Lefitiko 9:1-24
-
Arone o dira dibego (1-24)
9 Ka letšatši la seswai Moshe a bitša Arone le barwa ba gagwe gotee le banna ba bagolo ba Isiraele.
2 Ke moka a re go Arone: “Tšea namane gore e be ya sebego sa gago sa sebe le nku e tona ya sebego sa go fišwa tšeo di phetšego gabotse gomme o di neele pele ga Jehofa.
3 Eupša o botše Baisiraele o re: ‘Tšeang phooko ya sebego sa sebe, le tšeeng le namane le nku e tona tšeo di phetšego gabotse, tšeo e nngwe le e nngwe ya tšona e nago le ngwaga o tee gore e be sebego sa go fišwa.
4 Le tšeeng le poo le nku e tona tša dihlabelo tša go dira khutšo le Modimo gomme le di hlabe pele ga Jehofa, le tšeeng le sebego sa mabele seo se tswakilwego le makhura, ka gobane lehono Jehofa o tla iponagatša go lena.’”
5 Ka gona ba tšea dilo tšeo Moshe a bego a ba laetše gore ba tle le tšona gomme ba di tliša pele ga taberenakele. Ke moka setšhaba ka moka sa batamela sa ema pele ga Jehofa.
6 Moshe a tšwela pele a re: “Seo ke se Jehofa a laetšego gore le se dire, e le gore Jehofa a le bontšhe letago la gagwe.”
7 Ke moka Moshe a re go Arone: “Batamela aletareng o neele sebego sa gago sa sebe le sebego sa gago sa go fišwa, e le gore wena le ba lapa la gago le lebalelwe dibe. Ka morago ga moo, o direle setšhaba sehlabelo gore se lebalelwe dibe. O dire seo go ya ka mokgwa wo Jehofa a laetšego ka gona.”
8 Kapejana Arone a batamela aletare gomme a hlaba namane ya sebego sa dibe tša gagwe.
9 Ke moka barwa ba Arone ba tliša madi a yona go yena, gomme yena a ina monwana wa gagwe go ona a a tlotša manakeng a aletare. Madi ka moka ao a šetšego a a tšhollela fase kgauswi le aletare.
10 Mo go sebego sa sebe a beša lekhura, dipshio le lekhura leo le lego sebeteng gore di thuntšhe muši aletareng, go ya le ka mokgwa wo Jehofa a bego a laetše Moshe.
11 Nama ya yona le letlalo la yona a di fiša ka mollo ka ntle ga ditente.
12 Ke moka a hlaba sebego sa go fišwa gomme barwa ba Arone ba mo fa madi a sona a a foketša mahlakoreng ka moka a aletare.
13 Ba mo fa diripana tša sebego sa go fišwa le hlogo ya sona gomme a di beša tša thuntšha muši aletareng.
14 Ke moka a hlatswa le mala le maoto a sona gomme a di beša tša thuntšha muši godimo ga sebego sa go fišwa seo se lego aletareng.
15 Ka morago ga moo a neela dibego tšeo setšhaba se di tlišitšego. A thoma pele ka go tšea pudi ya sebego sa dibe tša setšhaba a e hlaba a dira sebego sa sebe ka yona go swana le sebego sela sa pele.
16 Ke moka a neela sebego sa go fišwa gomme a se dira ka mokgwa wo dibego tša go fišwa di dirwago ka gona.
17 Go tloga moo a neela sebego sa mabele, a tlatša seatla sa gagwe ka a mangwe a ona, ke moka a a beša a thuntšha muši aletareng. O be a dira se go tlaleletša go sebego sa go fišwa seo se dirwago mesong.
18 Ka morago ga moo a hlaba poo le nku e tona, ya ba sehlabelo sa go dira khutšo le Modimo sa setšhaba. Ke moka barwa ba Arone ba mo fa madi a tšona a a foketša mahlakoreng ka moka a aletare.
19 Barwa bao ba Arone ba tšea makhura a poo, mosela o nonnego wa nku e tona, lekhura leo le khupeditšego mala, dipshio le lekhura leo le lego sebeteng.
20 Ba bea makhura ao ka moka dihubeng tša diphoofolo tšeo. Ka morago Arone a beša makhura ao gore a thuntšhe muši aletareng.
21 Eupša Arone a tšokoletša pele le morago dihuba tša diphoofolo tšeo le leoto la le letona, e le sebego sa go tšokotšwa pele ga Jehofa, go ya kamoo Moshe a bego a laetše ka gona.
22 Ke moka Arone a emišetša matsogo a gagwe setšhabeng a se šegofatša, gomme a theoga a etšwa aletareng ka morago ga go neela sebego sa sebe, sebego sa go fišwa le dihlabelo tša go dira khutšo le Modimo.
23 Mafelelong Moshe le Arone ba tsena ka taberenakeleng, ke moka ba tšwa ba šegofatša setšhaba.
Jehofa a bontšha setšhaba ka moka letago la gagwe.
24 Ke moka, Jehofa a romela mollo wa fiša sebego sa go fišwa le makhura aletareng. Ge setšhaba ka moka se bona seo, sa goeletša se thabile kudu sa ba sa wela fase ka difahlego.
