Lefitiko 7:1-38
7 “‘Molao wa sebego sa molato šo: Ke selo se sekgethwakgethwa.
2 Phoofolo ya sebego seo sa molato, e hlabelwe moo diphoofolo tša dibego tša go fišwa di hlabelwago gona gomme madi a yona ba a foketše ka mahlakoreng ka moka a aletare.
3 Moperisita a neele sebego seo le makhura a sona ka moka, a neele le mosela o nonnego le lekhura leo le khupeditšego mala,
4 le dipshio tše pedi gotee le makhura ao a lego godimo ga tšona. Ge e le lekhura leo le lego sebeteng, lona a le tloše gotee le dipshio.
5 Moperisita a di beše aletareng e be sebego sa go fišwa ka mollo seo se direlwago Jehofa. Ke sebego sa molato.
6 Banna bao e lego baperisita e be bona feela ba se jago. Ba se jele lefelong le lekgethwa. Ke selo se sekgethwakgethwa.
7 Sebego sa sebe le sebego sa molato di na le molao o tee. Nama ya dibego tšeo, e be ya moperisita yo a di neelago.
8 “‘Ge moperisita a neela sebego sa go fišwa bakeng sa motho le ge e le ofe, a tšee letlalo la phoofolo ya sebego seo gore e be la gagwe.
9 “‘Sebego se sengwe le se sengwe sa mabele seo se apewago sebešong, goba se apewago ka makhura a mantšhi ka pitšeng goba seo se gadikwago ka paneng, e be sa moperisita yo a se neelago.
10 Eupša sebego se sengwe le se sengwe sa mabele seo se tswakilwego le makhura goba seo se omilego, e be tša barwa ka moka ba Arone, ka moka ga bona ba hwetše tša go lekana.
11 “‘Molao wa sehlabelo sa go dira khutšo le Modimo seo motho le ge e le ofe a tlago go se tliša go Jehofa šo:
12 Ge e ba a tliša sehlabelo seo e le sehlabelo sa go leboga, gona a tliše le dinkgwa tša nkgokolo tšeo di sa omelwago tšeo di tswakilwego le makhura, diphaphatha tše sa omelwago tšeo di tloditšwego ka makhura le dinkgwa tša nkgokolo tšeo di dubilwego ka folouru yeo e šitšwego gabotse ye e tswakilwego le makhura.
13 Le gona ge a tliša dihlabelo tša gagwe tša go dira khutšo le Modimo, e le dihlabelo tša go leboga, a tliše le dinkgwa tšeo di nago le komelo.
14 Go mohuta o mongwe le o mongwe wa dinkgwa tšeo a tliše setee gore e be karolo e kgethwa yeo e išwago go Jehofa, e tla ba sa moperisita yo a foketšago madi a dihlabelo tša go dira khutšo le Modimo.
15 Motho yo a tlišago sehlabelo sa go dira khutšo le Modimo, e le sehlabelo sa go leboga, a je nama ya phoofolo yeo letšatšing leo a e neelago ka lona. A se ke a šadiša le ge e le efe ya yona go fihla mesong.
16 “‘Ge e ba sehlabelo sa gagwe a se neela ka gobane a dirile keno goba ka gobane a ithaopa, gona se jewe letšatšing leo a se neelago ka lona, gomme seo se šetšego sona se ka jewa letšatšing le le latelago.
17 Eupša nama yeo e šetšego ya sehlabelo seo e fišwe letšatšing la boraro.
18 Eupša ge e ba nama le ge e le efe ya sehlabelo sa gagwe sa go dira khutšo le Modimo e ka jewa letšatšing la boraro, Modimo a ka se amogele motho yo a e neelago. Nama ya sehlabelo seo e tlo dira gore a se ke a amogelwa. Ke selo sa go šišimiša gomme motho yo a jago e nngwe ya yona, o tlo otlwa ka baka la molato wa gagwe.
