Taba ye e no ba e nngwe ya ditaba tšeo manaba a Jesu a bego a mo swaya diphošo ka yona le go swaya barutiwa ba gagwe. Molao wa Moshe o be o na le ditaelo tše dintši tša mabapi le go itlhwekiša ditšhileng tša go swana le go ediša, lephera le go swara ditopo tša batho le ditoto tša diphoofolo. O be o bile o na le ditaelo tša mabapi le kamoo motho a ka itlhwekišago ka gona. Seo se be se ka dirwa ka go neela sehlabelo, go hlapa le go hlatswa diaparo tša gagwe goba go foketšwa ka meetse.​—Lef., dikgao. 11-15; Num., kgao. 19.

Borabi ba Bajuda ba be ba hlalosa ka mo go feteletšego ntlha e nngwe le e nngwe ya melao ye. Puku e nngwe e re Borabi bao ba be ba “nyakolla selo se sengwe le se sengwe seo se dirago gore motho a se hlweke, le gore go se hlweke moo go ka fetela ba bangwe bjang le ka tekanyo efe. Ba be ba bile ba nyakolla dibjana le dilo tšeo di ka lebelelwago di sa hlweka le tšeo di ka se lebelelwego di sa hlweka, ke moka mafelelong ba bea melao ya kamoo motho a ka itlhwekišago le kamoo dilo tšeo di ka hlwekišwago ka gona.”

Manaba a Jesu a ile a mmotšiša gore: “Ke ka baka la’ng barutiwa ba gago ba sa latele tlwaelo ya batho ba mehleng ya bogologolo, eupša ba eja dijo ka diatla tša ditšhila?” (Mar. 7:5) Manaba ao a Jesu a be a sa bolele gore go ja ka diatla tša ditšhila ke go se hlweke. Go ya ka tlwaelo ya bona, borabi ba be ba nyaka go hlapišwa diatla tša bona go fihla ditšung pele ba eja. Puku yeo go boletšwego ka yona ka mo godimo e oketša ka gore: “Le gona ba be ba kgethile dibjana tšeo motho a swanetšego go hlapela ka go tšona, mohuta wa meetse ao a ka dirišwago, motho yo a swanetšego go a tšhela le gore diatla di hlapiwe go fihla kae.”

Jesu o ile a araba manaba ao a gagwe ka tsela e bonolo mabapi le melao yeo ya bona. O boditše baetapele ba bodumedi ba Bajuda ba lekgolong la pele la nywaga gore: “Jesaya o porofetile ka mo go swanetšego ka lena baikaketši, bjalo ka ge go ngwadilwe gwa thwe: ‘Batho ba ba nkgodiša ka melomo, eupša dipelo tša bona di kgole le nna [Jehofa]. Ke ga lefeela ge ba dutše ba nthapela, gobane ba ruta ditaelo tša batho e le dithutatumelo.’ Le tlogela taelo ya Modimo la kgomarela tlwaelong ya batho.”​—Mar. 7:6-8.