1-2. (a) Ke ka baka la’ng moapostola Paulo a itše lerato ke seka “se segolo”? (b) Re tlo boledišana ka dipotšišo dife?

 GE MOAPOSTOLA Paulo a be a bolela ka tumelo, kholofelo le lerato, o ile a phetha ka gore seka “se segolo go di feta ka moka ke lerato.” (1 Bakor. 13:13) Ke ka baka la’ng a ile a realo? Nakong e tlago go ka se sa nyakega gore re be le tumelo dikholofetšong tša Modimo tša lefaseng le leswa goba kholofelo ya gore dilo tšeo a di holofeditšego di tlo direga ka gobane di tla be di phethagetše. Eupša re tlo swanelwa ke go dula re rata Modimo le batho. Ge e le gabotse re tlo dula re ba rata ka mo go sa felego.

² Ka ge re swanetše go dula re na le lerato, re tlo boledišana ka dipotšišo tše tše tharo. Ya pele, ke ka baka la eng re swanetše go ratana? Ya bobedi, re bontšhana bjang gore re a ratana? Ya boraro, ke eng seo se ka re thušago gore re dule re ratana go tšwa pelong?

3. Ke ka baka la’ng re ratana?

³ Ke ka baka la eng go le bohlokwa gore re ratane? Ge re rata bana babo rena re bontšha gore re Bakriste ba therešo. Jesu o boditše baapostola ba gagwe gore: “Bohle ba tla tseba ka se gore le barutiwa ba ka, ge e ba le ratana.” (Joh. 13:35) Le gona, ge re ratana re ba ngatana e tee. Paulo o itše lerato “ke setlemo se se phethagetšego sa botee.” (Bakol. 3:14) Eupša go na le lebaka le lengwe la bohlokwa la gore re ratane. Moapostola Johane o ile a ngwalela bana babo le dikgaetšedi gore:  “Yo mongwe le yo mongwe yo a ratago Modimo, o swanetše go rata le ngwanabo.” (1 Joh. 4:21) Ge re bontšha bana babo rena le dikgaetšedi lerato, re bontšha gore re rata Modimo.

4-5. Nea mohlala wo o bontšhago kamoo go rata Modimo ka gona go sepedišanago le go rata batho ba bangwe.

⁴ Tsela yeo re ratago Modimo ka yona e tswalana bjang le tsela yeo re ratago bana babo rena le dikgaetšedi ka yona? Ka mohlala, nagana ka tsela yeo pelo ya rena e tswalanago ka gona le ditho tše dingwe tša mmele. Pelo e dirišana le ditho tše dingwe tša mmele. Ka gona, ge ngaka e nyaka go kwa gore pelo ya motho e pompa bjang, e diriša letsogo la motho yoo go kwa ge e ba pelo ya gagwe e phetše gabotse goba e fokola. Ka go dira bjalo, ngaka e ka kgona go tseba gore pelo ya molwetši e phetše bjang. Re ka diriša bjang molao wo wa motheo?

⁵ Ge ngaka e re hlahloba gomme e bona ka tsela yeo madi a rena a sepelago ka yona, e ka tseba gore pelo ya rena e phetše bjang. Ka mo go swanago, re ka kgona go tseba gore re rata Modimo gakaakang ka go hlahloba tsela yeo re ratago batho ba bangwe ka yona. Ge e ba re ka lemoga gore tsela yeo re ratago badumedigotee le rena ka yona e a fokola, seo se ka bolela gore le tsela yeo re ratago Modimo ka yona e a fokola. Eupša ge e ba re bontšha badumedigotee le rena gore re a ba rata, seo se tla bontšha gore re tloga re rata Modimo go tšwa pelong.

6. Ke ka baka la’ng re swanetše go tshwenyega ge e ba re ikwa re se sa rata bana babo rena le dikgaetšedi kudu? (1 Joh. 4:​7-9, 11)

⁶ Ke ka baka la’ng re swanetše go tshwenyega ge e ba re ikwa re se sa rata bana babo rena le dikgaetšedi kudu? Ka lebaka la gore seo se tla bontšha gore segwera sa rena le Jehofa se a fokola. Moapostola Johane o hlalositše se gabotse ge a be a re: “Ge motho a palelwa ke go rata ngwanabo yo a mmonago, na a ka kgona go rata Modimo yo a sa kago a mmona?” (1 Joh. 4: 20) Re ithuta’ng go se? Jehofa o a thaba ge a bona re ratana.”—Bala 1 Johane 4:​7-9, 11.

