Kamoo o ka Agago Lenyalo le le Nago le Lethabo

‘Monna o swanetše go kgomarela mosadi wa gagwe gomme ba be nama e tee.’—GENESI 2:24.

MMOPI wa rena, Jehofa Modimo, o theile lenyalo e le tlemaganyo ya sa ruri magareng ga monna le mosadi. Genesi 2:18, 22-24 e re: “Morêna Modimo a re: Xa xo botse xe motho a le nnoši; ke tlo mo dirêla modiriši e a mo lebanexo. Ka lôna lexopô leo le a le nthšitšexo xó motho, Modimo ó dirile mosadi, a mo tliša xó motho. Ké mo motho a boletšexo a re, Byalo xomme šó, e lexo lešapô la mašapô a-ka, le nama ya nama ya-ka. Yêna-yó ba tlo re ké mosadi, xobane ké yêna e a nthšitšwexo monneng. Ka baka leo monna ó tlo tloxêla tata’xwê le mma’xwê, [gomme o swanetše go] xomarêla mosadi wa xaxwe; xomme ba tlo ba nama e tee.”

Ke therešo gore go aga lenyalo le le swarelelago le  le le nago le lethabo ga go bonolo, eupša go tloga go kgonega. Banyalani ba bantši ba na le nywaga e 50, 60, goba go feta moo ba thabile lenyalong la bona. Ba kgona bjang seo? Ba dira maiteko a tšwelago pele le a se nago boithati a go atlegiša lenyalo la bona ka mo go tšwelago pele gomme ba hloka boithati e le gore ba ‘hwetše kamogelo’ ya balekane ba bona. (1 Bakorinthe 7:33, 34) Seo se nyaka gore motho a šome ka thata. Ge e ba o ikemišeditše go gafa nako ya gago le boiteko, le wena o ka aga lenyalo leo le nago le lethabo leo le tlago go swarelela nako e telele.

Latela Ditaelo ka Kelohloko

Rakonteraka yo a botegago a ka se ke a thoma modiro wa go aga pele ga ge a ka latela ditaelo tša go aga. Ka mo go swanago, re ka se age lenyalo le le nago le lethabo ka katlego ge re sa latele ka kelohloko ditaelo tša Modimo tša go aga lenyalo le le nago le lethabo. Ditaelo tšeo di hwetšwa ka Lentšung la Modimo. Moapostola Paulo o ngwadile gore: “Lengwalo ka moka le buduletšwe ke Modimo gomme le hola ka . . . go lokiša dilo.”—2 Timotheo 3:16.

Banna le basadi ba ka ithuta mo gontši ka lenyalo ka go ela hloko kamoo Jesu a ilego a swara barutiwa ba gagwe ka gona. Ke ka baka la’ng go ka bolelwa bjalo? Ka Beibeleng tswalano yeo e lego gona magareng ga Jesu le bao ba tlago go buša le yena legodimong e swantšhwa le tswalano ya monna le mosadi wa gagwe. (2 Bakorinthe 11:2) Jesu o ile a dula a botegela bagwera ba gagwe, gaešita le dinakong tša mathata a magolo. “O ba ratile go fihla bofelong.” (Johane 13:1) Bjalo ka moetapele yo a nago le kwelobohloko, Jesu ka mehla o be a naganela mafokodi a balatedi ba gagwe. Le ka mohla ga se nke a nyaka dilo tšeo di fetago tšeo ba bego ba ka kgona go di dira goba go di nea.—Johane 16:12.

Gaešita le ge a be a nyamišwa ke bagwera ba gagwe ba paala, Jesu o ile a dula a le botho. Ga se nke a ba omanya eupša go e na le moo, ka go bontšha boikokobetšo bjo bo tšwago godimo le botho o ile a leka go ba phošolla. (Mateo 11:28-30; Mareka 14:34-38; Johane 13:5-17) Ka gona, ge o hlahloba ka kelohloko tsela yeo Jesu a ilego a swara balatedi ba gagwe ka boleta ka gona le kamoo ba ilego ba arabela ka go mmontšha lerato, o tla ithuta dithuto tše di šomago tša kamoo go ka agwago lenyalo leo le nago le lethabo.—1 Petro 2:21.

