1-2. Nea mohlala o bontšhago tsela e kaone ya go bala le go ithuta Beibele.

 A RE RE o nyaka go reka ntlo. O tlo thušwa ke’ng gore o kgone go reka ntlo ya maleba? Na e ka ba go no lebelela seswantšho sa yona? Ga go pelaelo gore go tlo nyakega gore o ye ntlong yeo ke moka o e hlahlobe pele ga ge o ka dira phetho ya ge e ba o tla e reka goba aowa. O ka ba wa kgopela le polane ya ntlo yeo gore o bone gore e agilwe bjang. Go molaleng gore o tlo nyaka go hlahloba ntlo yeo ka mo go tseneletšego pele o e reka.

² Re ka dira se se swanago ge re bala le go ithuta Beibele. Mongwadi yo mongwe o swantšha Beibele le “moago o motelele wo o agilwego godimo ga motheo wo o tiilego.” Ka gona, re ka tlwaelana bjang le seo se ngwadilwego ka gare ga Beibele? Ge e ba o e bala ka lebelo, o ka ithuta feela “dilo tša motheo tša dipolelo tše kgethwa tša Modimo.” (Baheb. 5:12) Go swana le ge o hlahloba ntlo pele o e reka, Beibele le yona o swanetše go e hlahloba gore o e kwešiše ka mo go tseneletšego. Tsela e kaone ya go ithuta Beibele, ke ka go bona kamoo dikarolo tše itšego tša molaetša wa yona di tswalanago ka yona, le go bona gore ke’ng seo o se dumelago le gore ke ka baka la’ng o dumela gore ke sa therešo.

3. Moapostola Paulo o ile a kgothaletša Bakriste gotee le yena gore ba dire’ng, gona ka baka la’ng? (Baefeso 3:​14-19)

³ Re swanetše go ithuta ditherešo tše di tseneletšego tša Beibele gore re kwešiše Lentšu la Modimo ka mo go feletšego. Moapostola Paulo o ile a kgothaletša bana babo le dikgaetšedi gore ba bale Lentšu la Modimo ka mo go tseneletšego gore ba kgone go “kwešiša ka mo go feletšego seo e lego bophara le botelele le bophagamo le go iša,” ke moka e be e tlo ba bao ba tsemilego medu le ba theilwego motheong tumelong ya bona.  (Baefeso 3:​14-19.) Le rena re swanetše go dira se swanago. A re boneng gore re ka ithuta bjang Lentšu la Modimo ka mo go tseneletšego le go le kwešiša.

4. Re ka dira’ng gore re batamele kgauswi le Jehofa? Nea mehlala.

⁴ Bjale ka Bakriste, ga re thabele feela go no ithuta dithuto tša motheo tša Beibele. Moya o mokgethwa o ka re thuša gore re kgone go ithuta “gaešita le [dilo] tše di tseneletšego tša Modimo.” (1 Bakor. 2:​9, 10) O ka ba le lenaneo la thuto ya motho ka noši leo le ka go batametšago kgauswi le Jehofa. Ka mohlala, o ka dira nyakišišo go bona gore o ile a bontšha bjang gore o rata bahlanka ba gagwe ba nakong e fetilego le kamoo seo se bontšhago gore le wena o a go rata. O ka ithuta kamoo Jehofa a bego a nyaka gore Baisiraele ba mo hlankele ka gona gomme wa bapetša seo le ka tsela yeo a nyakago rena re mo hlankela ka yona lehono. Goba mohlomongwe o ka ithuta ka mo go tseneletšego ka diporofeto tšeo Jesu a di phethagaditšego nakong ya bophelo bja gagwe le bodiredi bja gagwe bja mo lefaseng.

5. Na go na le selo seo o ka ratago go dira nyakišišo ka sona ge o dira thuto ya motho ka noši?

⁵ Batho ba bangwe bao ba ithutago ka mo go tseneletšego, ba ile ba botšišwa gore ke dilo dife tšeo ba ratago go di hlahloba ge ba ithuta Lentšu la Modimo. Tše dingwe tša dilo tšeo ba boletšego ka tšona di lepokising leo le rego “ Dilo Tšeo o ka Ithutago ka Tšona Thutong ya Motho ka Noši.” O ka thabela go ithuta ka dilo tšeo o diriša Watch Tower Publications Index goba puku ya Tlhahlo ya go Dira Nyakišišo ya Dihlatse tša Jehofa. Go ithuta Beibele ka mo go tseneletšego go ka tiiša tumelo ya gago le go go thuša “go ba le tsebo ka ga Modimo.” (Die. 2:​4, 5) Ga bjale a re boneng ditherešo tša Beibele tšeo re ka ithutago ka tšona ka mo go tseneletšego.

