“O tlo Hwa!”

KA GE GO ANEGA LEANNE KARLINSKY

Lesolo la-ka la go nyaka kalafo e kaone-kaone yeo e lego gona ka ntle le madi Sepania

GE E ba o be o ka tšea leeto kae le kae mo lefaseng, o be o tla kgetha go ya kae? Go nna karabo e be e le bonolo. Ke ruta Sepaniši sekolong, e bile nna gotee le monna wa-ka Jay le morwa wa-ka Joel, re kopanela phuthegong ya Dihlatse tša Jehofa ya leleme la Sepaniši kua Galax, Virginia, U.S.A. Ka gona, tlhologelo ya-ka e be e le go etela Sepania. Ka gona o ka akanya kamoo ke bego ke thabile ka gona ge batswadi ba-ka ba ikemišeditše go nkiša moo! Gaešita le ge monna wa-ka le morwa wa-ka ba be ba ka se sepele le nna, toro ya-ka e be e le kgaufsi le go phethagala ge nna le batswadi ba-ka re le kgaufsi le go namela sefofane sa go ya Madrid. Ge re fihla ka April 21, re ile ra dira phetho ya go ya Estella, torotswana yeo e lego Navarre ka leboa la Sepania. Ke ile ka iketla ka setulong sa ka morago gomme ka robala.

Se se latetšego seo ke se gopolago ke gore ke be ke robetše lebaleng e bile letšatši le mphahla ka mahlong. ‘Ke mo kae? Ke fihlile bjang mo? Na ke a lora?’ Ge dipotšišo tše di dutše di rotoga monaganong wa-ka, selo sa kgonthe seo se tšhošago se ile sa bonagala. Selo se sengwe se be se fošagetše, le gona se e be e se toro. Letsogo la ntsogošo la seaparo sa-ka le be le kgeigile e le mankgeretla, le gona ke be ke sa kgone go šuthiša matsogo a-ka goba maoto. Ka morago, ke ile ka lemoga gore koloi ya rena e thutše legora la tšhireletšo le gore ke lahletšwe ka ntle ga koloi nakong ya ge e be e wela tlase leribeng mo e ka bago dimithara tše 20. Ka mahlatse, go nna goba le ge e le batswadi ba-ka ga go na yo a gopolago selo le ge e le sefe sa kotsi yeo.

Ke ile ka goeletša bakeng sa thušo, gomme mootledi wa lori o ile a kitimela go nna. Ka gona o ile a theogela tlase ka leribeng go ya koloing, moo batswadi ba-ka ba bego ba kgakgetšwe gona. O ile a goeletša mootledi-gotee le yena ka gore: “Botša koloi yeo ya go rwala balwetši gore e phakiše! Batho ba ba lego ka koloing ba boemong bjo bobe!” Ka gona o ile a boela mo ke bego ke robetše gona ke sa šišinyege, gomme ka maikemišetšo a mabotse o ile a leka go otlolla leoto la-ka. Ke ile ka goeletša ka baka la bohloko, e le gona ke lemogago la mathomo gore ke be ke gobetše kudu.

Go se go ye kae ke be ke le ka phapošing ya tšhoganyetšo sepetleleng sa lefelong leo kua Logroño. Ka botho lephodisa le ile la tsebiša Dihlatse tša Jehofa tša lefelong leo moo ke bego ke le gona le seo se diragetšego. Go se go ye kae, ba bantši bao ba tšwago diphuthegong tša Estella le Logroño ba be ba le hleng ga bolao bja-ka gotee le Komiti ya go Hloma Kwano le Sepetlele ya lefelong leo. Ruri, tlaišegong ya-ka ka moka sepetleleng se, Bakriste-gotee le nna bao ba rategago bao ke sa kago ka kopana le bona pele ba be ba ikemišeditše le go rata go hlokomela dinyakwa tša-ka bošego le mosegare. Ba ile ba ba ba hlokomela le batswadi ba-ka ka lerato, bao ba ilego  ba fola ka mo go lekanego bakeng sa go lokollwa sepetlele mo e ka bago beke ka morago ga kotsi.

