Pono ya Beibele

Na Modimo o Thekga Dintwa Lehono?

KGOŠI DAFIDA wa Isiraele ya bogologolo o boletše ka tema yeo a e kgathilego e le mohlabani gore: “[Modimo] o ruta diatla tša ka ntwa, matsogo a ka a kobile bora bja koporo.”—Psalme 18:34.

Moapostola Paulo o ngwadile ka Bakriste gore: “Le ge re sepela nameng ga re lwe go ya ka seo re lego sona nameng. Gobane dibetša tša ntwa ya rena ga se tša nama.”—2 Bakorinthe 10:3, 4.

Na ditemana tše di a ganetšana? Goba na go na le mabaka a kwagalago ao a dirilego gore Modimo a dumelele Baisiraele ba bogologolo go ya dintweng eupša a se dumelele Bakriste go dira bjalo? Na pono ya Modimo ka dintwa e fetogile? Dikarabo di kwagala kudu ge re ahlaahla dilo tše tharo tšeo di dirago gore go be le phapano magareng ga Baisiraele le phuthego ya Bakriste ba therešo.

Dilo tše Tharo tše di Dirago Gore go be le Phapano

1. Isiraele ya bogologolo e be le setšhaba seo se nago le lefelo leo se le neilwego ke Modimo e bile e be e dikologilwe ke baagišani bao gantši ba bego ba na le lehloyo. Ka baka leo, Modimo o ile a laela batho ba gagwe gore ba šireletše naga ya bona, a ba a dira gore ba fenye manaba a bona. (Baahlodi 11:32, 33) Ka lehlakoreng le lengwe, phuthego ya Bokriste ga se setšhaba seo se dulago nageng e tee e bile ditho tša yona di ka hwetšwa dinageng ka moka. Ka gona, ge nkabe balatedi ba Kriste ba nageng e nngwe ba be ba ka kgatha tema dintweng kgahlanong le dinaga tše dingwe, ba be ba tla ba ba lwantšhana le badumedigotee le bona—bana babo bona le dikgaetšedi tša moya—bao ba laelwago gore ba ba rate gaešita le go ba hwela.—Mateo 5:44; Johane 15:12, 13.

2. Isiraele ya bogologolo e be e na le kgoši ya motho yeo sedulo sa yona sa bogoši se bego se le kua Jerusalema. Lega go le bjalo, Bakriste ba therešo ba bušwa ke Jesu Kriste, yoo ga bjale e lego sebopiwa sa moya se matla gomme sedulo sa gagwe sa bogoši se kua legodimong. (Daniele 7:13, 14) Jesu ka boyena o itše: “Mmušo wa ka ga se karolo ya lefase le. Ge nkabe mmušo wa ka e be e le karolo ya lefase le, bahlanka ba ka ba ka be ba lwela gore ke se ke ka gafelwa Bajuda. Eupša ka mo go lego ka gona, mmušo wa ka ga o tšwe mono.” (Johane 18:36) Ka gona, ga go na pušo ya dipolitiki mo lefaseng yeo e ka ipolelago gore ke ya Kriste. Se se kgoma “bahlanka” goba balatedi ba Jesu ka tsela efe? Ntlha ya boraro e a hlalosa.

3. Isiraele ya bogologolo, go swana le ditšhaba tše dingwe, gantši e be e roma baemedi, goba bao lehono re ka ba bitšago batseta goba baboleledi. (2 Dikgoši 18:13-15; Luka 19:12-14) Kriste o dirile se se swanago, eupša ka ditsela tše pedi tše di fapanego kudu le tša kgale. Ya pele, balatedi ba gagwe ka moka ba hlankela e le batseta goba baboleledi. Ka baka leo, moapostola Paulo o be a ka ngwala legatong la Bakristegotee le yena gore: “Ka gona, re batseta bao ba emetšego Kriste legato.” (2 Bakorinthe 5:20) Ka ge e le batseta ba khutšo, ga se ba ka ba diriša dibetša. Ya bobedi, balatedi ba Jesu ba boledišana le batho ka moka bao ba theetšago molaetša wa bona. Jesu o itše: “Ditaba tše tše dibotse tša Mmušo di tla bolelwa lefaseng ka moka gore e be bohlatse go ditšhaba tšohle.” (Mateo 24:14) O ile a ba a re: “Ka gona, eyang le dire batho ba ditšhaba ka moka barutiwa, . . . le ba ruta go boloka dilo tšohle tšeo ke le laetšego tšona.”—Mateo 28:19, 20.

