Numeri 34:1-29
34 Jehofa a tšwela pele a bolela le Moshe a re:
2 “Botša Baisiraele o re: ‘Ge le tsena nageng ya Kanana, e lego naga yeo e tlago go ba bohwa bja lena, le e abelane go ya ka mellwane ya yona.
3 “‘Mollwane wa lena ka borwa o tloge ka lešoka la Tsini kgauswi le Edomo, gomme mollwane wa lena wa ka borwa o fihle Lewatleng la Letswai ka bohlabela.
4 Mollwane wa lena o arogele ka borwa tseleng ya Thaba ya Akirabimi e bile o fetele Tsini, gomme o felele ka borwa bja Kadeshe-baranea. Ke moka o fetele Hatsara-adara gomme o tšwele pele go fihla Atsimona.
5 Mollwane woo o aroge kua Atsimona o lebe Moeding wa Egepeta gomme o felele Lewatleng le Legolo.
6 “‘Mollwane wa ka bodikela e be Lewatle le Legolo le lebopo la lona. Wo e tla ba mollwane wa lena wa ka bodikela.
7 “‘Bjale mollwane wa lena wa ka leboa e tla ba wo: Mollwane wa lena o tloge ka Lewatle le Legolo o fihle ka Thaba ya Horo.
8 Go tloga ka Thaba ya Horo mollwane woo o fihle Lebo-hamathi, gomme o felele Tsedada.
9 Mollwane woo o fetele Tsifirone gomme o felele Hatsara-enane. Woo e tla ba mollwane wa lena wa ka leboa.
10 “‘Ke moka mollwane wa lena wa ka bohlabela o tloge Hatsara-enane o fihle Shefama.
11 Go tloga Shefama mollwane woo o fetele Ribila ka bohlabela bja Aini, o be o fetele ka bohlabela bja meboto ya Lewatle la Khinerethe.
12 Mollwane woo o fetele Nokeng ya Jorodane gomme o felele ka Lewatle la Letswai. Ye e tla ba naga ya lena le mellwane ya yona.’”
13 Bjale Moshe a botša Baisiraele a re: “Ye ke naga yeo le tlago go e abelana ka matengwa gore e be bohwa bja lena, go ya kamoo Jehofa a laetšego gore e newe meloko e senyane le seripa sa moloko wa Manase.
14 Ka gobane ba moloko wa Rubeni, ba moloko wa Gada le seripa sa ba moloko wa Manase ba šetše ba tšere bohwa bja bona.
15 Meloko yeo e mebedi le seripa e šetše e tšere bohwa bja yona ka bohlabela tikologong ya Noka ya Jorodane kgauswi le Jeriko ka thoko ya bohlabatšatši.”
16 Jehofa a tšwela pele a bolela le Moshe a re:
17 “Banna bao ba tlago go le arolela naga gore e be ya lena ke moperisita Eleasara le Joshua morwa wa Nuni.
18 Le gona molokong o mongwe le o mongwe le tšee kgošana e tee gore e le thuše go arola naga gore e be ya lena.
19 Maina a dikgošana tšeo šea: Molokong wa Juda ke Kalebe morwa wa Jefune,
20 molokong wa Simeone ke Shemuele morwa wa Amihudi,
21 molokong wa Benjamini ke Elidada morwa wa Kisilone,
22 molokong wa Dani ke Buki morwa wa Jogoli.
23 Go barwa ba Josefa, molokong wa Manase, ke Haniele morwa wa Efodi,
24 molokong wa Efuraime ke Kemuele morwa wa Shifitane,
25 molokong wa Sebulone ke Elisafane morwa wa Paranaka,
26 molokong wa Isakara ke Palatiele morwa wa Asane,
27 molokong wa Ashere ke Ahihudi morwa wa Shelomi,
28 molokong wa Nafutali ke Pedahele morwa wa Amihudi.”
29 Ba ke bona bao Jehofa a ba laetšego gore ba arolele Baisiraele naga ya Kanana.