Mo e ka bago ka 1:00 a.m. ka Laboraro, dingaka di ile tša tla bakeng sa go tlo dira kalafo ya go buwa noka ya-ka yeo e bego e robegile. Ke ile ka botša ngaka gore ga ke nyake go tšhelwa madi. * E ile ya dumela ka go se rate go hlompha kgopelo ya-ka, gaešita le ge e ile ya mpotša gore go na le kgonagalo ya gore ke hwe. Ke ile ka phologa go buiwa, eupša ka hwetša e le mo go sa tlwaelegago gore dintho tša-ka di be di sa hlwekišwa, e bile le mašela a be a sa fetolwa ka moragonyana ga moo.

Ka Labohlano tekanyo ya-ka ya madi e be e theogile go fihla go 4,7, e bile ke be ke lahlegelwa ke matla. Ngaka e ile ya dumela go nnea kalafo e nngwe—ditšhwana tša erythropoietin (EPO), yeo gotee le iron le ditlaleletšo tšeo di bopago madi, e tutuetšago go tšweletšwa ga disele tše dikhwibidu tša madi. * Ga bjale, Jay le Joel ba be ba fihlile. E bile mo gobotse gakaakang go bona monna wa-ka le morwa wa-ka!

Mo e ka bago ka 1:30 a.m., ngaka e ile ya botša Jay gore sepetlele se šetše se hweditše taelo ya kgoro gore ba ntšhele madi ge e ba boemo bja-ka bo mpefala le go feta. Jay o ile a e botša gore dikganyogo tša-ka e be e le gore ke se tšhelwe madi ka tlase ga maemo le ge e le afe. Ngaka e ile ya fetola: “Gona-ge o tla hwa!”

Jay o ile a boledišana le ba Komiti ya go Hloma Kwano le Sepetlele mabapi le go nkhudušetša lefapheng le lengwe—leo le tla hlomphago dikganyogo tša-ka. E sego gore ka moka ga bona mo sepetleleng se ba be ba ganetša. Ka mohlala, ngaka e nngwe e ile ya nkgonthišetša gore e tla dira sohle seo se lego matleng a yona go bona gore ke swarwa ka tlhompho ka moka yeo e ntshwanetšego. Eupša go se go ye kae dingaka tše dingwe di be di nkgatelela. Di ile tša botšiša gore: “Na o nyaka go hwa o tlogele lapa la gago le nnoši?” Ke ile ka di kgonthišetša gore ke nyaka kalafo e kaone-kaone yeo e lego gona ka ntle le madi. Dingaka di be di sa tutueletšega go nthuša. E nngwe e ile ya bolela ka bogale gore: “O tlo hwa!”

Komiti ya go Hloma Kwano le Sepetlele e ile ya hwetša sepetlele Barcelona seo se ilego sa dumela go nkalafa ntle le madi. A phapano e kaakang magareng ga dipetlele tše pedi! Barcelona, baoki ba babedi ka botho ba ile ba nhlapiša gomme ba ntira gore ke ikwe ke iketlile. Ge ba be ba fetoša mašela a-ka, yo mongwe wa baoki o ile a bona gore e be e le a matala le gona a na le magogo a madi ao a omeletšego. O ile a re o be a nyamile gore badudi-gotee le yena ba ntshwere ka tsela ye.

Kapejana ke e ile ka amogela kalafo yeo e bego e swanetše go ba e thomile sepetleleng sa Logroño. Ditla-morago e be e le tše makatšago. Ka matšatši a sego kae ditho tša-ka tše bohlokwa di be di tšwile kotsing, gomme tekanyo ya hemoglobin ya-ka e be e phagame go fihla go 7,3. Ge ke be ke e-tšwa sepetlele, e be e rotogetše go 10,7. Ge ke be ke nyaka go buiwa mo go oketšegilego sepetlele kua United States, e be e fihla go 11,9.

Ke leboga kudu maiteko a dingaka le baoki bao ba ikemišeditšego go dumelelana le dikganyogo tša balwetši ba bona, e ka ba ba dumelelana le tšona goba go se bjalo. Ge bašomi ba sepetlele ba hlompha ditumelo tša molwetši, ba hlokomela motho ka botlalo—ka gona ba nea kalafo e kaone-kaone yeo e lego gona.

[Mengwalo ya ka tlase]

[Seswantšho go letlakala 26]

Ke e-na le monna wa-ka le morwa

[Seswantšho go letlakala 27]

Ditho tše pedi tša Komiti ya go Hloma Kwano le Sepetlele