1-2. Bahlanka ba Jehofa ba na le kholofelo efe e kgahlišago?

GO BOHLOKWA kudu gore re be le kholofelo. Batho ba bangwe ba holofela gore ba tla thabela lenyalo la bona, ba godiša bana gabotse goba ba tla fola bolwetšing bjo bošoro bjo bo ba swerego. Le rena re ka ba re holofela go ba le dilo tšeo goba go fola ge e ba re babja. Eupša re na le kholofelo e nngwe yeo e fetago dilo tše ka moka. Re holofela go tlo phela ka mo go sa felego le go tlo bona batho ba gabo rena ba tsošwa bahung.

² Moapostola Paulo o itše: “Ke na le kholofelo go Modimo, . . . ya gore go tla ba le tsogo ya ba lokilego gotee le ba sa lokago.” (Dit. 24:15) Paulo e be e se motho wa mathomo wa go bolela ka kholofelo ya gore bahu ba tla tsošwa. Jobo le yena o ile a bolela ka taba ye. O be a kgodišegile gore Modimo o tla mo gopola gomme a mo tsoša gore a tle a phele gape.—Jobo 14:7-10, 12-15.

3. Bakorinthe ba Pele kgaolo 15 e ka re thuša bjang?

³ “Tsogo ya bahu” ke e nngwe ya dithuto tša “motheo” tšeo Bakriste ka moka ba di dumelago. (Baheb. 6:1, 2) Paulo o bolela ka tsogo ya bahu go Bakorinthe ba Pele kgaolo 15. Seo a se ngwadilego se swanetše go ba se ile sa kgothatša Bakriste ba mehleng ya gagwe. Go sa šetšwe gore o na le nako e telele gakaakang o dumela gore bahu ba tlo tsošwa, seo se bolelwago kgaolong yeo se tla matlafatša tumelo ya gago.

4. Ke ka baka la’ng re ka kgodišega gore batho ba gabo rena bao ba hlokofetšego ba tla tsošwa?

⁴ Taba ya gore Jesu Kriste o ile a tsošwa bahung, ke yona e re kgodišago gore batho ba gabo rena bao ba hlokofetšego ba tla tsošwa. Taba yeo e be e le gare ga “ditaba tše dibotse” tšeo Paulo a ilego a di botša Bakorinthe. (1 Bakor. 15:1, 2) Ge e le gabotse, o ile a bolela gore ge e ba Mokriste a sa dumele gore Jesu o tsošitšwe bahung, gona tumelo ya gagwe ga e na mohola. (1 Bakor. 15:17) Go dumela gore Jesu o ile a tsošwa bahung go re thuša go dumela gore le ba bangwe bao ba hlokofetšego ba tla tsošwa.

5-6. Seo se lego go Bakorinthe ba Pele 15:3, 4 se bolela’ng go rena?

 ⁵ Ge Paulo a be a thoma go bolela ka tsogo ya bahu, o ile a bolela ka dilo tše tše tharo tše bohlokwa. O itše, “Kriste o hwetše dibe tša rena,” “o ile a bolokwa” e bile ‘o ile a tsošwa bahung ka letšatši la boraro go ya ka Mangwalo.’—Bala 1 Bakorinthe 15:3, 4.

⁶ Go hwa ga Jesu, go bolokwa ga gagwe le go tsošwa ga gagwe bahung go bolela’ng go rena? Moporofeta Jesaya o ile a bolela e sa le pele gore Mesia o be a tla “kgaolwa nageng ya ba ba phelago” gomme “lebitla la gagwe le be [le tla ba] gare ga ba kgopo.” Eupša go na le selo se sengwe gape seo se bego se tla direga. Jesaya o boletše le gore Mesia o be a tla “rwala sebe sa ba bantši.” Jesu o ile a dira se ge a be a neela bophelo bja gagwe e le sehlabelo sa topollo. (Jes. 53:8, 9, 12; Mat. 20:28; Baroma 5:8) Ka baka leo go hwa ga Jesu, go bolokwa ga gagwe le go tsošwa ga gagwe go dira gore re be le kholofelo e tiilego ya gore re tla lokollwa sebeng le lehung gomme ra tla ra bona gape batho ba gabo rena bao ba hlokofetšego.   

