1. Modimo o ile a matlafatša bjang bahlanka ba gagwe bao ba botegago ba mehleng ya kgale?

 LENTŠU LA MODIMO gantšhi le hlalosa banna bao bego ba na le tumelo e le ba matla. Eupša le bao ba bego ba na le matla ga se ka mehla ba bego ba ikwa e le ba matla. Ka mohlala, mabakeng a mangwe, Kgoši Dafida o be a ikwa a eme a tiile eupša ka dinako tše dingwe o be “a ferekana.” (Ps. 30:7) Le ge Simisone e be e le yo matla kudu eupša o ile a lemoga gore ka ntle le moya wa Modimo o tlo ‘hloka matla gomme a ba bjalo ka motho yo mongwe le yo mongwe.’ (Baa. 14:​5, 6; 16:17) Jehofa ke yena a neilego banna ba bao ba botegago matla.

2. Ke ka baka la’ng moapostola Paulo a boletše gore o a fokola e bile o na le matla? (2 Bakorinthe 12:​9, 10)

² Moapostola Paulo le yena o ile a lemoga gore o hloka matla ao a tšwago go Jehofa. (Bala 2 Bakorinthe 12:​9, 10.) Go no swana le rena, Paulo le yena o be a fela a babja. (Bagal. 4:​13, 14) Ka dinako tše dingwe, o be a thatafalelwa ke go dira se se lokilego. (Baroma 7:​18, 19) Le gona, ka dinako tše dingwe, o be a ikwa a tshwenyega e bile a sa swanelege. (2 Bakor. 1:​8, 9) Eupša ge Paulo a be a fokola, ke gona a bego a eba le matla. Bjang? Jehofa, o neile Paulo matla ao a bego a a hloka gore a kgone go kgotlelela mathata ao a bego a na le ona.

3. Re tlo araba dipotšišo dife sehlogong se?

³ Le rena Jehofa o holofetša gore o tla re matlafatša. (1 Pet. 5:10) Eupša re ka se letele gore re hwetše thušo yeo ntle le gore rena re dire se sengwe. Ka mohlala entšene ya koloi e ka thuša koloi gore e kgone go sepela. Eupša go nyakega gore motho yo a otlelago koloi a gate makhura gore koloi yeo e kgone go sepela. Ka mo go swanago Jehofa o ikemišeditše go re nea matla ao re a hlokago eupša re swanetše go dira se sengwe gore re holwe ke matla ao. Ke’ng seo Jehofa a re neilego sona go re matlafatša?  Gona ke’ng seo re swanetšego go se dira gore re hwetše matla ao? Re tlo hwetša dikarabo tša dipotšišo tše ka go bona kamoo Jehofa a ilego a thuša batho ba bararo ba ka Beibeleng, e lego moporofeta Jona, Maria mmago Jesu le moapostola Paulo. Re tlo bona le kamoo Jehofa a tšwelago pele a matlafatša bahlanka ba gagwe lehono.

4. Jehofa a ka re nea bjang matla?

⁴ Tsela e nngwe yeo re ka hwetšago matla go Jehofa ka yona ke ka go mo rapela. Jehofa a ka araba dithapelo tša rena ka go re nea “matla a fetago a tlwaelegilego.” (2 Bakor. 4:7) Le gona re ka hwetša matla ge re bala Beibele le go naganišiša ka seo re se balago. (Ps. 86:11) Molaetša woo Jehofa a re neago wona ka Beibeleng ke ‘o matla.’ (Baheb. 4:12) Ge o rapela Jehofa e bile o bala Lentšu la gagwe e lego Beibele o tlo hwetša matla ao o a hlokago gore o kgone go kgotlelela, o dule o thabile le go phetha kabelo e thata. A re boneng kamoo Jehofa a ilego a matlafatša moporofeta Jona ka gona.

