Kamoo o ka Tlogelago ka Gona

GO SWANA le go ithuta go namela paesekele, go tlogela motšoko ga se gantši go fihlelelwago ge e ba o leka ka lekga la mathomo. Ka gona ge e ba o ikemišeditše go tlogela, o swanetše go itokišetša go dira maiteko a leboelela go fihlela o atlega. O se ke wa lebelela go boela morago e le phenyo. Go tšee bjalo ka phihlelo ya go ithuta, go boela morago mo gonyenyane go seo e ka bago lenaneo leo le atlegago. Ditšhišinyo tše dingwe tšeo di ilego tša šoma go ba bangwe ke tše. Di ka šoma gabotse le go wena.

Lokišeletša Monagano wa Gago Bakeng sa go Tlogela

■ Sa pele, o swanetše go ikgodiša gore go tlogela go nyaka boiteko. Dira lelokelelo la mabaka ao a dirago gore o nyake go tlogela, go akaretša le mehola ka moka. Ka morago ga ge o tlogetše, go hlahloba lelokelelo le gape go tla matlafatša phetho ya gago. Kganyogo ya go kgahliša Modimo ke lebaka le legolo la go tlogela. Beibele e re re swanetše go rata Modimo ka kgopolo, pelo, moya le matla a rena ka moka. Seo ke selo seo re ka se se dirego ge e ba re lemaletše motšoko.—Mareka 12:30.

■ Lekodišiša mekgwa ya gago e tlwaelegilego ya go kgoga e le gore o hwetše nako yeo o kgogago ka yona le gore ke ka baka la’ng o kgoga. O ka hwetša go hola go ngwala pampiring gore ke neng le kae mo o kgogago sekerete se sengwe le se sengwe ka letšatši le tlwaelegilego. Se se tla go thuša go bona e sa le pele maemo ao a ka go lekago gore o kgoge ka morago ga ge o tlogetše.

Rulaganya Letšatši la go Tlogela

■ Kgetha letšatši la go tlogela gomme o le swaye almanakeng ya gago. Go kaone go kgetha letšatši leo o tla bago o se ka tlase ga kgateletšego e kgolo ka mo go feteletšego. Ge letšatši leo le fihla, tlogela ka mo go feletšego—gatee-tee le sa ruri.

■ Pele ga ge letšatši la go tlogela le fihla, lahla dibjana tša go thinthela molora wa motšoko, mebankgwari le digotetši tša motšoko. Hlatswa diaparo tša gago ka moka tšeo di nkgago muši wa motšoko.

■ Hwetša thekgo ya bašomi-gotee le wena, bagwera le ba lapa bakeng sa go go kgothatša maitekong a gago a go tlogela. O se ke wa tšhaba go kgopela ba bangwe gore ba se ke ba kgoga pele ga gago.

■ Rulaganya mediro bakeng sa letšatši la gago la go tlogela. O ka ya felo go gongwe moo go kgoga go sa dumelelwego, bjalo ka go ya  musiamong goba lefelong la pontšho. O ka ba wa ithobolla—wa rutha goba go namela paesekele goba wa sepela lebaka le letelele.

Go Lebeletšana le go Tlogela

Ge e ba o le mokgogi wa paala, go na le kgonagalo ya gore o lebeletšane le maswao a go tlogela, ao a thomago diiri tše sego kae ka morago ga sekerete sa mafelelo. A a ka akaretša go selekega, go fela pelo, lehloyo, pelaelo, kgateletšego, go hlobaela, go se iketle, go ba le kganyogo ya dijo ka mo go oketšegilego le go kgalega disekerete. Mohlomongwe ngaka ya gago e ka go nea dihlare tšeo di ka thušago go kaonefatša dika tše. Go oketša moo, go na le dilo tšeo o ka di dirago go fenya ntwa.

■ Nakong ya dibeke tše sego kae tša mathomo tše thata, e-ja dijo tšeo di nago le di-kilojoule tše nyenyane gomme o nwe meetse a mantši. Ba bangwe ba hweditše go thuša go ja merogo e sa apewago, bjalo ka di-carrot le celery. Ge e ba o ithobolla, o tla thuša go theoša go oketšega ga boima bja mmele le go okobatša dikwi tše tšhogilego.

■ Phema mafelo le maemo ao o tla lekegago gore o kgoge.

■ Lwantšha go bea mabaka mo gobe mo go ka go lekago gore o kgoge. Tše dingwe tša dikgopolo tše tlwaelegilego nakong ya go tlogela ke tše: ‘Ke tla kgoga lehono feela e le gore ke kgone go lebeletšana le nako ye e thata.’ ‘Go kgoga ke bjona bobe bja-ka feela!’ ‘Motšoko e ka se be o mobe gakaalo; bakgogi ba bangwe ba paala ba phela go feta le nywaga e 90.’ ‘Ke tla bolawa ke selo se sengwe.’ ‘Bophelo ga bo bose ka ntle le motšoko.’

■ Ge o šetše o nyaka go lahlela toulo, diega. Ka go leta metsotso e lesome feela, go kgalega go matla go tla feta. Ka dinako tše dingwe go gopola ka go se sa kgoga gape go ka bonala e le selo se segolo. Ge e ba o ikwa bjalo, tsepamiša kgopolo mabapi le go tlogela lehono feela.

■ Ge e ba o nyaka go hlankela Modimo, rapelela thušo. Mmopi wa rena yo lerato a ka nea “thušo ka nako e swanetšego” bakeng sa bao ba katanelago go dira gore maphelo a bona a dumelelane le thato ya gagwe. (Ba-Hebere 4:16, bapiša le NW.) Eupša o se ke wa letela mohlolo. O swanetše go dira go dumelelana le dithapelo tša gago.

Dula o le yo a Kilego a Kgoga

■ Dikgwedi tše tharo tša mathomo ke tšona tše thata kudu, eupša gaešita le ka morago ga moo, ge e ba go kgonega, phema bakgogi le maemo ao a ka go lekago gore o kgoge.

■ O se ke wa iphora ka go nagana gore o ka ba mokgogi wa sewelo, gaešita le ge o tlogetše go kgoga lebaka la ngwaga goba go feta.

■ Lwantšha teko ya go kgoga “sekerete se tee feela.” Se tee feela se ka lebiša gabonolo go tše dingwe, gomme ka pela o tla be o sentše mošomo wa gago wo o o dirilego ka thata bakeng sa gore o tlogele. Lega go le bjalo, ge e ba o ka fokola gomme wa kgoga sekerete, ga go na lebaka la gore o kgoge se sengwe. Ge e ba o ka boela morago, tlogela gape.

Dimilione tša bakgogi di tlogetše ka katlego. Ka maikemišetšo le phegelelo, le wena o ka kgona!