1. Ke’ng seo Jehofa a se neilego yo mongwe le yo mongwe wa bahlanka ba gagwe?

JEHOFA o neile yo mongwe le yo mongwe wa bahlanka ba gagwe mošomo o bohlokwa ka phuthegong. Le ge mešomo ya rena e sa swane ka phuthegong, ka moka ga rena re bohlokwa e bile re a hlokana. Moapostola Paulo o re thuša bjang go kwešiša taba ye ya bohlokwa?

2. Go ya ka Baefeso 4:16, ke ka baka la’ng re swanetše go tšea yo mongwe le yo mongwe a le bohlokwa ka phuthegong?

² Go ya ka lengwalo la sehlogo se, Paulo o bontšhitše gore re ka se lebelele motho yo mongwe ka phuthegong gomme ra re ‘wena ga ke go nyake.’ (1 Bakor. 12:21) E le gore ka phuthegong go be le khutšo, re swanetše go lebelela yo mongwe le yo mongwe a le bohlokwa, e bile re šome gotee. (Bala Baefeso 4:16.) Ge re šoma ka botee, phuthego e a gola e bile e dula e na le lerato.

3. Re tlo bolela ka eng sehlogong se?

³ Ke dikarolo dife tše dingwe tšeo re ka bontšhago go tšona gore re hlompha ba bangwe ka phuthegong? Sehlogong se re tlo bona kamoo bagolo ba ka bontšhago gore ba hlompha bagologotee le bona. Ka morago ga moo, re tlo ithuta gore ka moka ga rena re ka bontšha bjang gore re hlompha bana babo rena le dikgaetšedi bao ba sego lenyalong. Sa mafelelo, re tlo bona gore re ka dira eng gore re hlomphe Bakristegotee le rena bao ba sa bolelego segagabo rena gabotse.

4. Baroma 12:10 e eletša bagolo gore ba swanetše go dira’ng?

⁴ Bagolo ka moka ka phuthegong ba kgethilwe ka moya o mokgethwa. Eupša yo mongwe le yo mongwe wa bona o na le bokgoni bjo itšego. (1 Bakor. 12:17, 18) Ba bangwe ba ka ba ba sa tšwa go kgethwa gomme ba se na phihlelo. Ba bangwe ba ka ba ba sa kgone go dira dilo tše itšego ka baka la ge ba tšofetše goba ba babja. Eupša ga go na mogolo yo a swanetšego go nagana gore mogolo yo mongwe ga a bohlokwa. Go e na le moo, mogolo yo mongwe le yo mongwe o swanetše go diriša keletšo ya Paulo yeo e lego go Baroma 12:10.—Bala.

5. Bagolo ba bontšha bjang gore ba hlompha bagologotee le bona, gona ke ka baka la’ng go le bohlokwa gore ba dire seo?

⁵ Bagolo ba bontšha gore ba hlompha bagologotee le bona ka go ba theetša ka kelohloko. Se se bohlokwa kudukudu ge bagolo ba kopana gore ba boledišane ka ditaba tše bohlokwa. Ka baka la’ng? Ekwa gore Morokami wa October 1, 1988, o ile wa reng ka taba ye. O itše: “Bagolo ba tla lemoga gore Kriste ka moya o mokgethwa a ka hlahla monagano wa mogolo lege e le ofe yo a lego sehlopheng sa bagolo gore a nee molao wa motheo wa Beibele wo o nyakegago go lebeletšana le boemo lege e le bofe goba go dira phetho lege e le efe e bohlokwa. (Ditiro 15:6-15) Ga go na mogolo le o tee yo a laolago moya woo o lego sehlopheng sa bagolo.”

