“Dinako tša Dijo di re Dira Gore re Tlwaelane”

NA LAPA la gago le ja le le gotee bonyenyane gatee ka letšatši? Ka manyami, lefaseng la lehono la leema-ema, go ja go fetogile selo seo se dirwago ka sewelo le seo motho a se dirago ka nako yeo a ratago ka malapeng a mantši. Lega go le bjalo, go e na le go fo kgotsofatša senyakwa sa mmele, go ja le le gotee bjalo ka lapa go ka kgotsofatša gaešita le dinyakwa tše bohlokwa le go feta—poledišano e borutho le tlemo ya lapa.

Algirdas o dula le mosadi wa gagwe, Rima, gotee le barwedi ba bona ba bararo kua nageng ya Lithuania yeo e lego ka leboa la Yuropa. Algirdas o re: “Gaešita le ge ke šoma gomme barwedi ba-ka ba tsena sekolo, re rulaganya lenaneo la rena ka tsela yeo e lego gore re tla kgona go ja dijo tša mantšiboa re le gotee. Dinakong tša dijo, ka moka ga rena re ikwa re lokologile go bolela ka seo se diregilego mosegare gotee le go hlalosa mathata a rena, dikgopolo, dilo tšeo re di rulagantšego, dilo tšeo re di ratago le tšeo re sa di ratego. Gape re diriša nako ye go boledišana ka dilo tša moya. Ka ntle le pelaelo, dinako tša dijo di re dira gore re tlwaelane.”

Rima o oketša ka gore: “Go lokišetša dijo ke e-na le barwedi ba rena gape go re nea dibaka tša go boledišana ka mo go tseneletšego. Barwedi ba rena ba thabela go dira dilo ba le gotee ka khitšhing gomme ka nako e swanago ba ithuta mediro e bohlokwa. Ka go rialo, re kgona go tswaka mošomo le boithabišo.”

Algirdas, Rima, le bana ba bona ba holega kudu ka gobane ba ipha nako ya go ja ba le gotee. Ge e le gore ga se la hlwa le dira bjalo, le reng le sa rulaganye gore le je le le gotee bjalo ka lapa bonyenyane gatee ka letšatši, gaešita le ge o le motswadi o tee. Meputso e tla feta kgole boikgafo le ga e le bofe bjo le bo dirago.