Numeri 26:1-65
-
Meloko ya Baisiraele e balwa ka lekga la bobedi (1-65)
26 Ka morago ga ge kotlo ya bolwetši e fetile, Jehofa a botša Moshe le Eleasara morwa wa moperisita Arone a re:
2 “Balang setšhaba ka moka sa Baisiraele go tloga ka ba mengwaga e 20 go ya godimo go ya ka meloko ya bona, le baleng ka moka bao ba ka kgonago go ya ntweng mo setšhabeng sa Isiraele.”
3 Ka gona Moshe le moperisita Eleasara ba bolela le bona leganateng la Moaba kgauswi le Noka ya Jorodane kua Jeriko, ba re:
4 “Balang batho ka moka ba go tloga ka ba mengwaga e 20 go ya godimo, go ya kamoo Jehofa a laetšego Moshe.”
Bjale Baisiraele bao ba tšwilego nageng ya Egepeta šeba:
5 Rubeni ke morwa wa mathomo wa Isiraele. Barwa ba Rubeni šeba: Ke Hanoge yo go yena go tšwilego moloko wa Bahanoge, Palu yo go yena go tšwilego moloko wa Bapalu,
6 Hetserone yo go yena go tšwilego moloko wa Bahetserone le Karami yo go yena go tšwilego moloko wa Bakarami.
7 Ba e be e le ba moloko wa Barubeni gomme bao ba bego ba ngwadišitšwe go bona e be e le ba 43 730 (dikete tše masomenne-tharo-makgološupa-masometharo).
8 Morwa wa Palu e be e le Eliaba.
9 Barwa ba Eliaba e be e le Nemuele, Dathane le Abirama. Dathane yo le Abirama ke bao ba bego ba kgethilwe setšhabeng, bao ba ilego ba lwa le Moshe le Arone le batho bao ba bego ba thekga Kora nakong ya ge ba be ba elwa le Jehofa.
10 Lefase le ile la bulega gomme la ba metša. Ge e le Kora yena, o ile a hwa le batho bao ba bego ba mo thekga ge mollo o be o tšhuma banna ba 250 (makgolopedi-masomehlano). Seo se ilego sa ba diragalela e ile ya ba mohlala wa temošo go ba bangwe.
11 Eupša barwa ba Kora bona ga se ba hwa.
12 Barwa ba Simeone go ya ka meloko ya bona šeba: Ke Nemuele yo go yena go tšwilego moloko wa Banemuele, Jamini yo go yena go tšwilego moloko wa Bajamini, Jakine yo go yena go tšwilego moloko wa Bajakine,
13 Tsera yo go yena go tšwilego moloko wa Batsera le Shaulo yo go yena go tšwilego moloko wa Bashaulo.
14 Ba e be e le ba moloko wa Basimeone. E be e le ba 22 200 (dikete tše masomepedi-pedi-makgolopedi).
15 Barwa ba Gada go ya ka meloko ya bona šeba: Ke Tsefone yo go yena go tšwilego moloko wa Batsefone, Hagi yo go yena go tšwilego moloko wa Bahagi, Shuni yo go yena go tšwilego moloko wa Bashuni,
16 Osini yo go yena go tšwilego moloko wa Baosini, Eri yo go yena go tšwilego moloko wa Baeri,
17 Arodi yo go yena go tšwilego moloko wa Baarodi le Areli yo go yena go tšwilego moloko wa Baareli.
18 Ba e be e le ba moloko wa Gada, gomme bao ba bego ba ngwadišitšwe go bona e be e le ba 40 500 (dikete tše masomenne-makgolohlano).
19 Barwa ba Juda e be e le Ere le Onane. Eupša Ere le Onane ba hwetše nageng ya Kanana.
20 Barwa ba Juda go ya ka meloko ya bona šeba: Ke Shela yo go yena go tšwilego moloko wa Bashela, Peretse yo go yena go tšwilego moloko wa Baperetse le Tsera yo go yena go tšwilego moloko wa Batsera.
21 Barwa ba Peretse e be e le Hetserone yo go yena go tšwilego moloko wa Bahetserone le Hamulu yo go yena go tšwilego moloko wa Bahamulu.