7-8. Ke ditsela dife tše dingwe tšeo re ka bontšhanago ka tšona gore re a ratana?

⁷ Gantšhi ge re bala Lentšu la Modimo re hwetša taelo e rego, “le ratane.” (Joh. 15:​12, 17; Baroma. 13:8; 1 Bathes. 4:9; 1 Pet. 1:22; 1 Joh. 4:11) Eupša lerato ke seka seo se lego ka pelong goba motho wa ka gare, le gona batho ba ka se kgone go bona dipelo tša rena. Re ka bontšha bjang bana babo rena le dikgaetšedi gore re a ba rata? Re ka ba bontšha ka dilo tšeo re di bolelago le tšeo re di dirago.

⁸ Go na le ditsela tše dintšhi tšeo ka tšona re ka bontšhago bana babo rena le dikgaetšedi gore re a ba rata. Mehlala e mengwe ke ye: “Botšanang therešo.” (Sak. 8:16) “Le boloke khutšo gare ga lena.” (Mar. 9:50) Etelelang pele “go bontšhaneng kgodišo.” (Baroma 12:10) “Amogelanang.” (Baroma 15:7) “Tšwelang pele . . . le lebalelana.” (Bakol. 3:13) “Tšwelang pele le rwalelana maima.” (Bagal. 6:2) “Tšwelang pele le homotšana.” (1 Bathes. 4:18) “Tšwelang pele . . . le agana.” (1 Bathes. 5:11) “Le rapelelaneng.”—Jak. 5:16.

9. Ke ka baka la’ng go homotša ba bangwe e le tsela e bohlokwa ya go ba bontšha gore re a ba rata? (Bona le seswantšho.)

⁹ A re boneng tsela e nngwe yeo re ka bontšhago ka yona gore re rata batho ba bangwe. Re tlo boledišana ka mantšu ao Paulo a a boletšego ge a be a re: “Tšwelang pele le homotšana.” Ke ka baka la eng go homotša  batho ba bangwe e le tsela e bohlokwa ya go bontšha lerato? Go ya ka puku ya go ithuta Beibele, lentšu leo Paulo a le dirišitšego e le “homotšana” le bolela gore “go ba kgauswi le motho yo mongwe gomme wa mo kgothatša ge a na le mathata.” Ka gona, ge re homotša bana babo rena ge ba na le mathata re ba thuša gore ba tšwele pele ba hlankela Jehofa ka go botega. Ka mehla ge re homotša bana babo rena re ba bontšha gore re a ba rata.—2 Bakor. 7:​6, 7, 13.

10. Go ba le kwelobohloko go tswalana bjang le go homotša ba bangwe?

¹⁰ Go kwela batho bohloko le go ba homotša go a sepedišana. Bjang? Ge motho a kwela motho yo a tlaišegago bohloko, o nyaka go mo homotša le go dira selo se sengwe seo se ka mo thušago. Re thoma ka go kwela motho bohloko ke moka ra mo homotša. Bona kamoo Paulo a hlalosago tsela yeo Jehofa a kwelago batho bohloko ka yona ke moka ka morago a ba homotša. Paulo o hlalosa Jehofa e le “Tate wa dikgaugelo le Modimo wa khomotšo yohle.” “(2 Bakor. 1:3) Mo Paulo o diriša polelwana “dikgaugelo” go hlalosa tsela yeo Jehofa a kwelago batho bohloko ka yona. Ka gona, Modimo o bitšwa Tate wa dikgaugelo goba Mothopo wa dikgaugelo ka gobane a kwela batho bohloko.” Ka gona kwelobohloko yeo a nago le yona e dira gore a re homotše ditlaišegong tša rena ka moka. (2 Bakor. 1:4) Go swana le meetse ao a lapološago motho yo a swerwego ke lenyora, Jehofa le yena o a lapološa le go homotša batho bao ba imetšwego. Re ka ekiša bjang Jehofa ka go kwela batho ba bangwe bohloko le go ba homotša? Tsela e nngwe yeo re ka dirago seo ka yona ke ka go hlagolela dika tšeo di ka re thušago gore re kgone go homotša batho ba bangwe. Dika tšeo ke dife?

