1. Ke bomang bao ba ilego ba thuša go hloma phuthego ya kua Filipi?

GE MOAPOSTOLA PAULO, Silase, Luka le Timotheo ba be ba fihla motseng wa Filipi woo o bego o le Roma, ba ile ba hwetša batho ba bantši bao ba bego ba nyaka go kwa ditaba tše dibotse. Bana babo rena ba ba bane ba ile ba thuša go hloma phuthego e mpsha motseng woo gomme barutiwa bohle ba thoma go kopanela gotee. Mohlomongwe ba be ba kopanela legaeng la Lidia yoo a bego a rata go amogela baeng.—Dit. 16:40.

2. Phuthego ya Filipi e ile ya lebeletšana le mathata afe gateetee ka morago ga gore e hlongwe?

² Gateetee ka morago ga gore phuthego ya Filipi e hlongwe, e ile ya ba le mathata. Sathane o ile a dira gore batho bao ba bego ba hloile Bakriste ba ganetše modiro wa bona wa go bolela ditaba tše dibotse. Paulo le Silase ba ile ba swarwa, ba itiwa ka dikgati gomme ba lahlelwa kgolegong. Ka morago ga gore ba lokollwe kgolegong, ba ile ba etela batho bao e bego e sa tšwa go ba barutiwa gomme ba ba kgothatša. Ke moka Paulo, Silase le Timotheo ba ile ba tloga motseng woo, eupša go ka direga gore Luka yena o ile a šala moo. Phuthego yeo e bego e sa tšwa go hlongwa e ile ya dira’ng? Jehofa o ile a thuša bana babo rena ba phuthegong yeo ka moya wa gagwe gore ba tšwele pele ba mo hlankela ka mafolofolo. (Bafil. 2:12) Ruri Paulo o ile a ikgantšha ka bona!

3. Go ya ka Bafilipi 1:9-11, Paulo o ile a rapelela dilo dife?

³ Ka morago ga mengwaga e ka bago e lesome, Paulo o ile a ngwalela phuthego ya Filipi lengwalo. Ge o dutše o bala lengwalo leo, o kgona go kwa kamoo Paulo a bego a rata bana  babo ka gona. O ngwadile gore: “Ke le [hlologetše] ka moka ga lena ka lerato leo le etšago leo Kriste Jesu a nago le lona.” (Bafil. 1:8) O ile a ba botša gore o be a ba rapelela. O ile a ba ngwalela gore ba oketše lerato la bona, ba kgonthišetše dilo tše bohlokwa kudu, ba se be le bosodi, ba se ke ba kgopišana e bile ba tšwele pele ba enywa dienywa tša go loka. Le rena lehono re ka ithuta dilo tše dintši mantšung a Paulo. Ka gona anke re baleng mantšu ao Paulo a ilego a a ngwalela Bafilipi go Bafilipi 1:9-11. (Bala.) Ka morago ga moo re boleleng ka dintlha tšeo a di boletšego le go bona kamoo re ka dirišago e nngwe le e nngwe ya tšona.

4. (a) Go ya ka Johane wa Pele 4:9, 10, Jehofa o bontšhitše bjang gore o a re rata? (b) Re swanetše go rata Modimo go fihla bokgoleng bofe?

⁴ Jehofa o ile a bontšha gore o re rata kudu ka go romela Morwa wa gagwe mo lefaseng gore a tlo re hwela. (Bala 1 Johane 4:9, 10.) Lerato leo Modimo a re bontšhitšego lona le dira gore le rena re mo rate. (Baroma 5:8) Re swanetše go rata Modimo go fihla bokgoleng bofe? Jesu o ile a araba potšišo yeo ge a be a botša Mofarisei yo mongwe gore: “O rate Jehofa Modimo wa gago ka pelo ya gago ka moka, ka moya wa gago ka moka le ka monagano wa gago ka moka.” (Mat. 22:36, 37) Re nyaka go rata Modimo ka dipelo tša rena ka moka. Le gona re nyaka gore tsela yeo re mo ratago ka yona e matlafale letšatši le lengwe le le lengwe. Paulo o ile a botša Bafilipi gore lerato la bona “le gole ka mo go oketšegago.” Re ka dira’ng gore tsela yeo re ratago Modimo ka yona e matlafale?