22 Ba e be e le ba moloko wa Juda, gomme bao ba bego ba ngwadišitšwe go bona e be e le ba 76 500 (dikete tše masomešupa-tshela-makgolohlano).
23 Barwa ba Isakara go ya ka meloko ya bona šeba: Ke Tola yo go yena go tšwilego moloko wa Batola, Pufa yo go yena go tšwilego moloko wa Bapuni,
24 Jashubu yo go yena go tšwilego moloko wa Bajashubu le Shimerone yo go yena go tšwilego moloko wa Bashimerone.
25 Ba e be e le ba moloko wa Isakara, gomme bao ba bego ba ngwadišitšwe go bona e be e le ba 64 300 (dikete tše masometshela-nne-makgolotharo).
26 Barwa ba Sebulone go ya ka meloko ya bona šeba: Ke Serede yo go yena go tšwilego moloko wa Baserede, Elone yo go yena go tšwilego moloko wa Baelone le Jahalele yo go yena go tšwilego moloko wa Bajahalele.
27 Ba e be e le ba moloko wa Basebulone, gomme bao ba bego ba ngwadišitšwe go bona e be e le ba 60 500 (dikete tše masometshela-makgolohlano).
28 Barwa ba Josefa go ya ka meloko ya bona e be e le Manase le Efuraime.
29 Barwa ba Manase e be e le Makiri yo go yena go tšwilego moloko wa Bamakiri. Makiri e be e le tatago Gileada, Gileada yo go yena go tšwilego moloko wa Bagileada.
30 Barwa ba Gileada šeba: Ke Jetsere yo go yena go tšwilego moloko wa Bajetsere, Heleke yo go yena go tšwilego moloko wa Baheleke,
31 Asiriele yo go yena go tšwilego moloko wa Baasiriele, Shikeme yo go yena go tšwilego moloko wa Bashikeme,
32 Shemida yo go yena go tšwilego moloko wa Bashemida le Hefere yo go yena go tšwilego moloko wa Bahefere.
33 Tselofehadi morwa wa Hefere yena o be a se na barwa eupša a na le barwedi feela, gomme maina a barwedi ba gagwe e be e le Maala, Noa, Hogola, Milika le Thiritsa.
34 Ba e be e le ba moloko wa Manase gomme bao ba bego ba ngwadišitšwe go bona e be e le ba 52 700 (dikete tše masomehlano-pedi-makgološupa).
35 Barwa ba Efuraime go ya ka meloko ya bona šeba: Ke Shuthela yo go yena go tšwilego moloko wa Bashuthela, Bekere yo go yena go tšwilego moloko wa Babekere le Tahane yo go yena go tšwilego moloko wa Batahane.
36 Morwa wa Shuthela e be e le Erane yo go yena go tšwilego moloko wa Baerane.
37 Ba e be e le ba moloko wa Efuraime, gomme bao ba bego ba ngwadišitšwe go bona e be e le ba 32 500 (dikete tše masometharo-pedi-makgolohlano). Bao e be e le barwa ba Josefa go ya ka meloko ya bona.
38 Barwa ba Benjamini go ya ka meloko ya bona šeba: Ke Bela yo go yena go tšwilego moloko wa Babela, Ashebele yo go yena go tšwilego moloko wa Baashebele, Ahirama yo go yena go tšwilego moloko wa Baahirama,
39 Shefufama yo go yena go tšwilego moloko wa Bashufama le Hufama yo go yena go tšwilego moloko wa Bahufama.
40 Barwa ba Bela e be e le Arede le Naamane. Arede go yena go tšwile moloko wa Baarede gomme go Naamane go tšwile moloko wa Banaamane.
41 Ba e be e le ba moloko wa Benjamini, gomme bao ba bego ba ngwadišitšwe go bona e be e le ba 45 600 (dikete tše masomenne-hlano-makgolotshela).
42 Barwa ba Dani go ya ka meloko ya bona šeba: Ke Shuhama yo go yena go tšwilego moloko wa Bashuhama. Ye e be e le meloko ya bana ba Dani.
43 Bao ba ngwadišitšwego melokong ka moka ya Bashuhama e be e le ba 64 400 (dikete tše masometshela-nne-makgolonne).
44 Barwa ba Ashere go ya ka meloko ya bona šeba: Ke Jimina yo go yena go tšwilego moloko wa Bajimina, Ishifi yo go yena go tšwilego moloko wa Baishifi le Beria yo go yena go tšwilego moloko wa Baberia.
