ke monna wa gagwe e sego batswadi ba gagwe. Dilo tše di ka dira gore go be thata go phedišana le ba ka bogadi le ba ka bogweng, gomme seo sa bakela banyalani bao tlaišego.

⁵ Gantši ka morago ga gore mosadi a botše monna wa gagwe gore: “Ke imile,” go thoma go ba le dipelaelo. Le ge banyalani ba ka thabela gore ba tlo ba le ngwana, gantši ba ka tshwenyega ka ditaba tša kalafo tšeo di ka tsogago ge mosadi a sa imile goba ka morago ga moo. Le gona ba ka tshwenyega ka ditaba tša ditšhelete ge mosadi a sa imile le ka morago ga ge ngwana a belegwe. Ge ngwana a šetše a belegwe, go ba le diphetogo ka lapeng. Ga bjale mosadi o fetša nako e ntši a hlokometše leseana la gagwe. Gantši se se dira gore monna a ikwe a hlokomologwa ka baka la ge mosadi wa gagwe a fetša nako e ntši le lesea la bona. Ka lehlakoreng le lengwe, tatago lesea leo le yena o lebanwe ke maikarabelo a mafsa. Mešomo ya gagwe e a oketšega ka gore ga bjale go na le motho yo mofsa ka lapeng yoo a swanetšego go mo hlokomela le go mo fepa.

6-8. Go se kgone go ba le bana go ka baka tlaišego bjang lenyalong?

⁶ Go na le tlaišego e nngwe yeo e tlelago banyalani ba bangwe. Tlaišego yeo ke ge banyalani ba tloga ba nyaka ngwana eupša ba sa mo hwetše. Ge mosadi a sa ime, a ka ikwa a gateletšegile kudu. Ke therešo gore go ba lenyalong goba go ba le bana ga go bolele gore banyalani ba ka se be le dipelaelo, lega go le bjalo, go nyaka bana eupša o sa ba hwetše ka bo gona ke “tlaišego nameng.” (Die. 13:12) Mehleng ya Beibele, go ba moopa go be go leša dihlong. Ragele, e lego mosadi wa Jakobo, o ile a kwa bohloko kudu ge a be a bona ngwanabo e lego Lea a eba le bana. (Gen. 30:1, 2) Gantši baromiwa bao ba hlankelago dinageng tšeo go tlwaelegilego gore batho ba be le bana ba bantši, ba botšišwa gore ke ka baka la eng ba se na bana. Le ge ba ka nea mabaka a kwagalago, gantši batho bao ba no re go bona: “Le se ke la tshwenyega, re tla le rapediša gore le be le bona!”

⁷ Goba nagana ka kgaetšedi yo mongwe wa kua Engelane yoo a bego a tloga a nyaka ngwana eupša a sa kgone go ba le yena. Ke moka o ile a thoma go se sa bona kgwedi. O re o ile a ikwa a nyamile kudu, ka gobane o ile a lemoga gore a  ka se sa kgona go ba le bana tshepedišong ye. Yena le monna wa gagwe ba ile ba phetha ka gore ba tla kgopela ngwana wa go hloka batswadi gomme ba mo godiše. Lega go le bjalo, kgaetšedi yoo o itše: “Seo le sona ga se sa ka sa nkgotsofatša. Ke be ke tseba gore go godiša ngwana yo e sego wa ka go be go ka se tsoge go swane le go belega yo e lego wa ka.”

⁸ Ke therešo gore Beibele e re mosadi wa Mokriste o tla “bolokega ka go belega bana.” (1 Tim. 2:15) Eupša temana ye ga e bolele gore go belega bana goba go ba le bona go tla dira gore motho a hwetše bophelo bjo bo sa felego. Go e na le moo, temana ye e bontšha gore ge mosadi a na le bana bao a swanetšego go ba hlokomela le go hlokomela lapa, a ka phema go wela mokgweng wa go seba le go tsenatsena ditabeng tša batho. (1 Tim. 5:13) Le ge a ka swarega ka go hlokomela lapa la gagwe, o sa dutše a ka lebeletšana le tlaišego yeo e sepedišanago le lenyalo le bophelo bja lapa.

9. Ke ka baka la’ng go hlokofalelwa ke molekane e le bothata bjo bogolo kudu?

⁹ Ge re bolela ka ditlaišego tšeo di sepedišanago le lenyalo, go na le e nngwe yeo gantši re sa naganego ka yona. Tlaišego yeo ke go hwelwa ke motho yo re mo ratago. Bothata bjo bogolo kudu bjoo ba bantši ba ilego ba lebeletšana le bjona ke bja go hlokofalelwa ke molekane. Bjo ke bothata bjoo molekane yo a hwetšwego a ka bago a be a se a bo letela tshepedišong ye ya dilo. Bakriste ba tloga ba dumela kholofetšo ya Jesu ya gore bahu ba tlo tsoga. (Joh. 5:28, 29) Kholofetšo yeo e dira gore molekane yo a hwetšwego a ikwe bjang? E mo homotša kudu. Ye ke tsela e nngwe yeo ka yona Tatago rena yo lerato a dirišago Lentšu la gagwe go thekga bao ba tlaišegago le go ba homotša. Anke ga bjale re ahlaahleng kamoo bahlanka ba Jehofa ba ilego ba kwa ge a ba homotša le kamoo ba holegilego ka gona.