6. (a) Leano le morero di fapana bjang? (b) Ke ka baka la’ng re ka re morero wa Modimo ka batho ke wa “neng le neng”? (Baefeso 3:11)

⁶ Ka mohlala, naganišiša ka seo Beibele e se bolelago ka morero wa Modimo. Go na le  phapano magareng ga go ba le leano le go ba le morero. Leano le ka swantšhwa le go kgetha tsela yeo e tlago go go fihliša moo o nyakago go ya gona. Eupša ge go ka ba le ditšhitišo tseleng yeo o e kgethilego, o ka no se fihle moo o nyakago go ya gona. Ka lehlakoreng le lengwe, re ka swantšha morero le lefelo leo o nyakago go fihla go lona. Ka ge o tseba lefelo leo o nyakago go fihla go lona, o ka diriša ditsela tše di fapafapanego gore o fihle moo. Ge e ba tsela yeo o sepelago ka yona e na le mathata, o ka tšea tsela e nngwe. Ka mo go swanago, ganyenyane-ganyenyane, Jehofa o be a dutše a utolla ‘morero wa gagwe wa neng le neng’ ka Beibeleng. Jehofa a ka kgona go diriša ditsela tše di fapafapanego ka gobane “o dirile dilo tšohle a na le morero.” (Die 16:4) Mafelelong, dilo tše Jehofa a di dirago di tlo dula di le gona ka mo go sa felego. Morero wa Jehofa ke’ng, gona o ile a swanelwa ke go dira diphetogo dife gore a kgone go o phethagatša?

7. Modimo o ile a dira’ng gore a tle a kgone go phethagatša morero wa gagwe ka morago gore batho ba mathomo ba rabele? (Mateo 25:34)

⁷ Modimo o ile a botša batho ba mathomo ka seo a bego a se rerile ka bona. O ba boditše gore: “Ebang le bana ba bantši le tlale lefase le be le le hlokomele, le hlokomele le . . . diphedi ka moka tše di gagabago lefaseng.” (Gen. 1:28) Morero wa Modimo ga se wa ka wa fetoga ka morago ga gore Adama le Efa ba rabele gomme sebe se tsene lefaseng. O ile a fetoša feela tsela yeo morero wa gagwe o tla phethagalago ka yona. Ka nako yeo, o ile a ikemišetša go hloma Mmušo wa legodimong wo o bego o tla phethagatša morero wa gagwe wa mathomong ka batho le lefase. (Bala Mateo 25:34.) Ka nako ya maleba, Jehofa ka lerato o ile a romela Morwa wa gagwe yo a tswetšwego a nnoši gore a tle lefaseng a tlo ruta batho ka Mmušo wa gagwe le go neela bophelo bja gagwe gore a re lokolle sebeng le lehung. Ke moka ka morago, Jehofa o ile a tsošetša Jesu legodimong gore a buše e le Kgoši ya Mmušo wa Modimo. Eupša go na le dilo tše dintšhi tšeo re ka ithutago tšona ka mo go tseneletšego ka morero wa Modimo.

8. (a) Taba e kgolokgolo yeo go bolelwago ka yona ka Beibeleng ke efe? (b) Go ya ka Baefeso 1:​8-11, morero wa Jehofa o mogolo ke ofe? (Bona seswantšho sa letlakala la ka ntle.)

⁸ Taba e kgolokgolo yeo go bolelwago ka yona ka Beibeleng ke gore leina la Modimo le tlo kgethagatšwa ge a phethagatša morero wa gagwe ka lefase a diriša Mmušo wa gagwe wo o lego ka tlase ga Kriste. Morero wa Jehofa o ka se tsoge o fetogile. O re tshepišitše gore o tlo phethagatša selo se sengwe le se sengwe seo a se boletšego. (Jes. 46:​10, 11; Baheb. 6:​17, 18) Ka nako ya maleba, lefase le tlo dirwa paradeise, moo bana ba Adama le Efa ba tlo thabelago go ‘phela ka mo go sa felego’ ba lokile e bile ba phethagetše. (Ps. 22:26) Jehofa o sa na le morero o mongwe o mogolo go feta woo. Morero wa gagwe o mogolo ke go dira gore bahlanka ba gagwe ka moka ba legodimong le ba lefaseng ba be le botee. Ke moka batho ka moka ba tlo ikokobeletša yena gore e be Mmuši wa bona. (Bala Baefeso 1:​8-11.) Na ga o thabele tsela ye e kgahlišago yeo Jehofa a phethagatšago morero wa gagwe ka yona?

