Lefase Leo le se Nago Dithuthupi tša go Epelwa Fase

KE MANG yo a ka rarollago bothata bja dithuthupi tša go epelwa fase? Bjalo ka ge re bone, maiteko a batho a ka se kgone go tumola lehloyo, kgethollo le megabaru ka mo go feletšego. Lega go le bjalo, barutwana ba Beibele ba lemoga gore Mmopi a ka kgona go tliša tharollo e sa felego. Eupša o tla dira bjalo bjang?

Go Thea Lekoko la Khutšo

Dintwa di lwewa ke batho e sego ke dibetša. Ka gona, ge e ba re nyaka go bona khutšo, lehloyo leo le arolago batho ka dihlopha tša merafo, moloko le ditšhaba le swanetše go fedišwa. Modimo o holofetša go dira se ka Mmušo wa gagwe, woo ba dimilione lefaseng ka moka ba dutšego ba rutwa gore ba o rapelele.—Mateo 6:9, 10.

Beibele e bolela ka Jehofa e le “Modimo yo a neago khutšo.” (Ba-Roma 15:33, NW) Khutšo yeo Modimo a e neago ga se ya ithekga ka dikiletšo le dikwano, e bile ga se ya thewa poifong ya tefetšo yeo e tšwago go setšhaba seo e lego lenaba seo se itlhamilego ka mo go feletšego. Ka mo go fapanego, khutšo yeo e newago ke Modimo e akaretša diphetogo tseleng yeo batho ba naganago ka yona le boemong bja kgopolo bjo ba nago le bjona go magagabo bona.

Jehofa Modimo o tla ruta baikokobetši ka ditsela tša gagwe tša khutšo. (Psalme 25:9) Lentšu la gagwe Beibele, le holofetša nako ya ge bohle bao ba phelago “ba tlo rutwa ke Jehofa, gomme khutšo ya bana ba gago e tlo ba e kgolo.” (Jesaya 54:13, PK) Se se šetše se direga ka tekanyo e itšego. Lefaseng ka bophara, Dihlatse tša Jehofa di tsebja ka baka la go godiša khutšo gare ga batho ba ditlogo tšeo di fapanego kudu. Batho bao ba rutwago melao ya motheo e phagamego ya Beibele ba katanela go phela ka botee go sa šetšwe dikgang tšeo di ka ba arolago ka tsela e itšego. Thuto ya Beibele e fetoša pono ya bona ka moka go tloga go ya lehloyo go ya go yeo e lego  ya lerato.—Johane 13:34, 35; 1 Ba-Korinthe 13:4-8.

Go sa šetšwe thuto, go nyakega ga tirišano ya lefase ka bophara ke kgale go lebelelwa e le karolo ya motheo go fedišweng ga dibetša. Ka mohlala, Komiti ya Ditšhaba-tšhaba ya Sefapano se Sehwibidu e bolelela gore setšhaba sa lefase ka moka se godiša ka botee megato ya go thibela le go fodiša tabeng ya go swaragana le tšhošetšo ya dithuthupi tša go epelwa fase.

Jehofa o holofetša go dira se se fetišago seo. Moporofeta Daniele o boletše e sa le pele gore: “Ké mo Modimo a tl’o xo tsoša mmušô wo o ka se kexo wa šwalalanywa neng le neng, . . . O tlo phšatla mebušô e mengwê ka moka [yeo e lego gona] wa e fediša; xe e le wôna, o tlo êma xo ya xo ile.”—Daniele 2:44.

Mmušo wa Modimo o tla phetha seo motho a ka se se kgonego. Ka mohlala, Psalme 46:9 e bolela ka mokgwa wa boporofeta gore: “[Jehofa] Mo-fediša-dintwa xo fihla mafelong a lefase, Mo-rôbaka-mará, Mo-thokxa-marumô, Mo-thšuma-dikôtsê-ka-mollô!” Mmušo wa Modimo o tla tliša maemo ao go wona motho a ka thabelago e le ka kgonthe khutšo le Mmopi wa gagwe gotee le mogagabo.—Jesaya 2:4; Tsefanya 3:9; Kutollo 21:3, 4; 22:2.

Augusto yo go boletšwego ka yena mathomong a sehlogo se se fetilego, o hwetša khomotšo molaetšeng wo wa Beibele. Batswadi ba gagwe bao e lego Dihlatse tša Jehofa, ba mo thuša gore a be le tumelo dikholofetšong tše kgahlišago tša Beibele. (Mareka 3:1-5) Ee, mo nakong ye o swanetše go kgotlelela ditla-morago tše bohloko tša sethuthupi sa go epelwa fase seo se mo golofaditšego. Lega go le bjalo, Augusto o lebeletše pele letšatšing la ge kholofetšo ya Modimo ya lefase le lefsa e tla be e le selo sa kgonthe. Moporofeta Jesaya o boletše e sa le pele gore: “[Nakong yeo, NW ] ké mo xo tl’o xo budollwa mahlô a difofu, . . . Ké mo dixôlê di tl’o xo taboxa bo-ka thsêpê.”—Jesaya 35:5, 6.

Paradeiseng yeo e tlago, dithuthupi tša go epelwa fase di ka se sa tšweletša kotsi bophelong le sethong sa mmele. Go e na le moo, batho bao ba phelago dikhutlong ka moka tša lefase ba tla dula ka polokego. Moporofeta Mika o e hlalositše ka tsela ye: “Motho ó tlo dula meriting ya morara w’axwe, le mo moriting wa moxó wa xaxwe, xò se e a ba thšošaxo; ka xobane xo boletše molomo wa Morêna wa mašaba.”—Mika 4:4.

Na o tla rata go ithuta ka mo go oketšegilego ka dikholofetšo tša Modimo go etša ge di hlalositšwe ka Lentšung la gagwe, Beibele? Ikopanye le Dihlatse tša Jehofa tša lefelong la geno goba o ngwalele atereseng e swanetšego e lokeleditšwego go letlakala 5 la makasine wo.

[Seswantšho go letlakala 8, 9]

Ka tlase ga Mmušo wa Modimo, dithuthupi tša go epelwa fase di ka se sa tšweletša kotsi