7-8. Ke’ng seo se thušago Bakriste go kgodišega gore Jesu o tsošitšwe bahung?

⁷ Bjalo ka ge re šetše re hlalositše, e le gore re tle re dumele gore bahu ba tlo tsošwa, re swanetše go thoma pele ka go dumela gore Jesu o ile a tsošwa bahung. Ke ka baka la’ng re ka kgodišega gore Jehofa o ile a tsoša Jesu bahung?

⁸ Ke ka gobane go na le batho ba bantši bao ba ilego ba bona Jesu ka morago ga gore a tsošwe bahung gomme ba ile ba botša ba bangwe ka taba yeo. (1 Bakor. 15:5-7) Motho wa mathomo yo Paulo a boletšego ka yena yoo a ilego a bona Jesu ka morago ga gore a tsošwe ke moapostola Petro (goba Kefase). Barutiwa ba bangwe le bona ba ile ba bolela gore Petro o bone Jesu yo a tsošitšwego bahung. (Luka 24:33, 34) Baapostola “ba lesomepedi” le bona ba ile ba bona Jesu ka morago ga gore a tsošwe bahung. Paulo o boletše gore ka morago ga moo Kriste o ile “a iponagatša go bana bešo ba ka godimo ga ba makgolohlano ka nako e tee.” Mohlomongwe o iponagaditše go bona sebokeng se se kgahlišago seo se bego se swaretšwe kua Galilea seo go bolelwago ka sona go Mateo 28:16-20. Le gona Jesu “o ile a iponagatša go Jakobo,” yo e lego ngwanabo yoo go ka diregago gore pele Jesu a ka bolawa o be a sa dumele gore e be e le Mesia. (Joh. 7:5) Ka morago ga gore Jakobo a bone Jesu yo a tsošitšwego bahung, o ile a kgodišega gore e be e le Mesia. Mo e ka bago ka 55 C.E. ge Paulo a be a ngwalela Bakorinthe lengwalo, go be go sa na le batho ba bantši bao ba bego ba bone Jesu ka morago ga gore a tsošwe bahung. Ka gona motho le ge e le ofe yo a bego a sa kgolwe gore Jesu o tsošitšwe bahung, o be a ka bolela le batho bao ba mmonego ka mahlo.

9. Ditiro 9:3-5, e re botša’ng seo se bontšhago gore Paulo o be a ka hlatsela gore Jesu o tsošitšwe bahung?

⁹ Ka morago Jesu o ile a iponagatša go Paulo. (1 Bakor. 15:8) Paulo (goba Saulo) o be a le tseleng ya go ya Damaseko ge a ekwa lentšu la Jesu e bile a bona pono ya Jesu a le legodimong. (Bala Ditiro 9:3-5.) Seo se ilego sa diragalela Paulo e be e le bohlatse bjo bongwe bjo bo bontšhago gore ka nnete Jesu o be a tsošitšwe bahung.—Dit. 26:12-15.

10. Paulo o ile a dira’ng ka ge a be a kgodišegile gore Jesu o tsošitšwe bahung?

¹⁰ Batho ba bangwe ba be ba ka thabela go kwa seo Paulo a se bolelago ka gobane pele Jesu a ka iponagatša go yena, Paulo o be a tlaiša Bakriste. Ka morago ga gore Paulo a kgodišege gore Jesu o tsošitšwe bahung, o ile a šoma ka thata go thuša ba bangwe gore le bona ba dumele taba ye. Ge a be a ruta ba bangwe gore Jesu o ile a hwa eupša ka morago a tla a tsošwa bahung, o ile a itiwa, a golegwa e bile a robegelwa ke sekepe. (1 Bakor. 15:9-11; 2 Bakor. 11:23-27) Paulo o be a tloga a kgodišegile gore Jesu o tsošitšwe bahung moo a bego a ikemišeditše go bolaelwa go ruta batho taba yeo. Ruri ga go na pelaelo gore bohlatse bjo  bja Bakriste ba pele bo re kgodiša gore le rena re dumele gore Jesu o tsošitšwe bahung. E bile bo dira gore re kgodišege le go feta gore bahu ba tlo tsošwa.