5. Ke ka baka la’ng moporofeta Jona a be a hloka matla?

⁵ Moporofeta Jona o be a hloka matla. O ile a tšhabela kabelo e thata yeo Jehofa a bego a mo neile yona. Ka baka leo, o nyakile a loba bophelo bja gagwe ka baka la ledimo le matla le gona o ile a bea maphelo a batho bao a bego a sepela le bona ka sekepe kotsing. Ge batho bao a bego a sepela le bona ka sekepe ba be ba mo lahlela ka lewatleng, o ile a ikhwetša a le ka gare ga mpa ya hlapi. O nagana gore Jona o ile a ikwa bjang? Na o be a nagana gore o tlo hwela ka gare ga mpa ya hlapi? Na o ile a nagana ge e ba Jehofa a mo lahlile? Jona o swanetše go ba a be a tshwenyegile kudu.

6. Go ya ka Jona 2:​1, 2, 7, Jona o ile a matlafatšwa ke’ng ge a be a le ka mpeng ya hlapi?

⁶ Jona o ile a dira eng gore a be le matla ge a be a le ka moo mpeng ya hlapi? O ile a rapela. (Bala Jona 2:​1, 2, 7.) Le ge a be a se a kwa Jehofa eupša o be a kgodišegile gore Jehofa o tla theetša thapelo yeo ya gagwe ya boitsholo. Jona o ile a ba a naganišiša le ka Mangwalo. Ke ka baka la’ng re re’alo? Thapelong ya gagwe yeo e lego go Jona kgaolo 2, re bona mantšu a mantši ao a tšwelelago go Dipsalme. (Ka mohlala, bapiša Jona 2:​2, 5 le Psalme 69:1; 86:7.) Go molaleng gore Jona o be a tseba Mangwalo a gabotse. O ile a kgodišega gore Jehofa o tla mo thuša ge a be naganišiša ka Mangwalo a nakong ya ge a be a tshwenyegile. Ka morago Jehofa o ile a phološa Jona, ke moka a ikemišetša go phetha kabelo ya gagwe.—Jona 2:10–3:4.

7-8. Ngwanabo rena yo mongwe wa kua Taiwan o ile a hwetša bjang matla nakong ya ge a be a na le mathata?

⁷ Mohlala wa Jona o ka re thuša ge re lebeletšane le mathata a fapafapanego. Ka mohlala, ngwanabo rena Zhiming, b yo a tšwago Taiwan o babja kudu. Go oketša moo o lebeletšane le kganetšo e šoro ya ka lapeng ka baka la ge a ena le tumelo go Jehofa. O hwetša matla go Jehofa ka go rapela le ka go ithuta. O re: “Ka dinako tše dingwe ge mathata a tšwelela, ke ikwa ke tshwenyega kudu mo e lego gore ga ke kgone go iša maswafo fase gore ke kgone go ba le thuto ya motho ka noši.” Eupša ga a lahlele toulo. O tšwela pele ka gore: “Ke thoma ka go rapela Jehofa. Ke moka ka theetša dikopelo tša Mmušo. Ka dinako tše dingwe, ke di opelela tlasana go fihlela ke iša maswafo fase, ke moka ka thoma go ithuta.”

⁸ Thuto ya motho ka noši e ile ya thuša Zhiming ka ditsela tšeo a bego a se a di letela. Ka mohlala nakong ya ge a be a dirilwe ophareišene e kgolo, mooki o ile a tla gomme a mmotša gore o hlaela disele tše dikhwibidu tša madi, ka  gona o swanetše go tšhela madi. Bošegong bja pele ga ge Zhiming a ka dirwa ophareišene, o ile a bala ka phihlelo ya kgaetšedi yo mongwe yoo le yena a ilego a dira ophareišene e swanago. Disele tše dikhwibidu tša madi tša kgaetšedi yoo, di be di hlaela kudu go feta tša ngwanabo rena Zhiming. Lega go le bjalo, kgaetšedi yoo ga se a ka a dumela go tšhelwa madi, eupša ka morago o ile a kgona go fola. Phihlelo yeo e ile ya matlafatša Zhiming gomme ya mo thuša gore a dule a botega.

