Dikgolego di Bothateng

“Go aga dikgolego tše dintši bakeng sa go rarolla bothata bja bosenyi go swana le go aga lefelo la mabitla a mantši bakeng sa go swaragana le bolwetši bjo šoro.”—ROBERT GANGI, SETSEBI SA TŠA GO KGOPAMOLLA MEKGWA.

LEFASENG leo go lona go kgopamolla mekgwa ga tša dipolitiki gantši go širago lehlakore le le sa kgahlišego la therešo, re hwetša mantšu a mangwe a kgahlišago bakeng sa lentšu le le sa thabišego la “kgolego.” Re kgetha go diriša “lefelo la go kgopamolla mekgwa,” moo go newago “tlwaetšo ya go ithutela mediro” le “ditirelo tša tša setšhaba.” Gape re rata lentšu “moswariwa” go feta lentšu leo e sego la setho la “mogolegwa.” Lega go le bjalo, lebelela taba ka mo go tseneletšego gomme o tla hwetša gore dikgolego lehono di lebane le mathata a magolo, bjalo ka tshenyagalelo e hlatlogago ya go boloka disenyi ka dikgolegong le sekgoba se se katologago kudu magareng ga maikemišetšo a go golega le ditla-morago tša gona.

Batho ba bangwe ba belaela mohola wa dikgolego. Ba bolela gore gaešita le ge palo ya bagolegwa lefaseng ka bophara e hlatlogetše go dimilione tše di fetago tše seswai, tekanyo ya bosenyi dinageng tše dintši ga se ya fokotšega ka mo go lemogegago. Go oketša moo, le ge palo e kgolo ya bao ba lego ka kgolegong ba le moo ka baka la bosenyi bjo bo akaretšago dihlare-tagi, go hwetšagala ga dihlare-tagi setarateng e sa dutše e le taba e tshwenyago kudu.

Lega go le bjalo, ba bantši ba lebelela go golegwa e le kotlo e kaone. Ba dumela gore ge sesenyi se golegwa, toka e a phethwa. Mmegi yo mongwe wa ditaba o hlalosa phišego ya go lahlela disenyi kgolegong e le “bolwetši bja go nyaka gore batho ba golegwe.”

Go na le mabaka a mane a magolo ao ka ona barobi ba molao ba lahlelwago kgolegong: (1) go otla disenyi, (2) go šireletša setšhaba, (3) go thibela bosenyi bjo bongwe le (4) go kgopamolla mekgwa ya disenyi, go di ruta go kwa molao le go ba tše holago ka morago ga ge di lokolotšwe. Anke re boneng ge e ba dikgolego di phetha dipakane tše.