11. Ke ka baka la’ng Bakriste ba bangwe kua Korinthe ba ka ba ba be ba dumela dithuto tša maaka ka tsogo ya bahu?

¹¹ Bakriste ba bangwe ba kua Korinthe ba be ba dumela dithuto tša maaka ka tsogo moo e bile ba bego ba re “ga go na tsogo ya bahu.” Ke ka baka la’ng ba be ba re’alo? (1 Bakor. 15:12) Boradifilosofi ba bangwe ba motseng wa Athene ba be ba dira metlae ka taba ya gore Jesu o tsošitšwe bahung. Ka baka leo, Bakriste ba bangwe ba kua Korinthe le bona ba ka ba ba ile ba nagana gore Jesu ga se a ka a tsošwa bahung. (Dit. 17:18, 31, 32) Ba bangwe ba ka ba ba be ba nagana gore go tsošwa ga bahu e be e se selo sa kgonthe. Mohlomongwe ba be ba nagana gore go be go thwe batho ba hwile ka ge e le badiradibe, le gore Bakriste ba a phela ka ge ba lebaletšwe dibe tša bona. Go sa šetšwe gore ke ka baka la eng batho bao ba be ba sa dumele gore ga go na tsogo ya bahu, seo se ra gore ba be ba sa dumele gore le Jesu o tsošitšwe bahung. Ka gona tumelo ya bona e be e se na mohola. Ke ka baka la’ng re re’alo? Ke ka gobane ge e ba Modimo a se a tsoša Jesu bahung, gona go ra gore ga go na sehlabelo sa topollo seo se bilego gona le gore batho ka moka ba tla dula ba na le sebe. Ka baka leo bao ba bego ba sa dumele gore go na le tsogo ya bahu ba be ba se na kholofelo.—1 Bakor. 15:13-19; Baheb. 9:12, 14.

12. Petro wa Pele 3:18, 22, e re thuša bjang go kwešiša gore go tsošwa ga Jesu go be go fapana le ga batho ba bangwe bao ba ilego ba tsošwa pele ga gagwe?

¹² Paulo o be a tseba gore ‘Kriste o be a tsošitšwe bahung.’ Go tsošwa ga Jesu go be go fapana le ga batho ba bangwe bao ba ilego ba tsošwa bahung ke moka ba tla ba boela ba hwa gape. Paulo o ile a bolela gore Jesu e be e le “thakangwaga ya bao ba robetšego lehung.” Ke ka tsela efe Jesu e bego e le wa pele wa go tsošwa bahung? E be e le wa pele ka gobane e bile wa pele wa go tsošwa e le sebopiwa sa moya, e bile ke wa pele wa go rotogela legodimong ka morago ga gore a tsošwe bahung.—1 Bakor. 15:20; Dit. 26:23; bala 1 Petro 3:18, 22.

13. Paulo o bontšhitše phapano efe magareng ga Adama le Jesu?

¹³ Go kgonega bjang gore lehu la motho o tee le phediše batho ba bantšintši? Paulo o araba potšišo ye ka tsela e kwagalago kudu. O hlalositše phapano magareng ga seo se re diragalelago ka baka la Adama le seo se tla re diragalelago ka baka la sehlabelo sa Kriste sa topollo. Paulo o ngwadile gore: “Lehu le tlile ka motho,” e lego Adama. Ge Adama a be a dira sebe, o ile a tlišetša yena le bana ba gagwe mathata a magolo. Le lehono re sa tlaišega ka baka la go se kwe ga gagwe. Eupša ka ge Modimo a ile a tsoša Morwa wa gagwe bahung, re tlo thabela bophelo nakong e tlago. Paulo o itše: “Tsogo ya bahu le yona e tla ka motho,” e lego Jesu Kriste. “Gobane go etša ge ka Adama bohle ba ehwa, ka tsela e swanago, le ka Kriste bohle ba tla phedišwa.”—1 Bakor. 15:21, 22.

