Pono ya Beibele

Na Thutamahlale le Beibele di a Dumelelana

“Go ba bohlokwa ga modiro wa ka wa tša thutamahlale le lethabo la ka go wona di tla ka sewelo dinakong tšeo ke bago le kwešišo ka selo se itšego se sefsa gomme ke ipotša gore: ‘Go ra gore ke kamoo Modimo a se dirilego ka gona.’”—HENRY SCHAEFER, MOPROFESARA WA DIKHEMIKHALE.

THUTAMAHLALE e dira mo gontši go re thuša go kwešiša tlholo, go utolla tekanyo e itšego ya thulaganyo, go nepagala le go raragana mo go bontšhago batho ba bantši, gore Modimo o na le bohlale bjo bo ka se lekanywego gotee le matla. Go ya ka pono ya bona, thutamahlale ga e utolle feela ditaba tša mabapi le tlholo eupša gape e utolla dibopego tša tsela yeo Modimo a naganago ka yona.

Pono yeo e thekgwa ke ditemana tše dintši tša Beibele. Baroma 1:20 e re: “Dika tša [Modimo] tše di sa bonagalego di bonwa gabotse go tloga tlholong ya lefase go ya pele, gobane di hlathwa ka dilo tšeo di dirilwego, ke gore matla a gagwe a neng le neng le Bomodimo bja gagwe.” Ka mo go swanago, Psalme 19:1, 2 e re: “Magodimo a bolela ka letago la Modimo; gomme mediro ya diatla tša gagwe e tsebatšwa ke sebakabaka. Letšatši le lengwe le le lengwe le bakela gore go be le seo se bolelwago, bošego bjo bongwe le bjo bongwe bo bonagatša tsebo.” Lega go le bjalo, go sa šetšwe go makatša ga yona, tlholo e fo ba e utolla dika tše dingwe tša Mmopi wa rena.

Moo Thutamahlale e Lekanyeditšwego

Thutamahlale ga e kgone go hlalosa ditherešo tše dintši tša mabapi le Modimo. Ka mohlala, rathutamahlale a ka kgona go hlalosa molekule o mongwe le o mongwe ka gare ga khekhe ya tšhokolete, eupša na tshekatsheko ya gagwe e tla utolla lebaka leo ka lona khekhe yeo e ilego ya pakwa goba gore e paketšwe mang? Go hwetša dikarabo tša dipotšišo tše bjalo—tšeo batho ba bantši ba ka di lebelelago e le tše bohlokwa kudu—rathutamahlale o swanetše go botšiša motho yo a pakilego khekhe yeo.

Ka mo go swanago, rathutamahlale wa Austria le yo a kilego a thopa sefoka sa Nobel e lego Erwin Schrödinger o ngwadile gore thutamahlale “e nea tsebišo e ntši yeo e nago le mabaka a kwagalago, eupša ga e utolle selo ka dilo tšohle . . . tše di lego bohlokwa kudu go rena.” O re se se akaretša “Modimo le bosafelego.” Ka mohlala, ke Modimo feela yo a ka arabago dipotšišo tše bjalo ka tše di latelago: Ke ka baka la’ng go ena le legohle? Ke ka baka la’ng polanete ya rena e ena le diphedi tše dintši, go akaretša le tše bohlale? Ge e ba Modimo ruri e le Ramatlaohle, ke ka baka la’ng a dumelela bobe le tlaišego? Le gona na go na le kholofelo ka bao ba hwilego?

Na Modimo o arabile dipotšišo tšeo? Ee, Beibele e na le dikarabo tša dipotšišo tšeo. (2 Timotheo 3:16) O ka botšiša gore: ‘Eupša nka kgonthišega bjang gore Beibele ruri e tšwa go Modimo?’ Go ya ka pono ya thutamahlale, seo Beibele e se bolelago mabapi le tlholo yeo e re dikologilego se swanetše go dumelelana le therešo ya tša thutamahlale, ka gobane Modimo ga a ikganetše. Na Beibele e bontšha go dumelelana mo go bjalo? Ela hloko mehlala e sego kae.

