BANGWADI ba Beibele ba be ba fela ba boaboetša mantšu a swanago. Re tlo kwa mabaka a mararo ao a ka bago a ile a dira gore bangwadi ba Beibele ba dire seo:

Nako yeo e ngwadilwego ka yona. Nakong ya Isiraele ya kgale, batho ba bantšhi ba be se na dikopi tša Molao. Gantšhi ba be ba ekwa molao o balwa nakong ya ge setšhaba se bokane tabarenakeleng. (Doit. 31:​10-12) Go ka direga gore go be go na le ditšhitišo ge setšhaba se be se theeditše e bile se bokane felo gotee ka diiri tše dintšhi. (Neh. 8:​2, 3, 7) Mabakeng a bjalo, go boaboetša mantšu go be go ka dira gore go be bonolo gore setšhaba se gopole mangwalo le go a diriša. Go boeletša mantšu a itšego go be go ka thuša setšhaba gore se gopole dintlha tše bohlokwa tše bjalo ka melao ya Modimo ya motheo le dikahlolo tša gagwe.—Lef. 18:​4-22; Doit. 5:1.

Tsela yeo e ngwadilwego ka yona. Dikarolo tše dingwe tša Beibele di hlamilwe ka dikoša, go akaretša puku ya Dipsalme, Sefela sa Difela le Dillo tša Jeremia. Ka dinako tše dingwe dikoša tše di be di na le mantšu a tsošago kgahlego gomme seo se be se thuša batheetši gore ba kgone go a gopola. Ka mohlala, bona mantšu ao a lego go Psalme 115:​9-11, ao a rego: “Wena Isiraele, tshepa Jehofa. Ke mothuši wa gago le kotse ya gago. Lena ba ntlo ya Arone, tshepang Jehofa. Ke mothuši wa lena le kotse ya lena. Lena bao le boifago Jehofa, tshepang Jehofa. Ke mothuši wa lena le kotse ya lena.” Go boaboetša mantšu go ka ba go ile gwa thuša bao ba opelago gore ba gopole dintlha tše bohlokwa.

Go gatelela dintlha tše bohlokwa. Ka dinako tše dingwe bangwadi ba Beibele ba be ba bušeletša dipolelwana tše bohlokwa. Ka mohlala, ge Jehofa a be a laela Baisiraele gore ba se ke ba ja madi, o ile a dira gore Moshe a bušeletše mantšu ao gantšhi. Modimo o be a nyaka go gatelela gore bophelo bja sephedi se sengwe le se sengwe bo mading a sona, seo se bolela gore madi a emela bophelo. (Lef. 17:​11, 14) Ka morago, ge bagolo le baapostola kua Jerusalema ba be ba bolela ka dilo tše bohlokwa tšeo batho ba swanetšego go di dira gore ba kgahliše Modimo, ba ile ba gatelela le gore ba swanetše go phema madi.—Dit. 15:​20, 29.

Le ge Beibele e boaboetša mantšu a itšego, seo ga se bolele gore Jehofa o nyaka gore le rena re be le mokgwa wa go boaboetša mantšu. Ka mohlala, Jesu o itše: “Ge o rapela, o se ke wa boaboetša dilo tše di swanago.” (Mat. 6:7) O ile a re botša le dilo tšeo re ka di rapelelago, tšeo di dumelelanago le thato ya Modimo. (Mat. 6:​9-13) Ka gona, le ge re phema go boaboetša mantšu ge re rapela, re lokologile gore re ka rapelela dilo tše di swanago.—Mat. 7:​7-11.

Go na le lebaka leo le kwagalago la gore ka Beibeleng go be le mantšu ao a ipoeletšago. Morutiši wa rena yo Mogolo o diriša tsela ye go re ruta gore re holege.—Jes. 48:​17, 18.