5. Re ka dira’ng gore tsela yeo re ratago Modimo ka yona e gole?

⁵ E le gore re rate Modimo, re swanetše go mo tseba. Beibele e re: “Yo a se nago lerato ga a tsebe Modimo, gobane Modimo ke lerato.” (1 Joh. 4:8) Moapostola Paulo o hlalositše gore re tla rata Modimo kutšwanyana ge e ba re tseba therešo ka yena e bile re kwešiša kamoo a lebelelago dilo ka gona. (Bafil. 1:9) Ge re be re thoma go ithuta Beibele, re ile ra thoma go rata Jehofa gaešita le ge re be re sa tsebe dilo tše dintši ka yena. Ke moka ge re dutše re ithuta ka yena, tsela yeo re mo ratago ka yona e ile ya gola. Ke ka baka leo go lego bohlokwa kudu go ithuta Beibele ka mehla le go naganišiša ka seo re se balago.—Bafil. 2:16.

6. Go ya ka Johane wa Pele 4:11, 20, 21, re ka dira’ng gore re rate bana babo rena kutšwanyana?

⁶ Tsela yeo Modimo a re ratago ka yona e tla dira gore le rena re rate bana babo rena. (Bala 1 Johane 4:11, 20, 21.) Re ka nagana gore go tla ba bonolo gore re rate bana babo rena le dikgaetšedi. Mohlomongwe re ka no ba re nagana bjalo ka gobane ka moka ga rena re hlankela Jehofa e bile re leka go ekiša dika tša gagwe tše dibotse. Le gona re ekiša mohlala wa Jesu yoo a ilego a re rata kudu moo a ilego a re hwela. Eupša ka dinako tše dingwe re ka thatafalelwa ke go kwa taelo ya gore re ratane. Nagana ka seo se ilego sa direga kua phuthegong ya Filipi.

7. Re ithuta’ng keletšong yeo Paulo a ilego a e nea Ebodia le Sintike?

⁷ Ebodia le Sintike e be e le dikgaetšedi tše mafolofolo tšeo di bego di šoma gotee le moapostola Paulo. Eupša go ka direga gore go ile gwa ba le seo ba ilego ba se dumelelane ka sona gomme sa dira gore ba se sa kwana. Lengwalong leo Paulo a ilego a le ngwalela phuthegong yeo Ebodia le Sintike ba bego ba le go yona, o ile a bitša ka go lebanya maina a dikgaetšedi tše a di eletša gore di kwane. (Bafil. 4:2, 3) Le gona Paulo o ile a bona go le bohlokwa gore a eletše phuthego ka moka gore e “[dule e] dira dilo tšohle ka ntle le go  ngongorega le go ngangišana.” (Bafil. 2:14) Ga go pelaelo gore keletšo ye e ile ya hola phuthego ka moka gotee le dikgaetšedi tše gore di kaonefatše tsela yeo di ratanago ka yona.

8. Ke’ng seo se dirago gore go be thata go rata bana babo rena le dikgaetšedi, gona re ka thušwa ke’ng?

⁸ Ka dinako tše dingwe go ka ba thata gore re rate bana babo rena le dikgaetšedi ka gobane ka go swana le Ebodia le Sintike, re ka dulela go šetša mafokodi a bana babo rena. Ka moka ga rena re dira diphošo ka mehla. Ge e ba re ka dulela go šetša mafokodi a bana babo rena, seo se ka dira gore go be thata go ba rata. Ka mohlala, re ka tenega ge ngwanabo rena yo a itšego a ka lebala go tlo re thuša ge re hlwekiša Holo ya Mmušo. Ge re ka thoma go bala diphošo ka moka tšeo ngwanabo rena yoo a di dirilego, re tlo tenega le go feta gomme ra se sa mo rata. Ge e ba o ka ikhwetša o le boemong bja go swana le bjoo, e tla ba mo go botse go gopola gore Jehofa o tseba mafokodi a rena gotee le a bana babo rena. Eupša le ge a tseba mafokodi a ka moka, o re rata ka moka ga rena. Ka baka leo, re swanetše go ekiša tsela yeo Jehofa a re ratago ka yona gomme re lebelele dika tše dibotse go bana babo rena. Ge re šoma ka thata gore re rate bana babo rena, seo se dira gore re be le botee gare ga rena.—Bafil. 2:1, 2.

9. Tše dingwe tša “dilo tše bohlokwa kudu” tšeo Paulo a boletšego ka tšona lengwalong leo a le ngwaletšego Bafilipi ke dife?

⁹ Jehofa o ile a laela Paulo gore a botše Bakriste ba kua Filipi gore ba “kgonthišetše dilo tše bohlokwa kudu.” Le rena re swanetše go dira se se swanago lehono. (Bafil. 1:10) Dilo tše tše bohlokwa di akaretša go kgethagatšwa ga leina la Jehofa, go phethagatšwa ga merero ya gagwe le go ba le khutšo le botee le bana babo rena. (Mat. 6:9, 10; Joh. 13:35) Ge re etiša dilo tše pele maphelong a rena, re tla be re bontšha gore re rata Jehofa.