11. Go ya ka Bakolose 3:12 le 1 Petro 3:​8, ke dika dife tše dingwe tšeo di tlo re thušago gore re rate batho ba bangwe le go ba homotša?

¹¹ Re tlo thušwa ke’ng gore re dule re rata bana babo rena le dikgaetšedi le go “tšwela pele re ba homotša” letšatši le lengwe le le lengwe? Re swanetše go hlagolela dika tša go swana le kwelobohloko, lerato la borwarre le botho. (Bala Bakolose 3:12; 1 Petro 3:8.) Dika tše di tlo re thuša bjang? Ge re kwela bana babo rena bohloko e bile re na le taba le bona, re tlo nyaka go ba thuša ge ba tlaišega. Jesu o boletše gore, “molomo o bolela go tšwa go se se tletšego pelong. Motho yo a lokilego o ntšha dilo tše botse letlotlong la gagwe le lebotse.” (Mat. 12:​34, 35) Go homotša bana babo rena le dikgaetšedi bao ba hlokago thušo, ke tsela e bohlokwa ya go bontšha gore re tloga re ba rata.

12. (a) Ke ka baka la’ng re swanetše go dula re ntšhitše mahlo dinameng? (b) Re tlo boledišana ka potšišo efe?

¹² Ka moka ga rena re nyaka go ‘tšwela pele re ratana.’ (1 Joh. 4:7) Lega go le bjalo, go bohlokwa go gopola mantšu ao Jesu a a boletšego ge a be a re lemoša gore “lerato la ba bantši le tla fola.” (Mat. 24:12) Jesu o be a sa bolele gore barutiwa ba gagwe ba tla tlogela go bontšhana lerato. Eupša re swanetše go dula re ntšhitše mahlo dinameng gore re se ke ra swana le batho bao re phelago gare ga bona bao ba sa bontšhanego lerato. Ke eng seo se ka re thušago go bona ge e ba re rata bana babo rena go tšwa pelong?

13. Ke eng seo se ka re thušago go bona ge e ba re sa rata bana babo rena le dikgaetšedi go tšwa pelong?

¹³ Tsela e nngwe yeo e ka re thušago go bona ge e ba re rata bana babo rena ke ka go hlahloba kamoo re swaraganago le maemo ao a tšwelelago bophelong. (2 Bakor. 8:8) Moapostola  Petro o boletše gore: “Godimo ga tšohle, ratanang ka lerato le le tseneletšego, gobane lerato le bipa dibe tše dintši.” (1 Pet. 4:8) Ge e ba bana babo rena ba dira diphošo goba ba dira dilo tšeo di re kwešago bohloko, seo se tlo re thuša go bona ge e ba re sa ba rata go tšwa pelong goba go se bjalo.

14. Go ya ka 1 Petro 4:​8, re hloka lerato la mohuta mang? Nea mohlala.

¹⁴ A re lebeledišišeng gabotse mantšu a Petro. Karolo ya mathomo go temana ya 8 e hlalosa mohuta wa lerato leo re swanetšego go ba le lona, e lego “lerato leo le tseneletšego.” Lentšu le Petro a le dirišitšego e le “tseneletšego,” le ra gore “otlologa.” Karolo ya bobedi e re thuša kamoo lerato leo le tlago go re thuša ka gona, le bipa dibe tša bana babo rena le dikgaetšedi. Nagana ka tafola yeo e nago le dipatso, ge o ka tšea lešela wa le ala moo tafoleng yeo, le ka se tswalele dipatso tše itšego feela eupša le tlo tswalela dipatso ka moka tšeo di lego godimo ga yona. Ka mo go swanago, ge e ba re rata bana babo rena le dikgaetšedi ka mo go tseneletšego, re ka se ba lebalele diphošo tše itšego fela, eupša re tlo “bipa dibe tše dintši.”

