LE GE go huma go ka ba le mehola e itšego, gape go ka tliša mathata, kudukudu dinakong tšeo re phelago go tšona tše kotsi. (2 Timotheo 3:1-5) Dinageng tše dingwe, bahumi, go akaretša le baeti bao ba bonagalago ba humile, ba fetogile bahlaselwa ba mahodu le ba bathopi bao ba nyakago tšhelete.

Pego ya ditaba e begile mabapi le naga e nngwe e hlabologilego gore: “Bohlakodi bjo šoro, go hlalefetša le go thopa batho di dira gore bahumi le badiidi e be manaba. Mabenkeleng a go jela go na le bahlapetši bao ba itlhamilego; magaeng a bahumi go na le maboto a go ba le diterata tša go hlaba, mabone a go bonega kudu, dikhamera le bahlapetši.” Go direga se se swanago le dinageng tše dingwe tše dintši.

Lega go le bjalo, Beibele e re: “Modiidi ga a hwetše kgalemelo [goba ga a boife].” O ka holwa bjang ke bohlale bja mohuta wo? Ge e ba o dula lefelong leo le tumilego ka bokebekwa le bošoro goba ge e ba o swanetše go etela lefelong le bjalo, o se ke wa dira gore o bonale eka o humile. Nagana ka kelohloko ka seo o se apara le go se swara mafelong a batho bohle, kudukudu ge e ba dilo tša gago di tla bonwa ke batho. Diema 22:3 e re: “Yo bohlale ke yo a bonego kotsi a ikuta, eupša ba se nago temogo ba fetile ba wela kotsing.”

Bohlale bjoo bo begilwego ka Beibeleng bo bontšha gore Mmopi wa rena o na le taba le rena. O nyaka gore re šireletšege. Mmoledi 7:12 e re: “Bohlale bo a šireletša . . . bo phediša bao ba nago le bjona.”