10. Re swanetše go dira’ng gore Modimo a re lebelele re se na bosodi?

¹⁰ Le gona Paulo o boletše gore ‘ga se ra swanela go ba le bosodi.’ Se ga se re gore re swanetše go ba batho ba phethagetšego. Ga go kgonege gore re hloke bosodi goba re hlweke ka mo go feletšego go swana le Jehofa Modimo. Eupša Jehofa o tla re lebelela re se na bosodi ge e ba re dira sohle seo re ka se kgonago gore re tiiše segwera sa rena le yena le go kgonthišetša gore re dira dilo tše bohlokwa kudu. Tsela e nngwe yeo re ka bontšhago gore re rata bana babo rena ke go dira sohle seo re ka se kgonago gore re se ke ra ba kgopiša.

11. Ke ka baka la’ng re swanetše go phema go kgopiša bana babo rena?

¹¹ Jehofa o tšeela godimo taba ya go kgopiša ba bangwe, ka gona le rena re swanetše go tšeela taba ye godimo. Re ka kgopiša ba bangwe bjang? Re ka ba kgopiša ka boithabišo bjo re bo kgethago, moaparo wa rena goba mešomo ya rena. Mohlomongwe seo re se dirago se ka no ba se se na bothata. Eupša ge e ba se kgopiša ngwanabo rena goba kgaetšedi, gona ye ke taba e kgolo. Jesu o itše go tla ba kaone gore leswika le legolo le kgokelelwe melaleng ya rena gomme re lahlelwe ka lewatleng go e na le gore re kgopiše yo mongwe wa bana babo rena.—Mat. 18:6.

12. Re ithuta’ng mohlaleng wa banyalani ba bangwe ba babulamadibogo?

¹² Banyalani ba bangwe ba babulamadibogo ba ile ba diriša bjang seo Jesu a se boletšego? Phuthegong yeo ba bego ba le go yona, go be go na le banyalani ba bangwe bao ba bego ba sa tšwa go kolobetšwa, bao ba godišeditšwego malapeng ao a bego a na le melao e methata kudu. Banyalani ba bao ba bego ba sa tšwa go kolobetšwa, ba be ba nagana gore Bakriste ga  se ba swanela go bogela dimubi, gaešita le ge e le dimubi tše di hlwekilego. Ba ile ba kgopišega kudu ge ba ekwa gore banyalani bao ba babulamadibogo ba tšwa go bogela mubi. Banyalani bao ba babulamadibogo ba ile ba tlogela go bogela dimubi go fihlela banyalani bao ba bego ba sa tšwa go kolobetšwa ba tlwaeditše matswalo a bona go kwešiša gakaone se se nepagetšego le se se fošagetšego. (Baheb. 5:14) Ka go dira bjalo, banyalani bao ba babulamadibogo ba ile ba bontšha gore ba rata ngwanabo bona le kgaetšedi ka mantšu le ka ditiro.—Baroma 14:19-21; 1 Joh. 3:18.

13. Re ka diriša bjang ngwanabo rena sebe?

¹³ Tsela e nngwe yeo re ka kgopišago ba bangwe ke ka go ba diriša sebe. Seo se ka direga bjang? Ka mohlala, a re re morutwana yo a itšego wa Beibele o kgona go fenya go lemalela bjala ka morago ga nako e telele a leka. Ka morago ga moo, morutwana yoo o lemoga gore go kaone gore a se sa kgwatha bjala. O dira diphetogo ka pela, gomme mafelelong o a kolobetšwa. Ke moka ka morago ngwanabo rena yo a itšego o mo laletša pokanong e itšego, gomme ge a fihla moo, o mo nea bjala. O re go yena: “O se ke wa tshwenyega, o šetše o le Mokriste bjale, Jehofa o tla go thuša ka moya wa gagwe. Seka se sengwe seo se enywago ke moya wa Modimo ke boitshwaro. Ge e ba o na le boitshwaro, o tla kgona go nwa bjala gabotsana.” E be e tla ba mo go nyamišago ge nkabe ngwanabo rena yo yo a sa tšwago go kolobetšwa a theetše motho yoo gomme a boele mokgweng wa gagwe wa go lemalela bjala.

14. Diboka tša rena di re thuša bjang go diriša keletšo yeo e lego go Bafilipi 1:10?

¹⁴ Diboka tša rena di re thuša go diriša keletšo yeo e lego go Bafilipi 1:10 ka ditsela tše dintši.  Sa pele, dilo tšeo re ithutago tšona ge re le dibokeng di re gopotša dilo tšeo Jehofa a di lebelelago e le tše bohlokwa kudu. Sa bobedi re ithuta kamoo re ka dirišago seo re ithutilego sona e le gore re se be le bosodi. Sa boraro re kgothaletšwa go ‘hlohleletšana go ratana le go dira mediro e mebotse.’ (Baheb. 10:24, 25) Ge bana babo rena ba re kgothatša, seo se dira gore re rate Modimo le bana babo rena kutšwanyana. Ge re rata Modimo le bana babo rena ka go tšwa pelong, seo se tla re dira gore re pheme go kgopiša bana babo rena.