Pele di ka Utollwa ke Thutamahlale

Ge Beibele e be e ngwalwa, batho ba bantši ba be ba dumela gore medimo ya go fapafapana e be e dula lefaseng le gore medimo yeo, e sego melao ya tlhago, e be e laola letšatši, ngwedi, boemo bja leratadima, monono, bjalobjalo. Eupša baporofeta ba Baheberu ba bogologolo ba Modimo ba be ba sa dumele seo. Ke therešo gore ba be ba tseba gore Jehofa Modimo o be a ka laola tlholo ka go lebanya le gore o ile a dira bjalo mabakeng a itšego. (Joshua 10:12-14; 2 Dikgoši 20:9-11) Lega go le bjalo,  John Lennox, moprofesara wa dipalo wa Yunibesithing ya Oxford, Engelane, o boletše gore baporofeta bao “ga se ba ka ba swanelwa ke go kgaotša go dumela gore legohle le be le laolwa ke medimo [medimo ya dinonwane] . . . , ka baka la gore ba be ba sa ka ba dumela go medimo le go tloga mathomong. Seo se ba phološitšego tumelakhweleng e bjalo e be e le go dumela ga bona go Modimo o Tee wa Therešo, Mmopi wa legodimo le lefase.”

Tumelo yeo e ba šireleditše bjang tumelakhweleng? Lebaka le lengwe ke gore Modimo wa therešo o be a ba utolletše gore o be a buša legohle ka melao e lebanyago. Ka mohlala, nywageng ya ka godimo ga e 3 500 e fetilego, Jehofa Modimo o ile a botšiša mohlanka wa gagwe Jobo gore: “Na o tseba melao ya magodimo?” (Jobo 38:33) Lekgolong la bošupa la nywaga B.C.E., moporofeta Jeremia o ile a ngwala mabapi le “melao ya legodimo le lefase.”—Jeremia 33:25.

Ka go re’alo, bohle bao ba bego ba phela mehleng ya bogologolo gomme ba dumela dingwalweng tša baporofeta ba Beibele ba be ba ka tseba gore legohle le be le sa bušwe ke medimo ya dinonwane le yeo e fetofetogago eupša le be le beetšwe melao e kwagalago. Ka baka leo, batho ba bao ba bego ba boifa Modimo ga se ba ka ba khunamela dilo tšeo di hlodilwego, tše bjalo ka letšatši, ngwedi goba dinaledi, e bile ba be ba se na pono ya ditumelakhwele ka tšona. (Doiteronomio 4:15-19) Go e na le moo, ba be ba lebelela mediro ya Modimo e le dilo tšeo ba ka ithutago ka tšona tšeo di utollago bohlale bja gagwe, matla le dika tše dingwe tša gagwe.—Psalme 8:3-9; Diema 3:19, 20.

Ka go dumelelana le dipono tša borathutamahlale ba bantši lehono, Baheberu ba bogologolo gape ba be ba dumela gore legohle le bile le mathomo. Genesi 1:1 e re: “Mathomong Modimo o hlodile magodimo le lefase.” Gape, mo e ka bago nywaga e 3 500 e fetilego, Modimo o ile a utollela mohlanka wa gagwe Jobo gore lefase le ‘fegilwe lefeeleng,’ goba le fo ba sebakabakeng. (Jobo 26:7) Sa mafelelo, mo e ka bago nywaga ya ka godimo ga e 2 500 e fetilego, moporofeta Jesaya o ngwadile gore lefase ke ntikodiko goba nkgokolo.—Jesaya 40:22. *

Ee, Beibele e dumelelana le ditherešo tša thutamahlale tša mabapi le tlholo. Ge e le gabotse, Beibele le thutamahlale ga di fo dumelelana feela—di tlatšana ka tsela e kgahlišago. Go tšeela e nngwe ya tšona fase go swana le go tswalela mojako wo o lebišago tsebong ya go tseba Modimo.—Psalme 119:105; Jesaya 40:26.

[Mongwalo wa tlase]

NA O KILE WA IPOTŠIŠA?

● Tlholo e ka re botša eng ka Modimo?—Baroma 1:20.

● Ke ditherešo dife tša mabapi le Modimo tšeo thutamahlale e sa kgonego go di hlalosa?—2 Timotheo 3:16.

● Ke ka baka la’ng baporofeta ba bogologolo ba Modimo wa therešo ba be ba se na dipono tša ditumelakhwele ka tlholo?—Jeremia 33:25.

[Ntlhakgolo go letlakala 25]

Legohle le bušwa ka melao e lebanyago—“melao ya legodimo le lefase.”—JEREMIA 33:25