6. Bagolo ba ka dira’ng gore ba šome ka botee, gona phuthego e holega bjang ge ba dira seo?

⁶ Mogolo yo a hlomphago bagolo ba bangwe ga a dule a bolela pele ge bagolo ba swere seboka. E bile ga a nyake gore go kwewe ka yena. Eupša o no bolela seo a se naganago ka boikokobetšo. O theetša gabotse ge ba bangwe ba bolela. Sa bohlokwa le go feta, o rata go bolela ka keletšo yeo e tšwago ka Mangwalong, le go latela tlhahlo ya “mohlanka yo a botegago le wa temogo.” (Mat. 24:45-47) Ge bagolo ba bontšhana lerato e bile ba hlomphana, moya o mokgethwa o tla ba thuša dipoledišanong tša bona. E bile moya woo o mokgethwa o tla ba thuša gore ba dire diphetho tšeo di tlago go matlafatša phuthego.—Jak. 3:17, 18.

7. Jesu o be a swara bjang batho bao ba sego lenyalong?

⁷ Lehono ka phuthegong go na le banyalani le malapa. E bile go na le bana babo rena ba bantši le dikgaetšedi bao ba sego lenyalong. Re swanetše go lebelela bjang bana babo rena le dikgaetšedi bao ba sego lenyalong? Nagana kamoo Jesu a bego a lebelela batho bao ba sego lenyalong. Ge Jesu a be a le mo lefaseng, ga se a ka a nyala. O ile a fetša nako e ntši kabelong yeo Modimo a bego a mo neile yona. Jesu ga se a ka a ruta batho gore go be go nyakega gore Bakriste ba nyale goba ba se ke ba nyala. Seo a ilego a se bolela ke gore Bakriste ba bangwe ba be ba tla kgetha go se nyale. (Mat. 19:11, 12) Jesu o be a hlompha batho bao ba sego lenyalong. Ga se a ka a nyatša batho bao ba sego lenyalong goba a bona eka go na le seo ba se nago sona ka ge ba se lenyalong.

8. Go ya ka Bakorinthe ba Pele 7:7-9, Paulo o ile a kgothaletša Bakriste gore ba nagane ka eng?

⁸ Ka go swana le Jesu, moapostola Paulo o ile a no hlankela Modimo a se a nyala. Paulo ga se a ka a ruta batho gore ke phošo gore Mokriste a tsene lenyalong. O be a tseba gore motho yo mongwe le yo mongwe o swanetše go itirela phetho tabeng ye. Eupša o ile a kgothaletša Bakriste go nagana ka taba ya ge e ba ba ka kgona go hlankela Modimo ba se lenyalong. (Bala 1 Bakorinthe 7:7-9.) Re kgona go bona gore Paulo o be a sa nyatše Bakriste bao ba sego lenyalong. Ka mohlala, o ile a kgetha Timotheo yo e bego e sa le mofsa e bile a se a nyala gore a dire mediro e bohlokwa ka phuthegong. * (Bafil. 2:19-22) Ka gona, e tla ba phošo go nagana gore ngwanabo rena o swanelega go hwetša ditokelo tše itšego goba ga a swanelege feela ka gobane a nyetše goba a se a nyala.—1 Bakor. 7:32-35, 38.

9. Re ka re’ng ka taba ya go nyala goba go se nyale?

⁹ Jesu le Paulo ga se ba ka ba ruta gore batho ba swanetše go nyala goba ga se ba swanela go nyala. Ka gona, re ka re’ng ka taba ya go nyala goba go se nyale? Morokami wa October 1, 2012, o ile wa bolela taba ye gabotse ge o be o re: ‘Ke therešo gore go nyala goba go se nyale go ka lebelelwa e le mpho e tšwago go Modimo. Jehofa ga a nyake gore batho ba be le dihlong goba ba nyame ka ge ba se lenyalong.’ Re naganne ka se, re swanetše go hlompha bana babo rena le dikgaetšedi bao ba sego lenyalong.

