Pono ya Beibele

Modimo o Ikwa Bjang ka Bošoro?

BOŠORO bo atile gomme bo na le dibopego tše di fapa-fapanego. Ka ntle le ntwa, go na le bošoro bjo bo sepedišanago le dipapadi, dihlare-tagi, dihlopha tša bosenyi, dikolo le bjo bo sepedišanago le mošomo gotee le bošoro bjo bo sepedišanago le boithabišo. Gaešita le bošoro bja ka gae bo bonagala e le bjo bo tlwaelegilego malapeng a mantši. Ka mohlala, nyakišišo e nngwe ya morago bjale e bontšhitše gore kua Canada banna le basadi ba dimilione tše 1,2 ba ile ba hlaselwa o šoro ke balekane ba bona ka noši bonyenyane gatee nywageng e mehlano ya morago bjale. Nyakišišo e nngwe e phethile ka gore mo e ka bago 50 lekgolong ya banna bao ba bethago basadi ba bona, ba bile ba tlaiša le bana ba bona o šoro.

Ka kgonthe, ditiro tše bjalo tša bošoro ke tšeo di tšhošago go wena go swana le ge di dira bjalo bathong ba bangwe ba bantši. Lega go le bjalo, bošoro bo fetogile motswako wa bohlokwa boithabišong bjo bontši bja mehleng yeno. Batheetši ga ba kgahlišwe feela ke bošoro bja boikgopolelo bjoo bo tšwelelago dipaesekopong eupša ba bile ba kgahlišwa ke ditiro tšeo di bontšhwago thelebišeneng tša ditlhaselo tša kgonthe. Papadi ya matswele le dipapadi tše dingwe tše šoro ke tšeo di rategago dinageng tše dintši. Eupša na Modimo o ikwa bjang ka bošoro?

Histori e Telele ya Bošoro

Bošoro bo na le histori e telele. Tiro ya pele ya bošoro bja kgonthe bjo bo dirilwego ke motho yeo e begilwego ka Beibeleng e hlalositšwe go Genesi 4:2-15. Kaine yo e lego morwa wa pele wa Adama le Efa, o ile a hufegela ngwanabo e lego Abele gomme a mmolaya ka boomo. Modimo o ile a arabela bjang? Beibele e hlalosa gore Jehofa Modimo o ile a otla Kaine o šoro ka ge a ile a bolaya ngwanabo.

Go Genesi 6:11 (NW), re bala gore mo e ka bago nywaga e fetago 1 500 ka morago ga tiragalo yeo, lefase le be le ‘tletše bošoro.’ Gape, karabelo ya Modimo e ile ya ba efe? O ile a laela Noage wa moloki gore a age areka yeo e bego e tla boloka yena le ba lapa la gagwe ba šireletšegile ge Jehofa a tliša meetse-fula lefaseng, ka go rialo ‘a fediše’ moloko woo o šoro. (Genesi 6:12-14, 17) Eupša ke’ng seo se ilego sa dira gore batho ba sekamele bošorong gakaakaa?

Tutuetšo ya Batemona

Pego ya Genesi e utolla gore barwa ba Modimo, e lego barongwa bao ba sa kwego, ba ile ba itira batho, ba nyala basadi gomme ba ba le bana. (Genesi 6:1-4) Bana ba bao ba bego ba tsebja e le ba-Nefilimi, e be e le banna ba batelele le ba ba tumilego. Ba tutuetšwa ke bo-tatago bona bao e lego batemona, ba ile ba ba bomphenyašilo ba bašoro.  Ge meetse-fula a oketšega le go khupetša lefase, bomphenyašilo ba bakgopo ba ile ba fedišwa. Eupša go bonagala batemona ba ile ba fetola lebopo la bona la nama gomme ba boela tikologong ya moya.

