MOLAO WA MOTHEO WA BEIBELE: “Aparang lerato gobane ke setlemo se se phethagetšego sa botee.”—Bakolose 3:14.

MEHOLA: Gantši lerato leo go bolelwago ka lona ka Beibeleng ga se lerato la monna le mosadi goba la maikwelo a thobalano. Go e na le moo, ke lerato leo le theilwego melaong ya motheo leo le hlaolwago ka dika tše bjalo ka lešoko, go lebalela, boikokobetšo, go botega, botho, boleta le go se fele pelo. (Mika 6:8; Bakolose 3:12, 13) Ka go se swane le go tšeega maikwelong, moo go felago ge nako e dutše e eya, lerato le ka kgona go tšwela pele le gola ka mo go sa felego.

Brenda, yo a nago le nywaga e ka bago e 30 a le lenyalong o re: “Lerato leo banyalani ba bafsa ba ratanago ka lona ga se selo ge le bapetšwa le lerato leo banyalani ba kgale ba ratanago ka lona.”

Sam, e lego monna yo a bilego lenyalong ka nywaga e fetago e 12 o itše: “Ka mehla nna le mosadi wa ka re thabišwa le go makatšwa ke tsela yeo keletšo ya Beibele e lego e šomago le kamoo e lego e bonolo ka gona! Ge o e diriša, dilo di go sepelela gabotse. Eupša le ge ke nyaka go e diriša ka mehla, ka dinako tše dingwe ke ile ka palelwa, go etša ge ke be ke ikwa ke tshwenyegile, ke na le boithati goba ke lapile. Maemong a bjalo ke kgopela Jehofa gore a nthuše go phema maikwelo a fošagetšego. Ke moka ka gokarela mosadi wa ka, gomme gwa ba bjalo ka ge eka ga se gwa direga selo se se nyamišago!”

Jesu Kriste o itše “bohlale bo hlatselwa ka mediro ya bjona.” (Mateo 11:19) Ka gona Beibele e na le bohlale ka moka bja kgonthe. Dithuto le ditekanyetšo tša yona di a šoma. Ga di fetwe ke nako. Di phala setšo le botšhaba. Le gona di nea motho temogo e tseneletšego le go hlatsela gore di tšwa Mothopong o phagamego—Mmopi wa rena Jehofa Modimo. Seo se hlatselwa ke ge di dirišwa. Ke ka baka leo Beibele e re laletšago ka gore: “Latswang le be le boneng gore Jehofa o lokile.” (Psalme 34:8) Na o tla amogela taletšo yeo?