Lefitiko 21:1-24
21 Jehofa a tšwela pele a bolela le Moshe a re: “Botša baperisita, e lego barwa ba Arone, o re: ‘Go se be le moperisita yo a itšhilafatšago ka go kgwatha setopo mo setšhabeng sa gabo.
2 Eupša a ka kgwatha setopo sa wa gabo, e lego sa mmagwe, tatagwe, morwa wa gagwe, morwedi wa gagwe, ngwanabo,
3 le sesi wa gagwe goba moratho wa gagwe wa ngwanenyana yo a sego a tšwa a robala le monna e bile a be a dula le yena, gomme a se a tšwa a nyalwa.
4 Mo setšhabeng sa gabo a se ke a itšhilafatša ka go kgwatha setopo sa mosadi yo a nyetšwego gomme se sa dira gore e se sa ba yo mokgethwa.
5 Baperisita ba se ke ba kota meriri ya dihlogo tša bona goba ba kota ditedu tša bona ka mathoko, e bile ba se ke ba ikgaya mebeleng ya bona.
6 E be ba bakgethwa go Modimo wa bona gomme ba se ke ba senya leina la Modimo wa bona, ka gobane ke bona ba neelago dibego tša Jehofa tša go fišwa ka mollo, e lego dihlabelo tša Modimo wa bona tšeo di dirilwego ka mollo, e bile e swanetše go ba ba bakgethwa.
7 Moperisita a se ke a nyala mogweba-ka-mmele goba mosadi yo a šetšego a kile a robala le monna. Le gona a se ke a nyala mosadi yo a hladilwego ke monna wa gagwe ka gobane moperisita ke yo mokgethwa go Modimo wa gagwe.
8 Ka gona le mo sware bjalo ka motho yo mokgethwa ka gobane ke yena a neelago dihlabelo tša Modimo wa lena. E be yo mokgethwa mo go lena, ka gobane nna Jehofa yo a le dirago gore le be setšhaba se sekgethwa, ke yo mokgethwa.
9 “‘Bjale ge e ba morwedi wa moperisita a ka itšhilafatša ka go gweba ka mmele, gona o dira gore tatagwe a nyatšege. O swanetše go bolawa gomme a fišwe ka mollo.
10 “‘Ge e le moperisita yo a phagamego, yoo mo gare ga baperisita* a tšhetšwego hlogong ka makhura a ge motho a tlotšwa, le yoo a kgethilwego go apara diaparo tša boperisita, a se ke a tlogela hlogo ya gagwe e le mahlafarara le gona a se ke a gagola diaparo tša gagwe.
11 A se ke a batamela setopo le ge e le sefe, gaešita le sa tatagwe goba sa mmagwe, e le gore a se ke a itšhilafatša ka tšona.
12 Le gona a se ke a tšwa ka sekgethweng gomme a šilafatša sekgethwa sa Modimo wa gagwe ka gobane seka sa go bontšha gore o ineetše, seo e lego makhura a Modimo wa gagwe a go tlotša motho ge a kgethwa, se mo go yena. Ke nna Jehofa.
13 “‘Moperisita o swanetše go nyala mosadi yo a sa kago a robala le monna.
14 A se ke a nyala mohlologadi, mosadi yo a hladilwego, mosadi yo a šetšego a kile a robala le monna, goba mogweba-ka-mmele. Eupša o swanetše go nyala mosadi yo mo setšhabeng sa gabo a sa kago a robala le monna.
15 A se ke a dira gore bana ba gagwe e se be ba bakgethwa mo setšhabeng sa gabo, ka gobane ke nna Jehofa yo a mo dirago yo mokgethwa.’”
16 Jehofa a tšwela pele a bolela le Moshe a re:
17 “Botša Arone o re: ‘Le ka mohla mo go bana ba gago le go ditlogolo tša gago, go se be le monna le o tee yo a golofetšego yo a ka batamelago go tlo neela dihlabelo tša Modimo wa gagwe.
18 Ge e ba go na le monna yo a golofetšego, a se ke a batamela sekgethwa. Go se ke gwa batamela motho yo a foufetšego, goba yo a hlotšago goba yo a nago le sefahlego seo se sekamego, goba yo a nago le leoto goba letsogo le letelele go feta le lengwe,
19 goba monna yo a robegilego leoto goba seatla,
20 goba wa lehutla,* goba yo mokopana kudu, goba yo a nago le bolwetši bja mahlo, goba yo a nago le lekhwekhwe, goba yo a tšwilego dipudi, goba yo a gobetšego dithaka tša peu ya gagwe ya bonna.
21 Monna le ge e le ofe yo a golofetšego wa leloko la Arone a se ke a batamela go tlo neela dibego tša go fišwa tša Jehofa. Ka ge a golofetše, a se ke a batamela go tlo neela dihlabelo tša Modimo wa gagwe.
22 A ka ja dihlabelo tšeo di neetšwego Modimo wa gagwe, e lego dilo tše kgethwakgethwa le tše kgethwa.
23 Eupša a se ke a batamela kgauswi le gareteine, le gona a se ke a batamela aletare ka gobane o golofetše. A se ke a šilafatša sekgethwa sa ka ka gobane ke nna Jehofa yo a dirago gore baperisita e be ba bakgethwa.’”
24 Ka gona Moshe a botša Arone, barwa ba gagwe le Baisiraele ka moka dilo tšeo.