9. Re ka kwešiša bjang bokamoso bja rena ge re bala Beibele?

⁹ Nagana ka boporofeta bjo Jehofa a boletšego ka bjona kua tšhemong ya Edene, bjo bo lego go Genesi 3:15. b Bo be bo bolela ka dilo tšeo di tla bontšhago go phethagala ga morero wa gagwe, eupša dilo tšeo di be di tlo direga  mengwaga e mentšhi ka morago. Ka mohlala, Modimo o ile a botša Aborahama gore yo mongwe wa ditlogolo tša gagwe e tlo ba Kriste. (Gen. 22:​15-18) Ke moka ka 33 C.E., Jesu o ile a longwa serethe go etša ge go boletšwe e sa le pele. (Dit. 3:​13-15) Tiragalo ya mafelelo ya boporofeta bjo e tlo ba ya ge Sathane a pšhatlwa hlogo, e lego seo se tlo diregago mengwaga e fetago e sekete go tloga ga bjale. (Kut. 20:​7-10) E bile Beibele e utolla dilo tše dintši tšeo di tlago go direga ge ntwa yeo e lego magareng ga tshepedišo ye ya Sathane le Mmušo wa Modimo e fihla mafelelong.

10. (a) Go tlo direga’ng kgauswinyane? (b) Re ka lokišetša bjang dipelo le menagano ya rena? (Bona mongwalo wa tlase.)

¹⁰ Nagana ka ditiragalo tše makatšago tšeo Beibele e bolelago gore di tlo direga. Sa pele, go tlo ba le kgoeletšo ya gore go na le “khutšo le polokego!” (1 Bathes. 5:​2, 3) Ke moka, ka “tšhoganetšo,” masetlapelo a magolo a tlo thoma ge ditšhaba di hlasela bodumedi ka moka bja maaka. (Kut. 17:16) Ke moka, ka morago go tlo ba le pontšho e makatšago ya ge “Morwa wa motho a etla ka maru a legodimo ka matla le letago le legolo.” (Mat. 24:30) Jesu o tlo ahlola batho ka go kgethologanya dinku go dipudi. (Mat. 25:​31-33, 46) Ka nako yeo Sathane o tla be a elwa le Jehofa. Ka ge Sathane a hloile batho ba Modimo, o tlo dira gore ditšhaba di ipope ngatana e tee, e lego seo Beibele e se bitšago gore ke Gogo wa naga ya Magogo, gore ba hlasele bahlanka ba Jehofa bao ba botegago. (Hesek. 38:​2, 10, 11) Ka nako e nngwe batlotšwa bao ba lego mo lefaseng, ba tlo kgoboketšwa gomme ba išwa legodimong gore ba kopane le Kriste le madira a gagwe a legodimong ke moka ba lwa ntweng ya Haramagedone e lego ntwa ya mafelelo ya masetlapelo a magolo. c (Mat. 24:31; Kut. 16:​14, 16) Ke moka Pušo ya Kriste ya Mengwaga e Sekete e tlo thoma.—Kut. 20:6.

11. Kholofelo ya go ba le bophelo bjo bo sa felego e bolela’ng go wena? (Bona le seswantšho)

¹¹ Ga bjale, nagana ka mo go tseneletšego ka bokamoso bja gago. Beibele e re Mmopi o “tsentše bosafelego ka dipelong tša [rena].” (Mmo. 3:11) Nagana gore seo se bolela’ng ka segwera sa gago le Jehofa. Puku ya Batamela  Kgaufsi le Jehofa, go letlakala 319, e bolela taba e kgahlišago ya gore: “Ka morago ga go phela nywaga e makgolo, e dimilione gaešita le e dimilione tše dikete, re tla ba re tseba kudu ka Jehofa Modimo go feta gona bjale. Eupša re tla ba re sa dutše re ikwa gore go sa na le dilo tše dingwe tše di makatšago tše di sa balegego tšeo go ka ithutwago tšona. . . . bophelo bjo bo sa felego e tla ba bjo bo nago le morero ka mo go humilego le bjo bo tletšego dilo tše di fapafapanego gomme go batamela kgaufsi le Jehofa ka mehla, e tla ba karolo ya bjona e putsago kudu.” Ga bjale ke’ng se sengwe seo re ka se dirago ka mo go tseneletšego ge re dutše re ithuta Lentšu la Modimo?

