Lefitiko 23:1-44
-
Matšatši a makgethwa le menyanya (1-44)
23 Jehofa a tšwela pele a bolela le Moshe a re:
2 “Botša Baisiraele o re: ‘Menyanya yeo Jehofa a le botšago gore le e keteke, ke dikopano tše kgethwa tša gore ka moka le bokane. Le swanetše go keteka* menyanya yeo. Menyanya ya ka še:
3 “‘Le ka dira mošomo le ge e le ofe ka matšatši a tshelelago, eupša ka letšatši la bošupa ke sabatha, e lego letšatši la go khutša. Ke letšatši la kopano e kgethwa, le se ke la dira mošomo le ge e le ofe. E swanetše go ba sabatha ya Jehofa kae le kae mo le dulago gona.
4 “‘Menyanya e mekgethwa yeo Jehofa a laetšego gore le e keteke še:
5 Kgweding ya pele, ka letšatši la bo-14, mantšiboa pele go eba le leswiswi,* ke paseka ya Jehofa.
6 “‘Ka letšatši la bo-15 la kgwedi ye, ke Monyanya wa Dinkgwa tše di sa Omelwago wo o direlwago Jehofa. Le fetše matšatši a šupago le eja dinkgwa tše di sa omelwago.
7 Letšatšing la pele le be le kopano e kgethwa. Le se ke la dira mošomo le ge e le ofe o boima.
8 Eupša le fetše matšatši a šupago le neela Jehofa sebego sa go fišwa ka mollo. Letšatšing la bošupa go be le kopano e kgethwa. Le se ke la dira mošomo le ge e le ofe o boima.’”
9 Jehofa a tšwela pele a bolela le Moshe a re:
10 “Botša Baisiraele o re: ‘Mafelelong ge le tsene nageng yeo ke le neago yona gomme le bunne mašemo a lena, le neeng moperisita ngata ya mabele a pele ao le a bunnego.
11 Moperisita a tšokoletše ngata yeo pele le morago a le pele ga Jehofa, e le gore Modimo a le amogele. A e tšokoletše pele le morago letšatšing la ka morago ga sabatha.
12 Letšatšing leo moperisita a tšokoletšago ngata yeo ya lena pele le morago, le neele nku e tona yeo e phetšego gabotse ya ngwaga o tee, gore e be sebego sa go fišwa seo se neelwago Jehofa.
13 Sebego sa sona sa mabele e be folouru yeo e šitšwego gabotse, yeo e tswakilwego le makhura ka sebjaneng sa dilithara tše nne le seripa, e be sebego sa go fišwa ka mollo sa go nkga bose seo se neelwago Jehofa. Sebego sa sona sa dino e be beine ya lithara e tee.
14 Le se ke la ja senkgwa le ge e le sefe, goba dithuthupe goba mabele a mananana go fihlela ka lona letšatši leo le tlišetšago Modimo wa lena sebego. Wo ke molao wa lena wa go ya go ile melokong ya lena ka moka kae le kae mo le dulago gona.
15 “‘Le baleng dibeke tše šupa* go tloga letšatšing la ka morago ga sabatha ye, e lego letšatšing la ge le tliša ngata ya sebego sa go tšokotšwa. Beke e nngwe le e nngwe, e be le matšatši ao a feletšego.
16 Le baleng matšatši a 50 go fihlela letšatšing la ka morago ga beke ya bošupa. Ke moka le neeleng Jehofa sebego sa mabele a mananana.
17 Le tlišeng dinkgwa tše pedi tšeo di tšwago dintlong tša lena gore e be sebego sa go tšokotšwa. E be tša folouru yeo e šitšwego gabotse, ya ka sebjaneng sa dilithara tše nne le seripa. Dinkgwa tšeo di apewe di na le komelo, le di neele Jehofa go tšwa go mabele ao le a bunnego pele.
18 Dinkgwa tšeo le di neele gotee le dinku tše tona tše dinyenyane tše šupago tše di phetšego gabotse, tšeo e nngwe le e nngwe ya tšona e nago le ngwaga o tee, gotee le powana e tee le dinku tše tona tše pedi. E be sebego sa go fišwa seo se neelwago Jehofa gotee le sebego sa mabele le dibego tša dino, e lego sebego sa go fišwa seo se nago le monkgo o bose wo o yago go Jehofa.
19 Le gona le neeleng putšanyana e tee e be sebego sa sebe, le dinku tše pedi tše tona tšeo e nngwe le e nngwe ya tšona e nago le ngwaga o tee, e be sehlabelo sa go dira khutšo le Modimo.
20 Moperisita a di tšokoletše pele le morago le dinkgwa tša korong yeo le e bunnego pele, a di tšokotše gotee le dinku tše pedi tše tona, e be sebego sa go tšokotšwa pele ga Jehofa. E swanetše go ba selo se sekgethwa go Jehofa seo e lego sa moperisita.
21 Ka lona letšatši leo, le bitšeng batho gore ba tle ba bokane kopanong e kgethwa. Le se ke la dira mošomo le ge e le ofe o boima. Woo ke molao wa lena wa go ya go ile, melokong ya lena kae le kae mo le dulago gona.