Aga Motheong o Tiilego

Ke therešo gore diteko tše di swanago le ledimo di tla hlasela motheo wa lenyalo la lena. Se se tla leka motheo wa tswalano ya lena bjalo ka banyalani. Lega go le bjalo, motheo o tiilego kudu woo go wona go ka agelwago lenyalo le le nago le lethabo ke tlemo ya go botega ka go se kwanantšhe yeo e theilwego leratong. Jesu o ile a gatelela bohlokwa bja tlemo ye ge a be a re: “Ga go motho yo a swanetšego go aroganya banyalani bao Modimo a ba tlemagantšego.” (Mateo 19:6, Contemporary English Version) Polelwana e rego “ga go motho” e tla akaretša monna le mosadi wa gagwe, bao ba ennego gore ba tla dula ba botegelana.

Ba bangwe ba ka lebelela tlemo e le morwalo, le gore e nyaka nako e ntši le boiteko bjo bogolo. Lehono go dira seo se holago motho ka noši go ratwa kudu go feta go dira boikgafo bjo bo nyakegago ge motho a tlemagane le yo mongwe.

Ke’ng seo se ka matlafatšago tlemo ya lenyalo? Moapostola Paulo o ngwadile gore: “Banna ba swanetše go rata basadi  ba bona bjalo ka mebele ya bona.” (Baefeso 5:28, 29) Ka gona, ka boripana re ka re go ‘tlemaganywa’ go bolela gore o ikwa o tshwenyega kudu ka bophelo bja molekane wa gago go swana le ge o tshwenyega ka bja gago. Batho ba nyalanego ga se ba swanela go hlwa ba sa nagana ka gore dilo ke “tša-ka” eupša ba re ke “tša rena,” e bile ga se ba swanela go hlwa ba bolela ba re “ke” eupša ba re “re.”

Go fenya ka katlego ditlhaselo tše swanago le ledimo lenyalong la lena go tla le dira ba bohlale. Bohlale bjo bjalo bjo bo hwetšwago bo ka tliša lethabo. Diema 3:13 e re, “Lehlôxônôlô le n’e khwetša-bohlale.”

Diriša Dikago tše di sa Fsego

Gore ntlo e dule nako e telele gomme e be e šireletšegilego e swanetše go agwa ka bokgwari. Ka gona, ipeele pakane ya go aga lenyalo la gago o naganne ka gore le swarelele nako e telele. Diriša dikago tšeo di tiilego, tšeo di ka kgonago go lebeletšana le diteko tše kgolo tša potego ya gago e sa kwanantšhego. Tšeela godimo kudu dika tše dibotse tše bjalo ka bohlale bja Modimo, go nea o thabile, temogo, go boifa Modimo, borutho, go leboga ka lerato melao ya Modimo le tumelo ya kgonthe.

Lethabo le kgotsofalo lenyalong ga di agwe ke dilo tše di bonagalago goba go atlega mešomong ya lefase. Di agwa pelong le monaganong, gomme dika tše di matlafatšwa ke ditherešo tšeo di tšwago Lentšung la Modimo. Kgothatšo e rego “anke yo mongwe le yo mongwe a dule a phakgametše kamoo a agago ka gona” le yona e ka dirišwa lenyalong.—1 Bakorinthe 3:10.

Ge Mathata a Rotoga

Gore moago o dule o tiile nako e telele, go nyakega gore go be le lenaneo la go dula o lokišwa. Ge monna le mosadi ba thekgana ka mehla dipakaneng tša bona le ge ba bontšhana tlhompho le go godišana, lenyalo la bona le dula le tiile. Boithati ga bo be gona e bile go galefa go kgona go laolega.

Go galefa mo go tseneletšego le mo go sa rarollwego gaešita le tlhakatlhakano di ka bolaya lerato lenyalong. Moapostola Paulo o eleditše banna gore: “Lena banna, tšwelang pele le rata basadi ba lena gomme le se ke la ba galefela o šoro.” (Bakolose 3:19) Wona molao wo wa motheo o a šoma le go basadi. Ge banyalani ba katanela go ba ba naganelago, ba botho le ba kwešišago ba dira gore ba be le lethabo le kgotsofalo. Go phema bogale le boitshwaro bjo bo bakago dintwa go thuša go phema dikgakgano ge mathata a tšwelela. Paulo o kgothaditše ka gore: “E-bang ba botho yo mongwe go yo mongwe, le šokelane ka bonolo, le lebalelane ka bolokologi.”—Baefeso 4:32.