9. O ka dira’ng ge e ba mathata ao o nago le ona a dira gore o be le dipelaelo? (Bona le diswantšho)

⁹ Ge o le ka tlase ga mathata goba o gateletšegile, na o ikwa o palelwa ke go rapela Jehofa le go mmotša ka moo o ikwago ka gona? Goba na o ikwa o se na matla a go ithuta? Gopola gore Jehofa o kwešiša boemo bja gago ka mo go feletšego. Le ge o ka rapela ka mantšu a bonolo, o ka kgodišega gore Jehofa o tlo go nea se o se hlokago. (Baef. 3:20) Ge e ba bohloko bjo o bo kwago bo dira gore go be thata go bala le go ithuta, o ka theetša Beibele yeo e rekhotilwego goba wa theetša dikgatišo tšeo di theilwego Beibeleng tšeo di rekhotilwego. O ka thušwa gape le ke go theetša dikoša tša rena goba wa bogela dibidio tšeo di lego go jw.org/nso. Jehofa o nyaka go go nea matla, le gona o tlo dira bjalo ge e ba o ka mo rapela, gomme wa nyaka karabo ya thapelo ya gago ka Beibeleng le go dilo tše dingwe tšeo a re neago tšona.

10. Bana babo rena le dikgaetšedi ba re matlafatša bjang?

¹⁰ Jehofa a ka diriša bana babo rena le dikgaetšedi go re matlafatša. E ka ba bona ‘bao ba tlogago ba re matlafatša’ ge re kopana le bothata bjo itšego goba re palelwa ke go phetha kabelo e thata. (Bakol. 4:​10, 11) Re tloga re hloka bagwera “mohlang wa tlalelo.” (Die. 17:17) Ge re ikwa re imetšwe, bana babo rena le dikgaetšedi ba ka re thuša ka dilo tšeo re di hlokago tša nama, le go re thuša maikwelong le moyeng. Nagana kamoo Maria mmago Jesu a ilego a matlafatšwa ke batho ba bangwe ka gona.

11. Ke ka baka la’ng Maria a be a hloka go matlafatšwa?

¹¹ Maria o be a hloka matla gore a kgone go  dira seo Jehofa a bego a nyaka gore a se dire. Nagana kamoo a bego a ka ikwa a imetšwe ka gona ka morago ga go hwetša molaetša o boima go tšwa go morongwa Gabariele. O be a se a nyalwa eupša o be a tlo ima. O be a se na phihlelo ya go godiša bana bao e lego ba gagwe, eupša o be a swanetše go godiša ngwana wa mošemane yoo e bego e tlo ba Mesia. Ka ge a be a se a ka a robala le monna o be a tlo hlalosetša Josefa dilo tše bjang?—Luka 1:​26-33.

12. Go ya ka Luka 1:​39-45, Maria o ile a hwetša bjang matla ao a bego a a hloka?

¹² Maria o ile a hwetša kae matla ao a bego a a hloka gore a kgone go phetha kabelo ye e thata le yeo e bego e se ya tlwaelega? O ile a kgopela thušo go ba bangwe. Ka mohlala, o ile a kgopela Gabariele gore a mo hlalosetše ka mo go oketšegilego ka seo a swanetšego go se dira. (Luka 1:34) Ke moka ka morago ga moo, o ile a tšea leeto la go ya “nageng ya dithaba” ya motseng wa Juda go etela motswalo wa gagwe Elisabetha. Leeto leo le ile la mo hola kudu. Elisabetha o ile reta Maria, gomme Jehofa a diriša Elisabetha gore a bolele ka molaetša wa boporofeta wo o kgothatšago mabapi le morwa wa Maria yo a bego a mo imile. (Bala Luka 1:​39-45.) Maria o itše Jehofa “o dirile mediro e matla ka letsogo la gagwe.” (Luka 1:​46-51) Jehofa o ile a diriša Gabariele le Elisabetha go matlafatša Maria.