14. Na Adama o tla tsošwa bahung? Hlalosa.

¹⁴ Paulo o be a e ra go re’ng ge a be a re ‘bohle ba hwa ka Adama’? Paulo o be a bolela ka batho ka moka bao ba hweditšego sebe go Adama bao mafelelong ba hwago. (Baroma 5:12) Adama ga a gare ga bao ba ‘tlago go phedišwa.’ Go ka se kgonege gore Adama a holwe ke sehlabelo sa Jesu sa topollo ka gobane le ge a be a se na sebe, o ile a se kwe Modimo ka boomo. Seo se diragaletšego Adama se tla swana le seo se tlago go diragalela bao “Morwa wa motho” a tlago go ba ahlola e le “dipudi.” Batho bao “ba tla fedišetšwa sa ruri.”—Mat. 25:31-33, 46; Baheb. 5:9.

15. “Bohle” bao ba tlago ‘go phedišwa’ ba akaretša bomang?

¹⁵ Paulo o boletše gore “ka Kriste bohle ba tla phedišwa.” (1 Bakor. 15:22) Ka ge lengwalo le la  Paulo a be a le ngwaletše Bakriste ba tloditšwego ba kua Korinthe bao ba bego ba tla tsošetšwa go yo phela legodimong, gona go ra gore Bakriste bao ke karolo ya “bohle” bao ba tlago go “phedišwa.” Ba be ‘ba kgethagaditšwe boteeng le Kriste Jesu, ba bileditšwe go ba bakgethwa.’ Le gona Paulo o boletše ka “bao ba robetšego lehung boteeng le Kriste,” e lego barutiwa ba Jesu le baapostola ba gagwe. (1 Bakor. 1:2; 15:18; 2 Bakor. 5:17) Lengwalong le lengwe leo Paulo a le ngwadilego o boletše gore bao e bilego “batee le [Jesu] lehung le le swanago le la gagwe,” e tla ba “batee le yena tsogong e swanago le ya gagwe.” (Baroma 6:3-5) Jesu o ile a tsošwa e le sebopiwa sa moya ke moka a tla a rotogela legodimong. Ka gona se se tla diragalela bohle bao ba lego “boteeng le Kriste,” e lego Bakriste ka moka bao ba tloditšwego.

16. Paulo o be a e ra go re’ng ge a be a re Jesu ke “thakangwaga”?

¹⁶ Paulo o ngwadile gore Kriste o ile a tsošwa bahung e le “thakangwaga ya bao ba robetšego lehung.” Gopola gore batho ba bangwe ba bjalo ka Latsaro ba ile ba tsošwa bahung, eupša Jesu e bile wa mathomo wa go tsošwa e le sebopiwa sa moya gomme a hwetša bophelo bjo bo sa felego. Re ka mo swantšha le dithakangwaga goba dienywa tša pele tšeo Baisiraele ba bego ba di buna tšeo ba bego ba direla Modimo dihlabelo ka tšona. Le gona ge Paulo a be a re Jesu ke “thakangwaga” o be a e ra gore go be go tla ba le batho ba bangwe ka morago ga gagwe bao ba bego ba tla tsošetšwa go yo phela legodimong. Baapostola ba Jesu le ba bangwe bao ba lego “boteeng le Kriste” ba be ba tla mo latela. Go no swana le Jesu, le bona ba be ba tla tsošetšwa go yo phela legodimong.