10. Hanna o ile a homotšwa ke’ng ditlaišegong tša gagwe? (Bona seswantšho seo se lego mathomong a sehlogo.)

¹⁰ Hanna, e lego mosadi yo Elikana a bego a mo rata kudu, o ile a lebana le bothata bjo itšego. E be e le moopa mola mosadi wa bobedi wa Elikana e lego Penina a be a kgona go ba le bana. (Bala 1 Samuele 1:4-7.) Ka baka leo, Penina o be a dula a kwera Hanna “ngwaga o mongwe le o mongwe.” Seo se ile sa kweša Hanna bohloko kudu le go mo tlaiša. Mafelelong o ile a botša Jehofa mathata a gagwe. Hanna o ile “a rapela nako e telele pele ga Jehofa.” Na o be a letetše gore Jehofa a mo fe seo a bego a se kgopela? Go ka direga. Go sa šetšwe gore o be a letetše gore Jehofa a mo thuše goba go se bjalo, o ile “a se hlwe a bonagala a tshwenyegile.” (1 Sam. 1:12, 17, 18) O be a bota Jehofa gore o tla mo thuša go ba le bana goba go mo thekga ge e ba a ka se be le bona.

11. Thapelo e ka re homotša bjang?

¹¹ Re tlo dula re welwa ke mathata le ditlaišego ge feela re sa phethagala e bile re phela tshepedišong ye yeo e laolwago ke Sathane. (1 Joh 5:19) Lega go le bjalo, re thabišwa ke go tseba gore Jehofa ke “Modimo wa khomotšo yohle”! Selo se sengwe seo se ka re thušago go lebeletšana le mathata le ditlaišego ke thapelo. Hanna o ile a tšhollela Jehofa sa mafahleng. Ka mo go swanago, le rena ge re lebeletšane le tlaišego ga se ra swanela go fo botša Jehofa kamoo re ikwago ka gona. Re swanetše go mo lopa, ee, re mmotše maikwelo a rena ka thapelo e tseneletšego.—Bafil. 4:6, 7.

12. Ke’ng seo se thušitšego Anna wa mohlologadi go hwetša lethabo?

¹² Go sa šetšwe tlaišego le ge e le efe yeo re ka bago re lebeletšane le yona bophelong—e ka ba e le go se kgone go ba le bana goba go hlokofalelwa ke motho yo re mo ratago—re sa dutše re ka hwetša khomotšo. Mehleng ya Jesu, moporofeta  wa mosadi e lego Anna o ile a hwelwa ke monna yo a bego a nyalane le yena ka mengwaga e šupa feela. Ga go na mo Beibele e re botšago gore ba be ba na le bana. Ka ge ga bjale Anna a be a na le mengwaga e 84, o be a dutše a dira’ng mengwageng yeo ka moka? Luka 2:37 e re: “O be a sa ke a hlokwa tempeleng, a dira tirelo e kgethwa bošego le mosegare, a ikona dijo le go lopa.” Ee, go hlankela Jehofa go ile gwa dira gore Anna a hwetše khomotšo le lethabo.

13. Nea mohlala wo o bontšhago gore bagwera ba kgonthe ba ka re homotša le ge ba leloko ba palelwa ke go dira bjalo.

¹³ Ge re dula re na le bana babo rena le dikgaetšedi, re hwetša bagwera ba kgonthe le bao ba re ratago. (Die. 18:24) Paula o gopola ge a be a na le mengwaga e mehlano gomme mmagwe a tlogela therešo. O re o ile a kwa bohloko kudu. Eupša o ile a kgothatšega kudu ge kgaetšedi wa mmulamadibogo yo a bego a kopanela le yena, e lego Ann, a be a mo thuša go tiiša tswalano ya gagwe le Jehofa. Paula o hlalosa gore: “Le ge Ann a be a sa tswalane le nna, lerato leo a ilego a mpontšha lona le ile la nthuša kudu. Le ile la nthuša gore ke tšwele pele ke hlankela Jehofa.” Paula o tšwela pele a hlankela Jehofa ka potego. Le gona o thabišwa ke gore ga bjale mmagwe o boetše o hlankela Jehofa. Ann le yena o thabile, ka gobane ke yena a thušitšego Paula go tšwela pele a hlankela Jehofa.