10. Re ka bontšha bjang gore re hlompha bana babo rena le dikgaetšedi bao ba sego lenyalong?

¹⁰ Re ka bontšha bjang gore re hlompha maemo le tsela yeo bana babo rena le dikgaetšedi  bao ba sego lenyalong ba ikwago ka yona? Re swanetše go dula re gopola gore Bakriste ba bangwe ba ikgethetše go se tsene lenyalong. Bakriste ba bangwe ba ka rata go nyala goba go nyalwa, eupša ga ba hwetše molekane yo a ba swanelago. Ba bangwe ba ka ba ba hlokofaletšwe ke balekane ba bona. Go sa šetšwe gore ke eng seo se dirago gore Mokriste yo a itšego a se be lenyalong, e tla ba phošo gore ba bangwe ka phuthegong ba mmotšiše gore ke ka baka la eng a se lenyalong goba ba ithaopele go mo nyakela molekane. Ke therešo gore Bakriste ba bangwe ba ka kgopela gore re ba thuše go hwetša balekane. Eupša ge e ba Mokriste yo a itšego a se a kgopela gore re mo thuše, a ka ikwa bjang ge e ba re ithaopela go mo thuša? (1 Bathes. 4:11; 1 Tim. 5:13) Ga bjale a re kweng gore ba bangwe ba bana babo rena le dikgaetšedi bao ba sego lenyalong ba ikwa bjang ka taba ye.

11-12. Ke dilo dife tšeo re ka di bolelago goba go di dira tšeo di ka nyamišago bao ba sego lenyalong?

¹¹ Molebeledi yo mongwe wa tikologo yo a sego a nyala, yoo a šomago gabotse kudu kabelong ya gagwe o re go se nyale go na le mehola e mentši. Eupša o boletše le gore go nyamiša kudu ge bana babo rena le dikgaetšedi ba go botšiša gore: “Ke ka baka la’ng o se wa tšwa o nyala?” Ngwanabo rena yo mongwe yo a sego a nyala yo a lego Bethele o re: “Ka dinako tše dingwe ba dira gore go bonagale eka bana babo rena le dikgaetšedi bao ba sego ba nyala ba swanetše go kwelwa bohloko. Se se ka dira gore go bonagale eka go se be lenyalong ke morwalo, e sego mpho.”

¹² Kgaetšedi yo mongwe yo a sego a nyalwa yoo a lego Bethele o re: “Bagoeledi ba bangwe ba no nagana gore batho ka moka bao ba sego lenyalong ba nyakana le molekane, goba ba no nagana gore batho ka moka bao ba sego lenyalong, ge ba na le sehlopha sa batho ke nako ya gore ba ikhweletše molekane. Nakong e nngwe ge ke be ke ile lefelong le lengwe ka baka la kabelo ya ka, ke ile ka fihla moo e le letšatši la diboka. Kgaetšedi yo a nkamogetšego o ile a mpotša gore phuthegong ya bona go na le bana babo rena ba babedi bao ba lekanago le nna. O ile a nkgothišetša gore o be a sa leke go nnyakela molekane. Eupša gateetee ge ke fihla ka Holong ya Mmušo, o ile a nkgoga gore ke yo kopana le bana babo rena bao. Nna le bana babo rena bao, re be re sa tsebe gore re dire eng.”

13. Kgaetšedi yo mongwe yo a sego a nyalwa o ile a kgothatšwa ke eng?

¹³ Kgaetšedi yo mongwe yo a sego a nyalwa yo a lego Bethele o re: “Ke tseba babulamadibogo bao ba godilego, bao ba sego ba nyala bao ba beago mohlala o mobotse ka phuthegong. Ba na le dipakane tše dibotse, ba rata go thuša ba bangwe ka phuthegong e bile ba dula ba thabile. Ga ba ipone ba le bohlokwa ka ge ba se lenyalong goba ba se na bana. E bile ga ba bone go na le seo ba itimago sona ka ge ba se lenyalong.” Ke ka baka leo go lego bose go ba ka phuthegong yeo batho ka moka ba hlomphanago. Ga o ikwe eka batho ba go kwela bohloko goba ba a go duma, e bile ga o bone eka ba a go hlokomologa goba ba go tšea o le wa bohlokwa kudu. O no ikwa o le karolo ya phuthego.

