Dikgweding tša pele tše senyane tša ngwaga wa 2013, palo ya tlhalo kua Beijing e ile ya hlatlogela go 41 lekgolong ge e bapetšwa le ya ngwaga wa 2012. Ditsebi di dumela gore koketšego yeo e ka ba e bakilwe ke banyalani bao ba bego ba leka go phema 20 lekgolong ya motšhelo woo o sa tšwago go thongwa go lefša dithekišong tša dintlo. Ka tlase ga maemo a itšego banyalani bao ba hlalanego ba fokoletšwa motšhelo ge ba rekiša ntlo ya bobedi.

Mokgatlo wa Ditšhaba tše Kopanego o šišintše gore go na le kgonagalo ya gore batho ba bantši ba je dikhunkhwane e le tsela ya go lwantšha phepompe. Pego e nngwe e sa tšwa go hlalosa gore ka ge dikhunkhwane di na le phepo e bile di eja dilo tšeo di sa jewego ke batho, dikhunkhwane tšeo di jewago “di ka tšewa e le mohuta o mongwe wa nama.” Lega go le bjalo, pego yeo e lemogile gore “ditšhaba tše dingwe ga di rate tatso ya [dikhunkhwane].”

Dikliniki tša go thuša go belega di lebeletšane le bothata bja tša molao le bja go se tsebe gore di dire’ng ka mae a batho a nontšhitšwego ao a kgahlišitšwego ao bao go thwego ke beng ba ona ba sa hwetšagalego. Kliniki e nngwe e begile gore e sa bolokile mae a nontšhitšwego ka ntle ga mmele a 1 000 ao balwetši ba ona go thwego ga ba hwetšagale.

Makatholika ao a nyalanago kua Ireland a be a swanetše go kgetha magareng ga lenyalo la tirelo ya bodumedi goba ya semmušo go fihla ka 2013, eupša ga bjale a ka kgetha ge e ba a nyaka tirelo ya manyalo yeo e dirwago ke sehlopha sa dikgahlego tša batho. Go ya ka pego ya ditaba ya Reuters, “dikgopelo tša batho bao ba sa kgotsofalelego lenyalo la semmušo ofising ya go ingwadiša eupša ba sa nyake tirelo ya bodumedi di bakile mošomo o montši” go bao ba fanago ka tirelo yeo e mpsha.