Ke Eng Seo Nonyana e ka se Rutago Mogolegwa?

KA MONGWALEDI WA PHAFOGA! AFRIKA BORWA

GO YA ka Sunday Tribune ya Durban, Afrika Borwa, dinonyana di kgatha tema go nolofatšeng dipelo tša bagolegwa Kgolegong ya Pollsmoor. Gona bjale, bagolegwa ba 14 ba tšea karolo lenaneong leo le akaretšago go hlokomela di-cockatiel le di-lovebird ka diseleng tša bona.

Na lenaneo le šoma bjang? Mogolegwa yo mongwe le yo mongwe yo a tšeago karolo o na le sealamedi sa motšwa-o-swere ka seleng ya gagwe. Lefotwana leo le sa tšwago go phaphaša le bewa tlhokomelong ya mogolegwa, yo a fepago sephedi se senyenyane seo se se nago thušo iri e nngwe le e nngwe goba tše pedi ka matsogo a gagwe, mosegare le bošego mo e ka bago dibeke tše hlano. Ke moka nonyana e bewa ka gare ga sefo, yeo le yona e bewago ka seleng. Ge nonyana e godile e rekišetšwa setšhaba. Bagolegwa ba bangwe ba tlwaela dinonyana tša bona kudu mo e lego gore ba a lla ge go arogana mo go sa phemegego go direga.

Gaešita le disenyi tše dingwe tše thata di fetogile tše boleta kudu le tše botho ka tsela e bonagalago ka morago ga go bolela le dinonyana le go di hlokomela letšatši le letšatši. Mogolegwa yo mongwe o itše: “Ke tlwaetša dinonyana, eupša le tšona di ntlwaeditše.” Yo mongwe o re dinonyana di mo rutile go se fele pelo le boitshwaro. Lehodu leo le golegilwego le re go hlokomela nonyana go le dirile gore le lemoge gore go ba motswadi “ke boikarabelo bjo bogolo”—selo seo le ilego la se hlokomologa ka bana ba lona nakong ya ge le be le lokologile.

Go hlokomela dinonyana tše go na le mohola o mongwe go bagolegwa. Wikus Gresse yo a ilego a hlama lenaneo o re: “Ka bokgoni bjo ba ithutago bjona mo, ba ka hwetša mošomo ka ntle bakeng sa go ba barui ba dinonyana goba setsebi sa malwetši a diphoofolo.”