14. Re ka bontšha bjang gore re hlompha bana babo rena le dikgaetšedi bao ba sego lenyalong?

¹⁴ Bana babo rena le dikgaetšedi bao ba sego lenyalong ba tla leboga ge e ba re ba hlompha ka baka la dika tša bona tše dibotse, e sego ka gobane ba se lenyalong. Go e na le gore re ba kwele bohloko, re swanetše go tšeela godimo taba ya gore ba a botega. Se se tla dira gore bana babo rena le dikgaetšedi bao ba sego lenyalong ba se ke ba ikwa eka re re go bona: “Ga [re] le nyake.” (1 Bakor. 12:21) Ba tla tseba gore re a ba hlompha e bile re thabela gore ke karolo ya phuthego.

15. Bana babo rena ba bangwe le dikgaetšedi ba dirile diphetogo dife gore ba hlankele Jehofa ka mo go oketšegilego?

¹⁵ Go thoma mengwageng ye e sa tšwago go feta, bagoeledi ba bantši ba ile ba ipeela pakane ya gore ba ithute leleme le lefsa e le gore ba kgone go hlankela Jehofa ka mo go oketšegilego. E le gore ba kgone go dira seo, ba ile ba swanelwa ke go dira diphetogo. Bana babo rena ba le dikgaetšedi ba tlogile diphuthegong tšeo di dirišago maleme a gabo bona e le gore ba yo hlankela diphuthegong tša maleme a mangwe moo go nago le tlhokagalo. (Dit. 16:9) Ye ke phetho yeo bana babo rena ba ba itiretšego yona e le gore ba kgone go etiša Mmušo pele. Le ge go ka ba tšea mengwaga e mentši gore ba ithute leleme le lefsa, ba dira modiro o mobotse kudu moo ba hudugetšego gona. Dika tša bona tše dibotse di matlafatša phuthego le go e tiiša. Re rata bana babo rena ba le dikgaetšedi!

16. Bagolo ba lebelela eng ge ba bolelela ngwanabo rena gore a tlo hlankela e le mogolo goba e le mohlanka wa bodiredi?

¹⁶ Sehlopha sa bagolo se ka se dikadike go bolelela ngwanabo rena gore e be mogolo goba mohlanka wa bodiredi feela ka gobane a se a tšwa a tseba gabotse leleme leo le dirišwago ke phuthego. Bagolo ba swanetše go diriša Beibele go hlahloba ge e ba motho a ka swanelega go ba mogolo goba mohlanka wa bodiredi, e sego ba lebeletše ge e ba a kgona leleme leo phuthego e le dirišago.—1 Tim. 3:1-10, 12, 13; Tito 1:5-9.

17. Malapa a mangwe a swanetše go ipotšiša dipotšišo dife ge a hudugela nageng e nngwe?

¹⁷ Malapa a mangwe a Bakriste a hudugile nageng ya gabo ona e le ge a tšhaba mathata goba a yo nyaka mošomo nageng e nngwe. Ge ba fihla nageng yeo ba hudugetšego go yona, bana ba bona ba ka swanelwa ke go tsena sekolo seo se dirišago leleme la nageng yeo. Batswadi le bona ba ka swanelwa ke go ithuta leleme la nageng yeo e le gore ba kgone go hwetša mošomo. Ba tla dira’ng ge e ba go na le phuthego goba sehlopha seo se dirišago leleme la gabo bona? Lapa leo le tla kgetha go ya phuthegong efe? Na le tla kgetha go ya phuthegong yeo e dirišago leleme la nageng yeo, goba phuthego yeo e dirišago leleme leo lapa leo le le bolelago?