19 Nama yeo e ka kgwathago selo le ge e le sefe seo se sa hlwekago e se ke ya jewa. E fišwe ka mollo. Ge e le nama yeo e hlwekilego, yona e ka jewa ke motho yo mongwe le yo mongwe yo a hlwekilego.
20 “‘Motho yo a ka jago nama ya sehlabelo sa go dira khutšo le Modimo yeo e lego ya Jehofa, mola a se a hlweka, o swanetše go bolawa.
21 Ge motho a ka kgwatha selo le ge e le sefe seo se sa hlwekago, e ka ba ditšhila tša motho goba phoofolo e sa hlwekago goba selo le ge e le sefe se sa hlwekago seo se šišimišago, gomme a ba a ja nama ya sehlabelo sa go dira khutšo le Modimo yeo e lego ya Jehofa, gona motho yoo o swanetše go bolawa.’”
22 Jehofa a tšwela pele a bolela le Moshe a re:
23 “Botša Baisiraele o re: ‘Le se ke la ja lekhura le ge e le lefe la poo goba la nku e tona goba la pudi.
24 Makhura a phoofolo yeo le hweditšego e hwile le makhura a phoofolo yeo e bolailwego ke phoofolo e nngwe, le ka a šomiša go dira selo le ge e le sefe, eupša le se ke la a ja.
25 Motho le ge e le ofe yoo a jago makhura a phoofolo yeo a e neelago e le sebego sa go fišwa seo se direlwago Jehofa, a bolawe.
26 “‘Le se ke la ja madi le ge e le afe kae le kae moo le dulago gona, e ka ba e le a nonyana goba a phoofolo.
27 Motho le ge e le ofe yo a jago madi le ge e le afe a bolawe.’”
28 Jehofa a tšwela pele a re go Moshe:
29 “Botša Baisiraele o re: ‘Motho yo a tlišetšago Jehofa sehlabelo sa gagwe sa go dira khutšo le Modimo a tliše sebego seo gore e be sebego seo se yago go Jehofa.
30 A tliše lekhura leo le lego sehubeng* sa phoofolo yeo gore le tle le neelwe Jehofa e le sebego sa go fišwa. Ke moka a se tšokoletše pele le morago e le sebego sa go tšokotšwa pele ga Jehofa.
31 Moperisita a beše makhura ao gore a thuntšhe muši aletareng, eupša sehuba e be sa Arone le barwa ba gagwe.
32 “‘Dihlabelong tša lena tša go dira khutšo le Modimo, le neeng moperisita leoto la le letona e le karolo e kgethwa.
33 Morwa wa Arone yo a tlišago madi a dihlabelo tša go dira khutšo le Modimo gotee le makhura, e be yena a fiwago leoto la le letona.
34 Mo dihlabelong tša go dira khutšo le Modimo tša Baisiraele, ke tla tšea sehuba sa sebego se se tšokotšwago le leoto leo e lego karolo e kgethwa gomme ke tla di nea moperisita Arone le barwa ba gagwe. Wo ke molao wa go ya go ile go Baisiraele.
35 “‘Ye e be e le karolo yeo e bego e fiwa Arone le barwa ba gagwe go tšwa dibegong tša Jehofa tša go fišwa, go tloga letšatšing leo Jehofa a ba beilego gore e be baperisita ba gagwe.
36 Jehofa o laetše gore o tla ba nea yona letšatšing leo a bego a ba kgetha go Baisiraele gomme a ba tlotša gore e be baperisita ba gagwe. Wo ke molao wa go ya go ile melokong ya bona.’”
37 Wo ke molao woo o bego o swanetše go latelwa wa mabapi le sebego sa go fišwa, sebego sa mabele, sebego sa sebe, sebego sa molato, sehlabelo sa ge motho a bewa go ba moperisita le sehlabelo sa go dira khutšo le Modimo,
38 feela bjalo ka ge Jehofa a be a laetše Moshe Thabeng ya Sinai letšatšing leo a ilego a laela Baisiraele gore ba tlišetše Jehofa dibego tša bona lešokeng la Sinai.
Mengwalo ya tlase
^ Goba “kgareng.”