12. Nea mohlala wo o bontšhago ka mo re ka lebelelago ka gona godimo magodimong.

¹² Lentšu la Modimo le re utollela ganyenyane gore moo go phagamego, e lego moo Jehofa a lego gona go bjang. (Jes. 33:5) Beibele e re utolletše dilo tše di kgahlišago ka Jehofa le ka karolo ya mokgatlo wa gagwe wa legodimong. (Jes. 6:​1-4; Dan. 7:​9, 10; Kut. 4:​1-6) Ka mohlala, re ka bala ka dilo tše di makatšago tšeo Hesekiele a di bonego ge “magodimo a bulega gomme [a] bona dipono tša Modimo.”—Hesek. 1:1.

13. Go ya ka ge go hlaloswa go Baheberu 4:​14-16, o ikwa bjang ka karolo yeo Jesu a e bapalago magodimong?

¹³ Nagana le ka seo Jesu a re direlago sona kua legodimong bjale ka Kgoši ya rena e bušago le Moperesia yo a Phagamego yo a nago le kwelobohloko. Ka yena re kgona go “[batamela] sedulong sa bogoši sa botho bjo bogolo bja Modimo ka tokologo ya polelo, gore re hwetše kgaugelo gotee le botho bjoo e le gore re thušwe ka nako e swanetšego.” (Bala Baheberu 4:​14-16.) Eka letšatši le lengwe le le lengwe re ka naganišiša ka dilo tšeo Jehofa le Jesu ba re diretšego tšona le tšeo ba re direlago tšona ba le legodimong. Tsela yeo ba re ratago ka yona  e swanetše go kgoma dipelo tša rena le go re dira gore re hlankele Jehofa le go bolela ditaba tše dibotse ka mafolofolo.—2 Bakor. 5:​14, 15.

14. Ke selo sefe se sebotse seo re ka se dirago go bontšha gore re leboga Jehofa le Jesu? (Bona le diswantšho.)

¹⁴ E nngwe ya ditsela tše kaone yeo re ka bontšhago ka yona gore re leboga Modimo le Morwa wa gagwe ka dilo tšeo ba re direlago tšona, ke ka go thuša batho ba bangwe gore le bona e be Dihlatse tša Jehofa le gore e be balatedi ba Jesu. (Mat. 28:​19, 20) Moapostola Paulo le yena o ile a dira se swanago go bontšha gore o leboga Modimo le Kriste. O be a tseba gore thato ya Jehofa ke gore “mehuta yohle ya batho e phološwe gomme e fihle tsebong e nepagetšego ya therešo.” (1 Tim. 2:​3, 4) O ile a šoma ka thata bodireding gore a thuše batho ba bantšhi ka mo a ka kgonago ka gona le gore “ka mešego fela a phološe ba bangwe.”—1 Bakor. 9:​22, 23.

15. Go ya ka Psalme 1:​2, ke’ng seo se ka dirago gore re thabe?

¹⁵ Mongwadi wa Psalme ya mathomo o hlalositše gore motho yo a thabilego le yo a atlegilego ke yo a “kgahlwago ke molao wa Jehofa” le go “naganišiša ka ona mosegare le bošego.” (Ps. 1:​1-3.) Mofetoledi yo mongwe wa Beibele yo a bitšwago Joseph Rotherham, o ngwadile ka pukung ya gagwe ya Studies in the Psalms, gore motho wa mohuta woo “ke yo a nyakago Lentšu la Modimo gomme a ithuta lona, a fetša nako e ntšhi a naganišiša ka lona le go latela tlhahlo yeo e lego ka go lona.” O okeditše ka gore “ge letšatši le ka feta motho yoo a se a bala Beibele, o bona a lahlegetšwe kudu.” O ka thabela go ithuta Beibele ka go naganišiša ka dilo tše dintšhi tša bohlokwa tšeo e bolelago ka tšona le go bona kamoo di tswalanago ka gona. Go tloga go thabiša kudu go ithuta ka mo go tseneletšego ka Lentšu la Modimo!

16. Re tlo boledišana ka’ng sehlogong seo se latelago?

¹⁶ Ditherešo tše bohlokwa tšeo Jehofa a re rutago tšona ka Lentšung la gagwe, ga go thata gore re ka di kwešiša. Sehlogong se se latelago, re tlo boledišana ka e nngwe ya ditherešo tše di tseneletšego, e lego tempele ya Jehofa e kgolo ya moya yeo Paulo a boletšego ka yona lengwalong leo a le ngwaletšego Bakriste ba Baheberu. Eka o ka thabela go ithuta ka sehlogo seo.