15. Re tlo kgona go dira’ng ge e ba re rata bana babo rena le dikgaetšedi go tšwa pelong? (Bakolose 3:13)

 ¹⁵ Ge re rata batho ba bangwe go tšwa pelong, re tlo kgona go lebalela bana babo rena le dikgaetšedi ge ba re direla diphošo le ge go ka se be bonolo go dira bjalo. (Bala Bakolose 3:13.) Ge re lebalela batho ba bangwe re ba bontšha gore re ba rata go tšwa pelong e bile re nyaka go thabiša Jehofa. Ke’ng se sengwe seo se ka re thušago gore re lebalele batho ba bangwe le gore re se ke ra kgopišwa gabonolo ke diphošo tšeo ba di dirago?

16-17. Ke eng seo se ka re thušago go lebalela batho ba bangwe diphošo tše dinyenyane? Nea mohlala. (Bona le seswantšho.)

¹⁶ Nagana ka mekgwa e mebotse ya bana beno le dikgaetšedi, e sego mafokodi a bona. Nagana ka mohlala wo. A re re o ipshina le bana babo rena le dikgaetšedi. Ka morago ga gore le dule moo le ipshine, le phetha ka gore le tšee senepe pele le kgaogana. Ge e le gabotse le tšea le dinepe tše dingwe tše pedi gore le be le tše dingwe ge e ba go ka ba le seo se ka se tšwego gabotse. Ga bjale le na le dinepe tše tharo. Eupša o lemoga gore senepeng se sengwe go na le ngwanabo rena yo mongwe yo a šošobantšego sefahlego. O tlo dira’ng ka senepe seo? O tlo se phumola ka gobane o na le dinepe tše dingwe tše pedi moo go tšona batho ka moka ba myemyelago.

¹⁷ Re ka swantšha dinepe tšeo re di tšeago le nako yeo re e fetšago re na le bana babo rena le dikgaetšedi. Gantšhi re ba le dinako tšeo di  thabišago tšeo re di thabelago le bana babo rena le dikgaetšedi. Eupša a re re ka letšatši le lengwe ngwanabo rena goba kgaetšedi o a bolela goba o dira selo se sengwe seo se sa kgahlišego. Re swanetše go dira eng? Re swanetše go lebala ka tiragalo yeo go swana le ge re phumola senepe sela sa ngwanabo rena yola a šošobantšego sefahlego. (Die. 19:11; Baef. 4:32) Re ka lebala phošo yeo e nyenyane ya ngwanabo rena goba kgaetšedi a e dirilego ka gobane re na le dilo tše dintšhi tše dibotse tšeo re gopolago a di dira ge re fetša nako re na le yena. Dinako tšeo tše dibotse ke tšona re nyakago go dula re nagana ka tšona le go di thabela.

18. Sehlogong se, ke dintlha dife tše bohlokwa tšeo re boletšego ka tšona tšeo di bolelago ka lerato?

¹⁸ Ke ka baka la’ng re nyaka go dula re ratana go tšwa pelong? Ka ge re bone, ge re bontšha bana babo rena le dikgaetšedi gore re a ba rata, re tla ba re bontšha gore re rata Jehofa. Re ka bontšha bjang badumedigotee le rena gore re a ba rata? Tsela e nngwe yeo re ka dirago seo ka yona ke ka go ba homotša. Re tlo kgona go “tšwela pele re homotšana” ge e ba re na le kwelobohloko. Re ka bontšha bjang gore re ratana go tšwa pelong? Ka go lebalela ba bangwe diphošo tša bona le ge go ka ba thata go dira bjalo.

19. Ke ka baka la’ng lehono go le bohlokwa kudu gore re ratane go tšwa pelong?

¹⁹ Ke ka baka la’ng go le bohlokwa kudu lehono gore re ratane? Petro o re nea lebaka, o re: “Bofelo bja dilo tšohle bo batametše. Ka gona, . . . ratanang ka lerato le le tseneletšego.” (1 Pet. 4: 7, 8) Re swanetše go letela’ng ge bofelo bja tshepedišo ye e kgopo ya dilo bo dutše bo batamela? Jesu o ile a botša balatedi ba gagwe gore: “Le tla ba ba hloilwego ke ditšhaba tšohle ka baka la leina la ka.” (Mat. 24:9) Re swanetše go dula re na le botee e le gore re kgone go kgotlelela ge batho ba bangwe ba re hloile. Ge e ba re rata bana babo rena le dikgaetšedi, Sathane a ka se kgone go re aroganya ka gobane lerato ke “setlemo se se phethagetšego sa botee.”—Bakol. 3:14; Bafil. 2:​1, 2.