17. Bao ba lego “boteeng le Kriste” ba be ba tla tsošetšwa neng legodimong?

¹⁷ Ge Paulo a be a ngwalela Bakorinthe, batho bao ba lego “boteeng le Kriste” ba be ba se ba tšwa ba thoma go tsošetšwa legodimong. Paulo o boletše gore seo se be se tla direga nakong e tlago. O itše: “Yo mongwe le yo mongwe o phedišwa go ya ka boemo bja gagwe. Thakangwaga ke Kriste, ka morago ga moo ya ba bao e lego ba Kriste nakong ya go ba gona ga gagwe.” (1 Bakor. 15:23; 1 Bathes. 4:15, 16) Lehono re phela nakong yeo ya “go ba gona” ga Kriste. Baapostola ba Jesu le Bakriste ba bangwe ba tloditšwego bao ba ilego ba hlokofala, ba ile ba swanelwa ke go leta nako yeo ya go ba gona ga gagwe pele ba ka tsošetšwa legodimong le go ba “batee le [Jesu] tsogong e swanago le ya gagwe.”

18. (a) Ke ka baka la’ng re ka phetha ka gore go tla ba le tsogo e nngwe ka morago ga ya bao ba tlago go tsošetšwa go yo phela legodimong? (b) Go ya ka Bakorinthe ba Pele 15:24-26, ke’ng seo se tlago go direga legodimong?

¹⁸ Go tla direga’ng ka Bakriste ba bangwe ka moka bao ba se nago kholofelo ya go yo phela legodimong  le Jesu? Le bona ba na le kholofelo ya gore ba tla tsošwa bahung. Beibele e re Paulo le ba bangwe bao ba tsošetšwago go yo phela legodimong, ba tsošwa ‘tsogong ya pele ya go tsošwa ga bahu.’ (Bafil. 3:11) Na se se ra gore go tla ba le tsogo e nngwe ka morago ga ye ya pele? Ee, e tla ba gona. Seo se dumelelana le seo Jobo a bego a dumela gore se tla mo diragalela nakong e tlago. (Jobo 14:15) Batlotšwa ba tla be ba na le yena legodimong ge a fediša mebušo ka moka, le balaodi ka moka le matla. E bile ba tla be ba na le yena ge a fediša “lehu [e lego] lenaba leo le tlago go fedišwa mafelelong.” Bohle bao ba tlago go tsošetšwa legodimong ba ka se tsoge ba hwa. Eupša go tla direga’ng ka ba bangwe bao ba ka se tsošetšwego go yo phela legodimong?—Bala 1 Bakorinthe 15:24-26.

19. Bao ba se nago kholofelo ya go yo phela legodimong ba ka letela eng?

¹⁹ Bao ba se nago kholofelo ya go yo phela legodimong ba ka letela eng? Ba ka ba le kholofelo yeo e theilwego mantšung a Paulo ao a rego: “Ke na le kholofelo . . . ya gore go tla ba le tsogo ya ba lokilego gotee le ba sa lokago.” (Dit. 24:15) Re a tseba gore ga go na motho yo a sa lokago yo a ka phelago legodimong, ka gona mantšu a a bontšha gore go tlo ba le tsogo ya bao ba tlago go phela mo lefaseng nakong e tlago.

20. Sehlogo se se go thušitše bjang go matlafatša kholofelo yeo o nago le yona ya gore bahu ba tla tsošwa?

²⁰ Ruri re kgodišegile gore “go tla ba le tsogo”! Bao ba tlago go tsošetšwa go phela mo lefaseng ba ka tla ba phela ka mo go sa felego. O ka tshepa gore se se tlo direga. Kholofelo ye e ka go homotša ge o nagana ka batho ba geno bao ba hlokofetšego. Ba tla tsošwa bahung nakong ya ge Kriste le ba bangwe ba tla be ba “buša . . . e le dikgoši ka nywaga e sekete (1 000).” (Kut. 20:6) Le wena o ka kgodišega gore ge o ka hlokofala pele Jesu a thoma Pušo ya gagwe ya Mengwaga e Sekete, o tla tla o tsošwa bahung. ‘Kholofelo ye ya rena e ka se re nyamiše.’ (Baroma 5:5) E ka go thuša gore o dule o na le tumelo e tiilego gona bjale le gore o tšwele pele o hlankela Modimo o thabile. Sehlogong se se latelago re tlo ithuta dilo tše dingwe gape go tšwa go Bakorinthe ba Pele kgaolo 15.