Go thweng ge e ba o nolwa moko ke go ikwa o se na thušo, o tenega goba o se na mohola? Ka mo go kwagalago, botša molekane wa gago ka moya o boleta lebaka la gago la go tshwenyega. Lega go le bjalo, go ka ba kaone kudu go dumelela lerato le khupetša ditaba tše dinyenyane.—1 Petro 4:8.

Monna yo mongwe, yo a ilego a lebeletšana le diteko tše mmalwa nakong ya lenyalo la gagwe  la nywaga e 35, o re go sa šetšwe gore o galefetše molekane wa gago gakaakang, ga se wa swanela go “tlogela go boledišana le yena.” Ge a oketša ka tsela e bohlale o re, “Le ka mohla o se ke wa kgaotša go rata molekane wa gago.”

O ka Aga Lenyalo le le Nago le Lethabo!

Ke therešo gore go aga lenyalo le le nago le lethabo ga go bonolo. Lega go le bjalo, ge banyalani ba ikemišeditše go šoma ka thata le go akaretša Modimo tswalanong ya bona, ba tla tlelwa ke lethabo le polokego. Ka gona, lebeledišiša dibopego tša moya ka lapeng la gago; e ba le tlemo e tiilego kudu lenyalong. Le gona o gopole gore go ya ka mantšu a Jesu, monna le mosadi ga ba swanelwe ke theto ka moka ge lenyalo le e-na le lethabo. Go e na le moo, theto ge e le gabotse e išwa go Mothomi wa lenyalo, Jehofa Modimo. “Se Modimo a se tlemagantšego jokong go se be le motho yo a se aroganyago.”—Mateo 19:6.

SE SENGWE SEO O KA ITHUTAGO SONA

Puku ya Sephiri sa Lethabo la Lapa, yeo e gatišitšwego ke Dihlatse tša Jehofa, e nea ditšhišinyo tše di šomago tša go aga lenyalo le le atlegilego le leo le nago le lethabo. Banyalani ba dikete tše makgolo go dikologa lefase ba hweditše gore keletšo ya yona e šomago le yeo e theilwego Beibeleng e ba thušitše go kaonefatša go tia ga tswalano ya bona.—Bona letlakala 32 la makasine wo.

[Lepokisi go letlakala 9]

Ke’ng Seo se ka go Thušago go Aga Lenyalo le le Nago le Lethabo?

▪ Ithute Lentšu la Modimo ka mehla o e-na le molekane wa gago, le gona rapelela thušo ya Modimo le tlhahlo bakeng sa go lokiša mathata.—Diema 3:5, 6; Bafilipi 4:6, 7; 2 Timotheo 3:16, 17.

▪ Dikganyogo tša botona le botshadi tšeo o nago le tšona di felele ka mo go feletšego go molekane wa gago feela.—Diema 5:15-21; Baheberu 13:4.

▪ Boledišanang ka bolokologi, ka potego le ka lerato mabapi le mathata le diphapano tša lena.—Diema 15:22; 20:5; 25:11.

▪ Bolela le molekane wa gago ka botho, ka tsela ya go naganela; phema go tuka bogale, go belaela kudu le mantšu a go hlaba a go ntšha diphošo.—Diema 15:1; 20:3; 21:9; 31:26, 28; Baefeso 4:31, 32.

▪ Ka boikokobetšo diriša keletšo ya Beibele gaešita le ge o bona gore molekane wa gago ga a dire dilo ka moka tšeo a bego a swanetše go di dira.—Baroma 14:12; 1 Petro 3:1, 2.

▪ Šoma ka thata gore o hlagolele dika tša moya tšeo di bolelwago ka Beibeleng.—Bagalatia 5:22, 23; Bakolose 3:12-14; 1 Petro 3:3-6.

[Diswantšho go letlakala 7]

Latela ditaelo tša Modimo tša lenyalo tšeo di hwetšwago ka Beibeleng

[Seswantšho go letlakala 7]

Motheo wa gago o tiilego e be lerato le se nago boithati le potego e sa kwanantšhego

[Diswantšho go letlakala 8]

Hlagolela dika tša moya tšeo di ka go thušago go lebeletšana le diteko tše dikgolo

[Diswantšho go letlakala 8]

Lenyalo le lebotse le nyaka gore go dirwe maiteko