45 Barwa ba Beria šeba: Ke Hebere yo go yena go tšwilego moloko wa Bahebere le Malakiele yo go yena go tšwilego moloko wa Bamalakiele.
46 Leina la morwedi wa Ashere e be e le Sera.
47 Ba e be e le ba moloko wa Ashere, gomme bao ba bego ba ngwadišitšwe go bona e be e le ba 53 400 (dikete tše masomehlano-tharo-makgolonne).
48 Barwa ba Nafutali go ya ka meloko ya bona šeba: Ke Jahasele yo go yena go tšwilego moloko wa Bajahasele, Guni yo go yena go tšwilego moloko wa Baguni,
49 Jesere yo go yena go tšwilego moloko wa Bajesere le Shileme yo go yena go tšwilego moloko wa Bashileme.
50 Ba e be e le ba meloko ya bana ba Nafutali, gomme bao ba bego ba ngwadišitšwe go bona e be e le ba 45 400 (dikete tše masomenne-hlano-makgolonne).
51 Baisiraele ka moka bao ba ngwadišitšwego e be e le ba 601 730 (dikete tše makgolotshela-tee-makgološupa-masometharo).
52 Ka morago ga moo Jehofa a re go Moshe:
53 “O arolele batho bao naga gore e be bohwa bja bona go ya ka palo ya bona.
54 Bao e lego ba bantšhi o oketše bohwa bja bona, gomme bao e lego ba banyenyane o fokotše bohwa bja bona. Moloko o mongwe le o mongwe o newe bohwa go ya ka palo ya bao ba ngwadišitšwego.
55 Eupša naga e arolwe ka go dira matengwa.* Moloko o mongwe le o mongwe o hwetše bohwa nageng yeo o e abetšwego.
56 Bohwa bja bao e lego ba bantšhi le bja bao e lego ba banyenyane bo tla arolwa go dirišwa matengwa.”
57 Bjale Balefi bao ba bego ba ngwadišitšwe go ya ka meloko ya bona šeba: Ke Gerishone yo go yena go tšwilego moloko wa Bagerishone, Kohathe yo go yena go tšwilego moloko wa Bakohathe le Merari yo go yena go tšwilego moloko wa Bamerari.
58 Ye ke meloko ya Balefi: Moloko wa Balebini, moloko wa Baheburone, moloko wa Bamaheli, moloko wa Bamushi le moloko wa Bakora.
Kohathe e bile tatago Amorama.
59 Leina la mosadi wa Amorama e be e le Jogobede morwedi wa Lefi, yoo Lefi a mmelegetšwego ke mosadi wa gagwe ge ba be ba le kua Egepeta. Bana ba Amorama le Jogobede e be e le Arone, Moshe le Miriamo kgaetšedi ya bona.
60 Bjale barwa ba Arone e be e le Nadaba, Abihu, Eleasara le Ithamara.
61 Eupša Nadaba le Abihu ba ile ba hwa ka baka la ge ba ile ba dira mollo wo Jehofa a bego a se a ba laela gore ba o dire.
62 Palo ya bao ba ngwadišitšwego e be e le ba 23 000 (dikete tše masomepedi-tharo), e lego masea a bašemane a go tloga ka wa kgwedi le banna ka moka. Ba be ba se ba ngwadišwa le Baisiraele, ka gobane ba be ba ka se newe bohwa mo setšhabeng sa Baisiraele.
63 Ba ke bao ba ngwadišitšwego ke Moshe le moperisita Eleasara ge ba be ba ngwadiša Baisiraele leganateng la Moaba kgauswi le Noka ya Jorodane kua Jeriko.
64 Eupša mo gare ga bona go be go se na yo a ilego a ngwadišwa ke Moshe le moperisita Arone ge ba be ba ngwadiša Baisiraele kua lešokeng la Sinai.
65 Ka gobane Jehofa o be a boletše ka bona a re: “Ba tla hwela lešokeng.” Ka gona go be go se na monna yo a šetšego mo go bona ge e se Kalebe morwa wa Jefune le Joshua morwa wa Nuni.
Mengwalo ya tlase
^ Bona Tlhaloso ya Mantšu.