13. Kgaetšedi wa kua Bolivia o ile a holega bjang ka go kgopela thušo go bana babo le dikgaetšedi?

¹³ Go swana le Maria, le wena o ka matlafatšwa ke bana beno le dikgaetšedi. Kgaetšedi Dasuri wa kua Bolivia le yena o be a hloka go matlafatšwa. Dasuri o ile a tšea boikarabelo bja go hlokomela tatagwe yo a bego a babja kudu e bile a le sepetlele ka baka la bolwetši bjo bo sa folego. (1 Tim. 5:4) Ga se ka mehla go bego go le bonolo. O re, “Ka makga a mantšhi ke be ke ikwa ke palelwa.” Na o ile a kgopela thušo? Mathomong ga se a ka a kgopela batho ba bangwe gore ba mo thuše. O re: “Ke be ke sa nyake go tshwenya bana bešo le dikgaetšedi. Ke ile ka ipotša gore ‘Jehofa ke yena a ka mphago thušo yeo ke e hlokago.’ Eupša ka morago ke ile ka lemoga gore ke tla be ke ipea lekatana ge nka leka go rarolla bothata bjo ke nnoši.” (Die. 18:1) Dasuri o ile a phetha ka gore a ngwalele bagwera ba gagwe ba mmalwa gomme a ba hlalosetše ka boemo bja gagwe. “Ga ke na mantšu ao a lekanego a go hlalosa kamoo ke ilego ka matlafatšwa ka gona ke bana bešo le dikgaetšedi bao ba rategago. Ba ile ba tliša dijo kua sepetlele gomme ba abelana le nna ditemana tša Beibele tšeo di homotšago. Go tloga go thabiša go tseba gore ga re noši. Ka moka ga rena re lapa le legolo la Jehofa gomme bana babo rena le dikgaetšedi ba nyaka go re thuša e bile ba re kwela bohloko ge re lebeletšane le maemo a thata le go re kgothatša e le gore re tšwele pele re hlankela Jehofa.”

14. Ke ka baka la’ng re swanetše go amogela thušo yeo bagolo ba re neago yona?

¹⁴ Jehofa o diriša le bagolo go re nea matla. Banna ba ke dimpho tšeo Jehofa a di dirišago go re matlafatša le go re lapološa. (Jes. 32:​1, 2) Ge o ikwa o tshwenyegile, boledišana le bagolo. Ge ba go nea thušo, e amogele ka diatla tše pedi. Jehofa a ka go matlafatša a diriša banna ba.

15. Ke kholofelo efe yeo Bakriste ka moka ba e tšeelago godimo?

¹⁵ Dilo tšeo Jehofa a re holofeditšego tšona ka Beibeleng di re nea matla a gore re tšwele pele re mo hlankela. (Baroma 4:​3, 18-20) Ka ge re le Bakriste re na le kholofelo e botse ya go tlo phela ka mo go sa felego, e ka ba legodimong goba paradeiseng mo lefaseng.  Kholofelo ya rena e re nea matla gore re kgone go kgotlelela mathata ao re nago le ona, re bolele ditaba tše dibotse le go phetha dikabelo tše di fapafapanego ka mokgatlong wa Jehofa. (1 Bathes. 1:3) Yona kholofelo ye e ile ya tiiša moapostola Paulo.

16. Ke ka baka la’ng moapostola Paulo a be a hloka go matlafatšwa?

¹⁶ Paulo o be a hloka matla. O ile a ipapetša le sebjana sa letsopa lengwalong leo a le ngwaletšego Bakorinthe. O be a “gateletšwe,” a “gakantšhwa,” a “tlaišwa” e bile a “lahlelwa fase.” Ge e le gabotse, ka dinako tše dingwe bophelo bja gagwe bo be bo e ba kotsing. (2 Bakor. 4:​8-10) Paulo o ngwadile mantšu a nakong ya leeto la gagwe la boraro la boromiwa. A ka no ba a be a sa tsebe gore mathata a a gagwe ga se a tšwa a fela. Gona mo leetong le o be a sa tlo tlaišwa ke batho, a robegelwa ke sekepe, a golegwa le go išwa kgolegong.

17. Go ya ka 2 Bakorinthe 4:​16-18, ke eng seo se ilego sa matlafatša Paulo gore a kgotlelele mathata ao a bego a na le ona?