Ka maswabi, ga se ka mehla bahlanka ba Kriste ba amogelwago ka borutho. Ka lebaka le, Paulo o ile a ngwalela moebangedi wa Mokriste e lego Timotheo gore: “Eba le kabelo go hlokofatšweng ke tlaišego o le mohlabani yo mobotse wa Kriste Jesu.” (2 Timotheo 2:3) Ke therešo gore dibetša tša Timotheo e be e le tša moya e bile di be di akaretša Lentšu la Modimo le le ngwadilwego,  leo le bitšwago “tšhoša ya moya.”—Baefeso 6:11-17.

Ke ka Baka La’ng go Dirilwe Diphetogo go Tloga go Isiraele go ya go Phuthego ya Bokriste?

Mo e ka bago ka nywaga e 1 500, setšhaba sa Isiraele se be se na le tswalano e kgethegilego le Modimo, yeo e bego e theilwe kgweranong, goba tumelelanong. (Ekisodo 19:5) Kgwerano yeo, yeo mmoelanyi wa yona e bego e le Moshe, e be e akaretša Melao e Lesome le melawana e mengwe, yeo ka moka e bego e godiša borapedi bja therešo le ditekanyetšo tše di phagamego tša boitshwaro. (Ekisodo 19:3, 7, 9; 20:1-17) Lega go le bjalo, se se nyamišago ke gore Baisiraele e le setšhaba ba ile ba se botegele Modimo, go fihla bokgoleng bja go bolaya baporofeta ba gagwe.—2 Dikoronika 36:15, 16; Luka 11:47, 48.

Mafelelong, Jehofa o ile a romela Morwa wa gagwe, Jesu Kriste, yo a ilego a belegwa e le Mojuda. Go e na le gore setšhaba sa Bajuda se mo amogele e le Mesia, se ile sa mo gana. Ka baka leo, Modimo o ile a fediša kgwerano yeo a bilego le yona le Baisiraele ka nako e telele gomme gwa phušolwa leboto la seswantšhetšo leo le bego le aroganya Bajuda le bao e sego Bajuda. * (Baefeso 2:13-18; Bakolose 2:14) Mo e ka bago ka yona nako yeo, Modimo o ile a thea phuthego ya Bokriste, a kgetha Jesu gore e be Hlogo ya yona. Go oketša moo, pele ga ge lekgolo la pele la nywaga le ka fihla bofelong, ruri phuthego yeo e ile ya bopša ke ditšhaba tše dintši. Moapostola wa Mojuda e lego Petro o itše: “Setšhabeng se sengwe le se sengwe motho yo a [boifago Modimo] gomme a dira se se lokilego o a amogelega go yena.”—Ditiro 10:35.

Dihlatse tša Jehofa di leka go latela mohlala wa Bakriste ba pele. Ka baka leo, Dihlatse di tsebja ka bodiredi bja tšona bja phatlalatša le boemagare bja tšona ditabeng tša dipolitiki le dintweng tša lefase. (Mateo 26:52; Ditiro 5:42) Ee, ga di dumelele selo se di šitiša go tsebatša ditaba tše dibotse tša Mmušo wa Modimo, e lego yona feela pušo yeo e tla fedišago bobe le go tliša khutšo ya sa ruri lefaseng. Moapostola Paulo o be a naganne ka kholofelo yeo e bohlokwa ge a be a ngwala gore: “Re le baemedi ba Kriste re a kgopela re re: ‘Boelanang le Modimo.’” (2 Bakorinthe 5:20) Mantšu ao a akgofile kudu le go feta lehono, ka ge re batamela mafelelong a ‘mehla ya bofelo’ ya lefase le kgopo la gona bjale.—2 Timotheo 3:1-5.

[Mongwalo wa ka tlase]

NA O KILE WA IPOTŠIŠA?

● Ke seka sefe se segolo seo Bakriste ba swanetšego go bontšhana sona?—Johane 13:34, 35.

● Selo seo go ka thwego ke sebetša se segolo sa Mokriste ke sefe?—Baefeso 6:17.

● Baemedi ba Kriste ba tsebatša molaetša ofe o bohlokwa?—Mateo 24:14; 2 Bakorinthe 5:20.

[Seswantšho go letlakala 15]

Dihlatse tša Jehofa di bopa borwarre bja ditšhaba tše di fapafapanego e bile di kgomarela boemagare dintweng tša ditšhaba