BA-JUDA, Bakriste le Mamoseleme ba ile ba se dumelelane gantši ka dilo tše dintši. Lega go le bjalo, go sa šetšwe go se dumelelane ga madumedi a, a na le selo se tee seo bonyenyane a dumelelanago ka sona: a na le tlhompho e tseneletšego ka monna yoo a tsebjago e le Moše. Ba-Juda ba mo tšea e le “morutiši yo mogolo ka go fetišiša go barutiši ka moka ba ba-Juda”—mothei wa setšhaba sa ba-Juda. Bakriste ba mo tšea e le ketapele ya Jesu Kriste. Mamoseleme a tšea Moše e le yo mongwe wa baporofeta ba bona ba pele le ba bagolo ka go fetišiša.

Ka gona, Moše ke yo mongwe wa banna ba ba nago le tutuetšo ka go fetišiša historing ya batho. Lega go le bjalo, taba ya go ba gona ga Moše e ile ya hlaselwa ke diithuti le baruti ba bodumedi ka nywaga e fetago e 100. Batho ba bantši ga ba belaele feela taba ya go dumela gore Moše o ile a dira mehlolo gomme a etelela ba-Isiraele pele go tšwa Egipita, eupša ba belaela gape le taba ya gore o kile a ba gona. Puku ya Moses—A Life, yeo e ngwadilwego ke Jonathan Kirsch e phetha ka gore: “Seo re ka se bolelago ka monna yoo historing a tsebjago e le Moše ke gore motho yo mongwe yo a swanago le monna yo go bolelwago ka yena ka Beibeleng a ka no ba a ile a phela nakong e nngwe e sa tsebjego le lefelong le le sa tsebjego mehleng ya kgale-kgale, gomme mediro ya gagwe e ka no ba e be e le therešo e nyenyane kudu yeo e bego e tsebja gomme ya gola ganyenyane-ganyenyane ka nywaga e mentši go fihlela e e-ba taba ya motho yo go ngangišanwago ka yena yoo re balago ka yena ka Beibeleng.”

Mathomong dipelaelo tše bjalo di ka bonala e le dilo tšeo di swanetšego go tšeelwa hlogong. Ka mohlala, bantšha-diphošo ba bolela gore go hweditšwe bohlatse bja boepi bja marope bjoo bo tiišago taba ya go ba gona ga batho ba bangwe ba tsebegago ba ka Beibeleng ba bjalo ka Kgoši Jehu wa mo-Isiraele, eupša ga go na bohlatse bja boepi bja marope bjo bo lego gona bjo bo tiišago gore Moše o kile a ba gona. Lega go le bjalo, bjo le gatee ga se bohlatse bjo bo bontšhago gore taba ya gore Moše o kile a ba gona ke nonwane. Babelaedi ba kile ba bolela gore batho ba bangwe bao go bolelwago ka bona ka Beibeleng ba bjalo ka Kgoši Belesatsara wa Babele le Kgoši Saragone wa Asiria le bona e be e le dinonwane—go fihlela ge ka morago boepi bja marope bo tiiša taba ya gore ba kile ba ba gona.

Mongwadi Jonathan Kirsch o re gopotša gore: “Mašalela a marope a Isiraele a mehleng ya Beibele a hlaela kudu moo e lego gore ntlha ya gore ga go na mothopo le o tee woo taba ya Moše e tšwelelago ka go wona ge e se feela ka Beibeleng, ga e makatše goba gona go fediša ngangišano.” Go ya ka Kirsch, ba bangwe ba ganetšana le taba yeo ya gore Moše e ka no ba e le kakanyo yeo motho a itlhametšego yona, ka gobane “phihlelo yeo e tletšego ka dintlha tša go kwagala ya poledišano ya batho ba babedi, yeo e nago le dikarolo tše di raraganego ka tsela ye . . . , e be e ka se be selo seo se inaganetšwego.”

Go sa šetšwe gore o modumedi goba ga o yena, mohlomongwe o tlwaelane ka tsela e itšego le ditiragalo tše dikgolo tša bophelo bja Moše: go gahlana ga gagwe le Modimo sethokgweng se se tukago, Khudugo ya ba-Isiraele bokgobeng bja Egipita le go bulega ga Lewatle le Lehwibidu. Eupša na go na le lebaka leo ka lona o swanetšego go dumela gore e nngwe ya dilo tše e kile ya direga e le ka kgonthe? Goba na Moše e fo ba motho wa nonwane? Sehlogo se se latelago se ahla-ahla dipotšišo tše tše di kgahlišago.