Mogato 1

Nyakang Keletšo e Botse

Ke ka baka la’ng le swanetše go gata mogato wo? Ge batswadi ba thoma go kuka lesea le le sa tšwago go belegwa ka lekga la mathomo, ba ka ikwa kapejana ba e-na le maikwelo a ganetšanago. Brett, tate yo a dulago Brithania o re: “Ke ile ka thaba kudu le go makala. Eupša ke ile ka ba gape le maikwelo a boifišago a boikarabelo gomme ka ikwa gore ke be ke sa itokišetša mošomo wo.” Monica, mma yo a dulago Argentina o re: “Ke be ke ipotšiša ge e ba ke tla kgona go hlokomela dinyakwa tša morwedi wa-ka. Ke be ke ipotšiša gore, ‘Na ke tla kgona go mo ruta gore e be motho yo mogolo yo a nago le boikarabelo?’”

Na o kwešiša lethabo le poifo tšeo batswadi ba ba nago le tšona? Ka kgonthe, go godiša ngwana ke mošomo o mongwe wo o lapišago kudu eupša e le o kgotsofatšago, o ferekanyago eupša e le o kgotsofatšago wo motho le ge e le ofe a ka lekago go o dira. Go etša ge tate yo mongwe a boletše, “o godiša ngwana wa gago gatee feela.” Ka baka la tutuetšo e kgolo yeo batswadi ba nago le yona bophelong le lethabong la bana ba bona, o ka ikwa o tloga o nyaka keletšo ya kamoo o ka bago motswadi yo mokaone.

Tlhohlo: Go bonagala yo mongwe le yo mongwe a e-na le keletšo ya kamoo go ka godišwago bana ka gona. Nakong e fetilego, banyalani bao ba sa tšwago go ba le ngwana ba be ba holofela mohlala wa batswadi ba bona goba tumelo ya bodumedi gore e ba hlahle. Eupša dinageng tše dintši, thulaganyo ya lapa e a phuhlama gomme bodumedi bo lahlegetšwe ke tutuetšo ya bjona. Ka gona, batswadi ba bantši ba retologela go ditsebi tša go godiša bana bakeng sa go hwetša keletšo. Keletšo e nngwe ya ditsebi tše e theilwe molaong wa motheo wo o kwagalago. Mabakeng a mangwe, keletšo ya ditsebi tše e ka ikganetša gomme ya lebelelwa kapejana e le ye e feletšwego ke nako.

Tharollo: Tsoma keletšo ya Motho a nnoši yo a tsebago kudu ka go godiša bana—Mmopi wa bophelo bja motho, Jehofa Modimo. (Ditiro 17:26-28) Lentšu la gagwe e lego Beibele le na le tlhahlo e lebanyago gotee le keletšo le mehlala ye e šomago yeo e ka go thušago go ba motswadi yo mokaone. O holofetša gore: “Ke tlo . . . Xo eletša mahlô a-ka à Xo ukametše.”—Psalme 32:8.

Ke keletšo efe yeo Modimo a e neago batswadi ye e ka ba thušago gore ba godiše bana ba ba thabilego?

[Mantšu a ipiletšago a tsopotšwego go letlakala 3]

“Bôʹta Modimo ka pelo ka moka; O se ké wa ithêkxa ka xo fo re: Ke n’e thlaloxanyô.”—Diema 3:5