14. Batho bao ba homotšago ba bangwe ba ka thabela ditšhegofatšo dife?

¹⁴ Se se kgahlišago ke gore ge re thuša batho ba bangwe, seo se ka dira gore re lebale ka mathata  a rena. Dikgaetšedi tše di nyetšwego goba tšeo di sa nyalwago di a tseba gore go dirišana le Modimo go boleleng ditaba tše dibotse go tliša lethabo le legolo. Pakane ya tšona ke go godiša Modimo ka go dira thato ya gagwe. E bile tše dingwe tša tšona di lebelela go ya tšhemong e le sehlare. Ruri ka moka ga rena re dira gore phuthego e be le botee ge re thuša batho ba tšhemong ya gabo rena le ba ka phuthegong. (Bafil. 2:4) Moapostola Paulo o re beetše mohlala o mobotse tabeng ye. O ile a ba bjalo ka “mma yo a amušago” go ditho tša phuthego ya Thesalonika; e bile o be a le bjalo ka tatago bona wa moya.—Bala 1 Bathesalonika 2:7, 11, 12.

15. Modimo o neile bomang boikarabelo bja go ruta bana therešo?

¹⁵ Taba e nngwe yeo re sa swanelago go e tshediša mahlo ke go homotša malapa le go a thuša. Ka dinako tše dingwe, batho bao ba sa tšwago go thoma go kopanela ba kgopela bagoeledi bao ba godilego tsebong gore ba ba thuše go ruta bana ba bona therešo, gaešita le go ba badiša. Go ya ka Mangwalo, boikarabelo bja go ruta bana le go ba hlahla ke bja batswadi. (Die. 23:22; Baef. 6:1-4) Maemong a mangwe, go ka nyakega gore ba bangwe ba thuše e bile seo se lebogwa kudu. Lega go le bjalo, seo ga se re gore batswadi ba nape ba phutha matsogo. Go e na le moo, ba swanetše go dula ba boledišana le bana ba bona ka dilo tša moya.

16. Ke’ng seo re swanetšego go dula re se gopola ge re badiša bana bao e sego ba rena?

¹⁶ Ge e ba motswadi a phetha ka gore mogoeledi yo mongwe a badiše bana ba gagwe, mogoeledi yoo ga se a swanela go itira motswadi wa bana bao. Go na le maemo ao go ona Hlatse e ka kgopelwago gore e badiše bana bao batswadi ba bona ba bego ba sa rate therešo. Hlatse yeo e swanetše go dula e gopola gore ge e ruta bana bao therešo, ga e fetoge motswadi wa bona. Le gona ke gabohlale gore Hlatse yeo e bale le bana bao gagabo bona batswadi ba bona ba le gona, goba e na le Hlatse nngwe yeo e godilego tsebong, goba e ba badišetše lefelong la maleba leo go nago le batho. Seo se tla thuša gore batho ba se ke ba nagana gore Hlatse yeo e dira dilo tša go tšwa tseleng le bana bao. Re holofela gore ge nako e dutše e eya, batswadi ba bana bao ba tla phethagatša boikarabelo bjo Modimo a ba neilego bjona bja go ruta bana ba bona ka yena.

17. Bana ba ka homotša batswadi ba bona bjang?

¹⁷ Bana bao ba ithutago go rata Modimo wa therešo le go latela ditaelo tša gagwe ba ka homotša batswadi ba bona. Ba ka dira bjalo ka go ba hlompha le ka go ba thuša ka dilo tše dingwe. E bile ba ka thušana le bona dilong tša Modimo. Pele ga Meetsefula, motlogolo wa Sethe e lego Lamege o be a hlankela Jehofa. Monna yoo yo a bego a na le lapa o ile a bolela ka morwa wa gagwe Noa gore: “O tla re tlišetša khomotšo modirong wa rena le bohlokong bja diatla tša rena bjo bo tlišitšwego ke mmu woo Jehofa a o rogakilego.” Boporofeta bjoo bo ile bja phethagala ge Jehofa a be a bolela gore a ka se sa rogaka mmu. (Gen. 5:29; 8:21) Ka gona, bana bao ba phegelelago borapedi bja therešo ba ka homotša batswadi ba bona gomme ba thuša ditho ka moka tša lapa go kgotlelela mathata a mehleng yeno le go tlo phologa selo seo se fetago Meetsefula.

18. Ke’ng seo se ka re thušago go kgotlelela ka sebete ditlaišego tša mohuta le ge e le ofe goba mathata?

¹⁸ Thapelo, go naganišiša ka mehlala ya batho ba ka Beibeleng le go gwerana le batho ba Jehofa di thuša batho ba dimilione gona bjale go homotšega ditlaišegong tša bona. (Bala Psalme 145:18, 19.) Ruri go tseba gore Jehofa o tla dula a re homotša go tla re thuša go kgotlelela ka sebete ditlaišego tša mohuta le ge e le ofe—e ka ba gona bjale goba nakong e tlago!