18. Ka go dumelelana le Bagalatia 6:5, re ka bontšha bjang gore re hlompha phetho yeo hlogo ya lapa e e dirilego?

¹⁸ Hlogo ya lapa ke yona e swanetšego go dira phetho ya gore lapa la yona le tla ya phuthegong efe. Ka ge ye e le phetho yeo motho a swanetšego go itirela yona, hlogo ya lapa e swanetše go lebelela seo se tlago go hola lapa la yona. (Bala Bagalatia 6:5.) Re swanetše go hlompha phetho yeo hlogo ya lapa e tlago go e dira. Ge e ba e dirile phetho ya gore lapa la yona le tle phuthegong ya rena, re swanetše go hlompha phetho yeo gomme re ba amogele.—Baroma 15:7.

19. Ke taba efe yeo dihlogo tša malapa di swanetšego go e naganišiša le go rapela ka yona?

 ¹⁹ Maemong a mangwe batswadi ba ka kgetha go ya phuthegong yeo e dirišago segagabo bona, eupša bana ba bona ba ka no ba ba sa kwešiše leleme leo. Go ka direga gore bana ba bona ga ba kwešiše seo se bolelwago dibokeng gomme seo se ka dira gore tswalano ya bona le Jehofa e se ke ya gola. Tswalano ya bona le Jehofa e ka no se gole ka gobane ba ka ba ba tsena sekolo seo se dirišago leleme la nageng yeo ba hudugetšego go yona, e sego leleme la batswadi ba bona. Ge e ba go le bjalo, dihlogo tša malapa di swanetše go naganišiša le go rapela ka taba ya gore di ka dira eng gore di thuše bana ba tšona gore ba be le segwera se sebotse le Jehofa. Batswadi ba ka swanelwa ke go kgetha go ruta bana ba bona segagabo bona goba go hudugela phuthegong yeo e dirišago leleme leo bana ba bona ba le kwešišago gabotse. Go sa šetšwe gore hlogo ya lapa e dirile phetho efe, phuthego yeo e hudugelago go yona e swanetše go mo hlompha le go hlompha lapa la yona.

20. Re ka bontšha bjang gore re hlompha bana babo rena le dikgaetšedi bao ba ithutago leleme le lefsa?

²⁰ Go ya ka mabaka ao re sa tšwago go bolela ka ona, diphuthegong tše dintši go tla dula go na le bana babo rena le dikgaetšedi bao ba ithutago leleme le lefsa. Go ka no se be bonolo gore ba kgone go bolela seo ba se naganago. Eupša ge re sa lebelele feela gore ga ba kgone go bolela leleme gabotse, re tla bona gore ba rata Jehofa e bile ba nyaka go mo hlankela. Ge re bona gore bana babo rena ba le dikgaetšedi ba na le dika tše dibotse, re tla ba hlompha kudu. Re ka se re go bona, “ga re le nyake” goba ga re le hloke feela ka gobane ba sa kgone go bolela segagabo rena gabotse.

21-22. Jehofa o re neile tokelo efe e kgahlišago?

²¹ Jehofa o re neile tokelo e kgahlišago kudu ya go ba karolo ya phuthego ya gagwe. Ka moka ga rena re bohlokwa go Jehofa e bile re swanetše go lebelelana re le bohlokwa. Re swanetše go dira seo go sa šetšwe gore motho ke monna goba ke mosadi, o lenyalong goba ga a lenyalong, ke mofsa goba ke motho yo a godilego, goba o kgona go bolela leleme le itšego gabotse goba ga a kgone.—Baroma 12:4, 5; Bakol. 3:10, 11.

²² Eka re ka tšwela pele re diriša dilo tše dintši tšeo re ithutilego tšona papišong ya Paulo ya mabapi le mmele wa motho. Ge e ba re ka dira bjalo, se se tla re thuša go nyaka ditsela tšeo re ka kgothatšago bana babo rena le dikgaetšedi ka phuthegong, e bile se tla re thuša gore re dule re ba rata le go ba hlompha.