Kgoro-kgolo Ya Tsheko E Amogela Molato

NYWAGENG YA MORAGO BJALE, Kgoro-kgolo ya Tsheko ka ngwaga e ile ya amogela melato e ka bago 80 go ya go 90 ka baka la bohlatse bjo bo ngwadilwego bja molao go dikgopelo tša ka godimo ga 7 000—e lego tekanyo ya ka godingwana ga tee lekgolong!

Ka May 2001, Dihlatse tša Jehofa di ile tša tsenya Petition for a Writ of Certiorari (lengwalo la go kgopela tumelelo ya go bušeletša molato) Kgorong-kgolo ya Tsheko, di botšiša gore: “Na go ya ka molao-theo, badiredi ba bodumedi bao ba dirago modiro wo o theilwego Mangwalong wa go bolela ka ditumelo tša bona tša bodumedi ka ntlo le ntlo wo o nago le nywaga-kgolo e mentši o dirwa, ba swana le barekiši bao ba gapeletšegago go kwa thibelo yeo e hlalositšwego e sa le pele ya go hwetša tumelelo ya mmasepala ya go bolela ka Beibele goba ya go aba dipuku tšeo di theilwego Beibeleng ka ntle le tefo?”

Ka October 15, 2001, Lefapha la tša Molao la Watchtower le ile la tsebišwa gore Kgoro-kgolo ya Tsheko ya United States e amogetše  kgopelo ya Watchtower Bible and Tract Society of New York, Inc., et al. v. Village of Stratton et al. ya go bula molato bakeng sa go o hlahloba gape!

Kgoro ya Tsheko e ile ya thea go amogela ga yona molato go kgang e itšego ya tokologo ya polelo, e lego taba ya ge e ba tšhireletšo ya Tokišo ya Pele ya tokologo ya polelo e akaretša tshwanelo ya gore batho ba bolele le ba bangwe ka taba ye ka ntle le gore ba thome ka go ipega go bahlankedi ba mmušo.

Bjale molato o ile wa swanelwa ke gore o sekwe ka molomo pele ga baahlodi ba senyane ba Kgoro-kgolo ya Tsheko ya United States. Dihlatse di be di tla ba le baboleledi ba tšona; le Motse wa Stratton o be o tla ba le sehlopha sa wona sa ngangišano. Mafelelo a ditaba e be e tla ba afe kgorong yeo ya molao?

[Lepokisi go letlakala 5]

TOKIŠO YA PELE KE’NG?

“LEKGOTLA LA TOKIŠO YA I (GO HLONGWA GA BODUMEDI; TOKOLOGO YA BODUMEDI, POLELO, GO PHATLALATŠA DITABA, GO BOKANA LE GO DIRA KGOPELO) le ka se dire molao mabapi le go hlongwa ga bodumedi goba go thibela go ikgethela go dirišwa ga bjona; go lekanyetša go dirišwa ga bjona; goba go lekanyetša tshwanelo ya batho ya go bokana ka khutšo le go kgopela Mmušo gore o tloše dibaki tša dillo.”—The U.S. Constitution.

“Tokišo ya Pele ke motheo wa tshepedišo ya pušo ka batho kua United States. Tokišo ya Pele e thibela Lekgotla go ntšha melao yeo e thibelago tokologo ya polelo, tokologo ya go phatlalatša ditaba, ya go bokana ka khutšo goba ya go dira kgopelo. Batho ba bantši ba lebelela tokologo ya polelo e le yona tokologo e bohlokwa go di feta tšohle e bile e le motheo wa mehuta e mengwe ka moka ya tokologo. Tokišo ya Pele gape e thibela Lekgotla go ntšha melao yeo e hlomago bodumedi bjo bo thekgwago ke mmušo goba go lekanyetša tokologo ya bodumedi.” (The World Book Encyclopedia) Ka mo go kgahlišago, ka go Cantwell v. Connecticut 310 U.S. 296 (1940), e lego kahlolo e kgolo yeo le yona e akaretšago Dihlatse tša Jehofa, Kgoro-kgolo ya Tsheko ya United States e ile ya ahlola ka gore dikgonthišetšo tša Tokišetšo ya Pele ga di thibele feela “Lekgotla” (mmušo wa mohlakanelwa) eupša di thibela le dipušo tša tikologong (mmušo le mmasepala) gore di se ke tša ntšha melao yeo go ya ka molao-theo e tlago go gatakela ditshwanelo tša Tokišo ya Pele.

[Seswantšho go letlakala 5]

Taba yeo e akaretšwago e be e kgoma dibopego tše di fapa-fapanego tša go ya ka ntlo le ntlo

[Mothopo wa Seswantšho go letlakala 4]

Photograph by Franz Jantzen, Collection of the Supreme Court of the United States