¹⁷ Paulo ile a hwetša matla ao a tlago go mo thuša go kgotlelela ka go naganišiša ka kholofelo yeo a bego a na le yona. (Bala 2 Bakorinthe 4:​16-18.) O ile a botša Bakorinthe gore le ge mmele wa gagwe o “onala” a ka se dumelele seo se mo nyamiša. O be a dula a naganišiša ka bokamoso bja gagwe, a ikemišeditše go kgotlelela maemo le ge e ka ba afe a thata ka baka la kholofelo yeo a bego a na le yona ya go phela legodimong. Paulo o ile a naganišiša ka kholofelo yeo, gomme mafelelong a “mpshafatšwa letšatši le letšatši.”

18. Tihomir le lapa la gabo ba ile ba matlafatšwa bjang ke kholofelo yeo ba nago le yona?

¹⁸ Tihomir e lego ngwanabo rena wa kua Bulgaria, o matlafatšwa ke kholofelo yeo a nago le yona ka bokamoso. Mengwaga e sego kae e fetilego ngwanabo e lego, Zdravko o ile a hlokofala ka kotsi ya sefatanaga. Ka morago ga kotsi yeo, Tihomir o ile a fetša nako e ntšhi a nyamile. Yena le lapa la gabo, ba ile ba naganišiša kamoo tsogo e tlago go ba ka gona gore ba kgone go lebeletšana le boemo bjoo. O re: “Ka mohlala, re boledišana ka gore re tlo kopana le Zdravko kae, ra mo apeela dijo tša mohuta mang, ra mema bomang moletlong woo re tla  bego re mo diretše yona, le gore re tlo mmotša eng ka matšatši a a bofelo.” Tihomir o re ge yena le lapa la gabo ba dula ba naganišiša ka kholofelo ye, se se ba thuša gore ba kgotlelele, le go dula ba letetše Jehofa gore a tle a tsoše ngwanabo.

19. O ka dira’ng gore o tiiše kholofelo yeo o nago le yona? (Bona le seswantšho)

¹⁹ O ka tiiša bjang kholofelo yeo o nago le yona? Ka mohlala, ge e ba o na le kholofelo ya go tlo phela Paradeiseng mo lefaseng, bala ka dilo tšeo Beibele e bolelago ka tšona ka Paradeise gomme o naganišiše ka tšona. (Jes. 25:8; 32:​16-18) Naganišiša ka tsela yeo bophelo bo tla bego bo le ka gona ka lefaseng le lefsa. Ipone o le moo. Na o bona bomang? O kwa medumo ya mohuta mang? O ikwa bjang? E le gore o bone seo o naganišišago ka sona se direga, bala dikgatišo tša rena tšeo di bolelago ka Paradeise goba o bogele dibidio tša mmino tše bjalo ka yeo e rego Lefase le Lefsa le Kgauswi, Paradeise e Fihlile goba ya Ipone o Phela ka Nako yeo. Ge e ba re ka ipha nako ya go dula re naganišiša ka kholofelo yeo re nago le yona, mathata ao re nago le ona e tla ba a ‘nakwana le a bohwefo.’ (2 Bakor. 4:17) Jehofa o tla go matlafatša ka kholofelo yeo a go neilego yona.

20. Re ka hwetša bjang matla le ge re ikwa re fokola?

²⁰ “Modimo o tla re nea matla” le ge re ikwa re fokola. (Ps. 108:13) Jehofa o šetše a go neile dilo tšeo o di hlokago e le gore o kgone go hwetša matla. Batamela Jehofa ka thapelo e bile o dire thuto ya motho ka noši gore a go thuše ge o phetha kabelo ya gago, ge o kopana le mathata goba gore a go thuše go dula o thabile. Amogela kgothatšo yeo o e hwetšago go bana beno le dikgaetšedi. Dula o naganišiša ka kholofelo ya gago ya bokamoso. Ke moka o tla “matlafatšwa ka matla ohle go ya ka matla a [Modimo] a letago e le gore [o] kgotlelele ka mo go tletšego ka go se fele pelo le ka lethabo.”—Bakol. 1:11.