Beibele e hlalosa gabotse gore ga e sa le go tloga nakong yeo, barongwa ba ba marabele ba na le tutuetšo e matla bathong. (Ba-Efeso 6:12) Moetapele wa bona e lego Sathane, o bitšwa “mmolai” wa mathomo. (Johane 8:44, PK) Ka gona, bošoro bjo bo diregago lefaseng bo ka bitšwa ka mo go swanetšego gore ke bja botemona goba bja bosathane.

Beibele e lemoša malebana le matla ao a goketšago a bošoro. Go Diema 16:29, e re: “Monna o šoro ó xoka wa xabô; ó mo iša mo tseleng e sexo botse.” Ba bantši lehono ba gokeditšwe gore ba amogele, ba tšwetše pele goba ba dire ditiro tša bošoro. Gape, dimilione tša batho di gokeditšwe gore di thabele boithabišo bjoo bo godišago bošoro. Mantšu a Psalme 73:6 a ka dirišwa ka mo go nepagetšego go hlalosa moloko wa mehleng yeno. Mopsalme o re: “Ba kxôna xo apara pheta ya boikxodišô; le bošoro xo bôná ké seaparô.”

Modimo o Hloile Bošoro

Bakriste ba swanetše go itshwara bjang lefaseng le le šoro? Pego ya Beibele ya mabapi le barwa ba Jakobo e lego Simeone le Lefi, e re nea tlhahlo e kwagalago. Kgaetšedi ya bona Dina o ile a ikgweranya le batho ba boitshwaro bjo bo gobogilego ba Sikeme. Se se ile sa feleletša ka gore a gobošwe ka tša botona le botshadi ke monna wa Sikeme. E le go itefeletša, Simeone le Lefi ka go hloka kgaugelo ba ile ba bolaya banna ka moka ba Sikeme. Ka morago, a budulelwa ke Modimo, Jakobo o ile a rogaka pefelo yeo e sa laolegego ya barwa ba gagwe ka mantšu a rego: “Simeone le Lefi, bana ba motho o tee. Marumô a bôná ké dibetša tša sehloxo. Môya wa-ka xa ó tsene xe ba loxa maanô; morêrô wa bôná xa ke na taba nawô.’”—Genesi 49:5, 6.

Ka go dumelelana le mantšu a, Bakriste ba phema go gwerana le bao ba tšwetšago pele goba go dira bošoro. Go molaleng gore Modimo o hloile bao ba tšwetšago pele bošoro. Beibele e re: “Morêna ó šetša ba ba lokilexo le ba babe; xomme ó hloile ba ba rataxo bosenyi [“bošoro,” NW].” (Psalme 11:5) Bakriste ba eletšwa gore ba pheme dibopego ka moka tša pefelo yeo e sa laolegego gaešita le go hlasela ka mantšu.—Ba-Galatia 5:19-21; Ba-Efeso 4:31.

Na Bošoro bo tla ka bja Fela?

Moporofeta wa bogologolo e lego Habakuku o ile a botšiša Jehofa Modimo gore: “Go tlo feletša neng ke fêla . . . ke hlaboša lentšu kè Xo bitša kè patilwe?” (Habakuku 1:2) Mohlomongwe o kile wa botšiša potšišo e swanago. Modimo o ile a araba Habakuku, a holofetša gore o tla fediša “o mobe.” (Habakuku 3:13) Puku ya boporofeta ya Jesaya le yona e nea kholofelo. Moo Modimo o holofetša gore: “Mo naxeng ya xaxo xo ka se hlwê xo kwala tša sehloxo; le tša thšwalalanyô le xo thubya di ka se hlwê di kwala mellwaneng ya xaxo.”—Jesaya 60:18.

Dihlatse tša Jehofa di kgodišegile gore kgaufsinyane Modimo o tla fediša dibopego ka moka tša bošoro mo lefaseng le bao ba di tšwetšago pele. Ka nako yeo, go e na le gore le tlale ka bošoro, “lefase le tlo tlala tsebô ya letaxô la Morêna, byalo ka lewatlê lè enetšwe ke meetse.”—Habakuku 2:14.

[Seswantšho go letlakala 12]

Bošoro bo thomile ge Kaine a be a bolaya Abele