15. Go enywa “dienywa tša go loka” go bolela’ng?

¹⁵ Paulo o ile a rapela ka go tšwa pelong gore Bafilipi ba “tlale dienywa tša go loka.” (Bafil. 1:11) Ga go pelaelo gore ‘dienywa tšeo tša go loka’ di be di akaretša go rata ga bona Jehofa le batho. Le gona di be tla akaretša go botša ba bangwe ka tumelo ya bona go Jesu le ka kholofelo e kgahlišago yeo ba bego ba na le yona. Bafilipi 2:15 e diriša papišo e nngwe ge e re: ‘Le bonege le le diediši lefaseng.’ Papišo ye ya Paulo e a kwagala ka gobane Jesu o ile a bitša barutiwa ba gagwe gore ke “seetša sa lefase.” (Mat. 5:14-16) Le gona Jesu o ile a laela balatedi ba gagwe gore ba ‘dire batho barutiwa’ a ba a bolela le gore e tla ba ‘dihlatse go fihla karolong ya kgole ya lefase.’ (Mat. 28:18-20; Dit. 1:8) Re enywa “dienywa tša go loka” ge re dira sohle seo re ka se kgonago go dira modiro wo o bohlokwa.

16. Lengwalo la Bafilipi 1:12-14 le bontšha bjang gore re ka bonega re le diediši gaešita le ge re le maemong a thata? (Bona seswantšho sa letlakala la ka ntle.)

¹⁶ Re ka kgona go bonega re le diediši go sa šetšwe maemo ao re lego go ona. Maemong a mangwe, selo seo se ka bonagalago se ka re šitiša go bolela ditaba tše dibotse, se ka re bulela sebaka sa go bolela ditaba tše dibotse. Ka mohlala, Moapostola Paulo o be a golegilwe ka ntlong kua Roma ge a be a ngwalela Bafilipi  lengwalo. Eupša taba ya gore Paulo o be a golegilwe ga se ya ka ya mo šitiša go botša batho bao ba bego ba mo hlokometše le baeng ba gagwe ditaba tše dibotse. Paulo o ile a bolela ditaba tše dibotse ka mafolofolo maemong ao, gomme seo se ile sa nea Bakriste ba bangwe kgodišego le sebete sa ‘go bolela lentšu la Modimo ba sa boife.’—Bala Bafilipi 1:12-14; 4:22.

17. Bana babo rena ba bangwe le dikgaetšedi ba kgona bjang go bolela ditaba tše dibotse le ge ba phela maemong a thata?

¹⁷ Bana babo rena ba bantši le dikgaetšedi ba bontšha sebete go swana le Paulo. Ba dula dinageng tšeo go tšona ba ka se kgonego go bolela ditaba tše dibotse ka bolokologi goba ka ntlo le ntlo, ka gona ba diriša mekgwa e mengwe go botša batho ditaba tše dibotse. (Mat. 10:16-20) Go e nngwe ya dinaga tšeo, molebeledi yo mongwe wa tikologo o ile a šišinya gore bagoeledi ba bolele ditaba tše dibotse go ba leloko, baagišani, bao ba tsenago le bona sekolo, bao ba šomago le bona, gotee le bao ba ba tlwaetšego. Pele mengwaga e mebedi e ka fela, diphuthego tša lefelong leo di ile tša oketšega kudu. Re ka ba re dula nageng yeo modiro wa go bolela ditaba tše dibotse o sego wa thibelwa. Eupša re ka ithuta thuto e bohlokwa mohlaleng wa bana babo rena le dikgaetšedi bao ba dulago dinageng tšeo modiro wa go bolela ditaba tše dibotse o thibetšwego. Re ka ithuta gore ka mehla re swanetše go nyaka ditsela tša go bolela ditaba tše dibotse re kgodišegile gore Jehofa o tla re nea matla a go fenya mathata le ge e le afe.—Bafil. 2:13.

18. Re swanetše go ikemišetša go dira’ng?

¹⁸ Anke lehono re direng sohle seo re ka se kgonago go diriša keletšo yeo Paulo a ilego a e ngwalela Bafilipi. Le gona anke re šomeng ka thata go kgonthišetša dilo tše bohlokwa kudu, re se be le bosodi, re pheme go kgopiša ba bangwe gomme re enywe dienywa tša go loka. Ge re ka dira bjalo, lerato la rena le tla gola gomme seo sa dira gore Tatago rena e lego Jehofa a tumišwe.