Mongwaledi wa Ditšhaba tše di Kopanego, António Guterres ge a bolela mabapi le go hlaselwa ga naga ya Isiraele ke naga ya Iran ka Mokibelo wa di 13 April 2024, o itše: “Ga bjale ke nako ya go kaonefatša seemo go ena le go se mpefatša. Ke nako ya gore re itshware.”

 Ntwa ye ke e nngwe ya dintwa tšeo di diregago lefaseng ka moka.

 “Gona bjale lefaseng go na le dintwa tše dintšhi go feta tšeo di kilego tša ba gona ga e sale go tloga ka ntwa ya bobedi ya lefase. Se se bolela gore motho o tee go ba bane o ile a ama ke dintwa tše.”—United Nations Security Council, 26 January 2023.

 Dinaga tšeo di amilwego ke dintwa tše, di akaretša Isiraele, Gatsa, Siria, Azerbaijan, Ukraine, Sudan, Ethiopia, Niger, Myanmar, le Haiti. a

 Dintwa tše di tla fela neng? Na baetapele ba lefase ba ka tliša khutšo? Beibele e reng?

 Dintwa tšeo di lego gona lefaseng ka moka lehono, di bontšha gore e se kgale di tlo fela. Dintwa tše di phethagatša boporofeta bja Beibele bja mabapi le nako yeo re phelago go yona. Beibele e bitša nako ye gore ke “bofelo bja tshepedišo ya dilo.”—Mateo 24:3.

•   “Le tla kwa ka dintwa le dipego tša dintwa. . . . Gobane setšhaba se tla tsogela setšhaba gomme mmušo wa tsogela mmušo.”—Mateo 24:6,7.

 Bala sehlogo seo se rego “Ke dilo dife tšeo di Bontšhago gore re Phela ‘mehleng ya bofelo, ’goba ‘nakong ya bofelo’?” go bona gore dintwa tšeo di lego gona lehono di phethagatša boporofeta bja Beibele bjang.

 Beibele e bolela e sale pele gore go se kwane ga batho go tlo fela. Seo se tlo direga bjang? Ka ntwa ya Haramagedone e lego ‘ntwa ya letšatši le legolo la Modimo Ramatlaohle.’ E sego ka matla a batho. (Kutollo 16:14, 16) Ka morago ga ntwa ye, Modimo o tlo phethagatša tshepišo ya gagwe ya gore batho ba tlo thabela khutšo ya kamoo go sa felego.—Psalme 37:10, 11, 29.

 Go ithuta ka mo go oketšegilego ka ntwa ya Modimo yeo e tlago go fediša dintwa ka moka, bala sehlogo seo se rego “Ntwa ya Haramagedone ke Eng?”