22 “‘Ge le buna mašemong a lena, le šie tšeo di lego ka mathoko a mašemo a lena le gona le se ke la topa dilo ka moka tšeo di šetšego ge le be le buna. Le šadišetšeng modiidi le motho yo e sego Moisiraele yo a dulago nageng ya gabo lena. Ke nna Jehofa Modimo wa lena.’”
23 Jehofa a tšwela pele a bolela le Moshe a re:
24 “Botša Baisiraele o re: ‘Ka letšatši la pele kgweding ya bošupa, le khutšeng. Letšatši le le tla tsebišwa ka go letša diphalafala, e le gore le dule le gopola gore ke kopano e kgethwa.
25 Le se ke la dira mošomo le ge e le ofe o boima, le gona le neele Jehofa sebego sa go fišwa.’”
26 Jehofa a tšwela pele a bolela le Moshe a re:
27 “Eupša letšatši la lesome la kgwedi ya bošupa, e be Letšatši la go Lebalelwa Dibe.* Lena le be le kopano e kgethwa, le bontšheng gore le nyamile ka baka la dibe tša lena gomme le neele nna Jehofa sebego sa go fišwa.
28 Letšatšing leo le se ke la dira mošomo le ge e le ofe, ka gobane ke letšatši leo moperisita a tlago go neela dihlabelo tša gore le lebalelwe dibe tša lena pele ga Jehofa Modimo wa lena.
29 Motho yo mongwe le yo mongwe yo a ka se bontšhego gore o nyamile ka baka la dibe tša gagwe letšatšing leo, a bolawe.
30 Le gona, ke tlo fediša motho yo mongwe le yo mongwe yo a dirago mošomo le ge e le ofe ka lona letšatši leo.
31 Le se ke la dira mošomo le ge e le ofe. Woo ke molao wa lena wa go ya go ile, melokong ya lena ka moka kae le kae mo le dulago gona.
32 Ke Sabatha, e lego letšatši la go khutša. Mantšiboa ka letšatši la senyane la kgwedi yeo le bontšhe gore le nyamile ka baka la dibe tša lena. Le boloke sabatha go tloga mantšiboeng a letšatši leo go fihla mantšiboeng a letšatši leo le latelago.”
33 Jehofa a tšwela pele a bolela le Moshe a re:
34 “Botša Baisiraele o re: ‘Ka letšatši la bo-15 la kgwedi ye ya bošupa, e be Monyanya wa Mešaša* wa go tumiša Jehofa ka matšatši a šupago.
35 Letšatši la pele e be la kopano e kgethwa e bile le se ke la dira mošomo le ge e le ofe o boima.
36 Le fetšeng matšatši a šupago le neela Jehofa sebego sa go fišwa. Letšatšing la seswai le be le kopano e kgethwa gomme le neeleng Jehofa sebego sa go fišwa. Ke seboka se sekgethwa sa go rapela Modimo. Le se ke la dira mošomo le ge e le ofe o boima.
37 “‘Yeo ke menyanya ya Jehofa yeo a le boditšego gore le e keteke, ke dikopano tše kgethwa tšeo go tšona le neelago Jehofa sebego sa go fišwa ka mollo, e lego sebego sa go fišwa, sebego sa mabele le dibego tša dino go ya ka seo se nyakegago letšatši le letšatši.
38 Dibego tše, ke tšeo le di neelago go tlaleletša tšeo le di neelago Jehofa ka disabatha tša gagwe, le go tlaleletša go dimpho tša lena, dibego tša lena tša dikeno le dibego tša lena tša go ithaopa, e lego tšeo le swanetšego go di neela Jehofa.
39 Eupša ka letšatši la bo-15 la kgwedi ya bošupa ge le bunne mašemo a lena, le fetše matšatši a šupago le keteka monyanya wa Jehofa. Letšatši la pele ke la go khutša, le letšatši la seswai ke la go khutša.
40 Letšatšing la pele le tšeeng dienywa tša mehlare e megolo, matlakala a mepalema, makala a mehlare yeo e nago le matlakala a mantšhi le makala a mehlare ya mepopoliri yeo e melago meeding ke moka le thabeng le le pele ga Jehofa Modimo wa lena ka matšatši a šupago.
41 Le fetše matšatši a šupago mo ngwageng le keteka monyanya wa go tumiša Jehofa. Wo ke molao wa go ya go ile melokong ya lena ka moka, le keteke monyanya wo ka kgwedi ya bošupa.
42 Le dule ditenteng ka matšatši a šupago. Baisiraele ka moka ba dule ditenteng,
43 e le gore meloko ya lena ye e tlago e tsebe gore ke ile ka dira gore Baisiraele ba dule ditenteng ge ke be ke ba ntšha Egepeta. Ke nna Jehofa Modimo wa lena.’”
44 Ka gona Moshe a botša Baisiraele ka menyanya ya Jehofa.
Mengwalo ya tlase
^ Goba “go tsebatša.”
^ Phetolelo ya lentšu ka lentšu e re, “magareng ga mantšiboa a mabedi.”
^ Phetolelo ya lentšu ka lentšu e re, “disabatha tše šupa.”
^ Goba “Letšatši la Poelano.”
^ Bona Tlhaloso ya Mantšu.
