Tsefanya 2:1-15
2 Kgobokanang, kgobokanangLena setšhaba sa go se hlabje ke dihlong.
2 Pele ga ge dilo tšeo di boletšwego di ka direga,Pele ga ge letšatši le feta go etša mooko woo o tšewago ke phefo,Pele ga ge Jehofa a ka le galefela,Le pele letšatši leo Jehofa a tlago go le galefela ka lona le ka fihla,
3 Tsomang Jehofa, lena bohle ba boleta* ba lefaseng,Lena bao le kwago melao* ya gagwe ya go loka.
Lekang ka thata go dira seo se lokilego le go bontšha boikokobetšo.
Mohlomongwe le ka šireletšwa letšatšing la kgalefo ya Jehofa.
4 Ka gobane Gatsa e tla ba motse wo o tlogetšwego,Ashikaloni yona e tlo ba lešope.
Ashidodo e tla rakwa mosegare wa sekgalela,Gomme Ekirone e tla fedišetšwa sa ruri.
5 “Ba madimabe ke bao ba agilego nageng yeo e lego kgauswi le lewatle, e lego lena Bakereta!
Jehofa o le ahlotše.
Wena Kanana naga ya Bafilisita, ke tlo go fediša,E le gore go se sa ba le yoo a dulago go wena.
6 Naga yeo e lego kgauswi le lewatle e tla ba mafuloAo a nago le didiba tša badiši le mašaka a dinku ao a dirilwego ka maswika.
7 E tla ba naga ya bana ba Juda bao ba šetšego, bao ba lego bjalo ka dinku.Ba tla fula moo.
Bošego ba tla robala dintlong tša Ashikaloni.
Ka gobane Jehofa Modimo wa bona o tla ba hlokomela,A ba a kgoboketša batho ba gabo bona bao ba thopilwego.”
8 “Ke kwele dikwero tša Moaba le maroga a Baamoni,Bao ba bego ba kwera batho ba ka e bile ba ikgogomoša ka go bolela gore ba tla ba tšeela naga ya bona.”
9 Jehofa wa madira, yena Modimo wa Isiraele o re: “Ruri ke ikana ka nna goreMoaba e tla swana le SodomaGomme bana ba Amoni ba swana le Gomora,Lefelo leo le tletšego ka meetlwa, naga yeo e tletšego letswai le naga yeo e se sa dulwago.
Batho ba ka bao ba phologago ba tla ba tšeela dilo tša bona.E bile batho ba setšhaba sa ka bao ba phologago ba tla ba tšeela naga ya bona.
10 Dilo tše di tlo ba diragalela ka ge ba ikgogomoša,Ka gobane ba ile ba kwera batho ba Jehofa wa madira ba ba ba ikgantšhetša bona.
11 Jehofa e tla ba yo a boifišago go bonaKa gobane o tla fediša medimo ka moka ya lefase,Gomme ditšhaba tšeo di dulago dihlakahlakeng di tla mo khunamela,Setšhaba se sengwe le se sengwe se le lefelong la sona.
12 Le lena Baethopia le tla bolawa ka tšhoša ya ka.
13 O tla emišetša letsogo la gagwe ka thoko ya leboa gomme a fediša Asiria.Le gona o tla senya Ninife gomme a e dira yeo e omilego go swana le leganata.
14 Mehlape le mehuta ka moka ya diphoofolo tša naga di tla robala go yena.
Nonyana yeo e bitšwago mogole gotee le noko di tla robala dintlheng tša diphilara tša gagwe.
Go tla kwagala lentšu leo le opelago lefasetereng.
Go tla ba le mokgobo wa ditšhila mojakongKa gobane mapolanka a motsedara a tla tlogelwa gore a fišwe ke letšatši le gore a nelwe ke pula.
15 Wo ke motse wo o ikgantšhago woo o bego o šireletšegile,Woo o bego o ipotša gore, ‘Ke nna ke nnoši, e bile ga go na yo mongwe.’
Ga bjale o fetogile selo sa go tšhoša,Lefelo leo diphoofolo tša naga di robalago go lona!
Yo mongwe le yo mongwe yo a fetago moo o tla letša molodi, a ba a šikinya hlogo ya gagwe.”
