Jobo 41:1-34
-
Modimo o hlalosa tsela yeo kwena e kgahlišago (1-34)
41 “Na o ka swara kwena* ka huku ya go tanya dihlapi,Goba na o ka tlema leleme la yona ka thapo?
2 Na o ka tsenya thapo ka dinkong tša yona,Goba na o ka phula mehlagare ya yona ka huku?
3 Na e ka go kgopela gantšhintšhi gore o e gaugele,Goba na e ka bolela le wena ka boleta?
4 Na e ka dumela o dira kgwerano le yona,E le gore o e tšee gore e be lekgoba la gago bophelo ka moka?
5 Na o ka bapala le yona go swana le nonyana,Goba wa e kgoka ka thapo gore bana ba gago ba banenyana ba bapale le yona?
6 Na barei ba dihlapi ba ka e rekiša?
Na ba tla e arolela batho ba go rekiša?
7 Na o ka hlaba letlalo la yona ka dilo tša go swana le marumo,Goba na o ka hlaba hlogo ya yona ka marumo a go rea dihlapi?
8 Ge o ka bea seatla sa gago godimo ga yona,O ka se lebale gore e ile ya go hlasela bjang, gomme o ka se sa bušeletša.
9 Ge e ba o nagana gore o tlo e swara, gona o iphora ka lefeela.
Ge o e bona o tlo tšhoga kudu.
10 Ga go na yo a nago le sebete sa go e rumola.
Na go na le motho le o tee yoo a ka emago pele ga ka?
11 Ke mang yo a nneilego selo se itšego moo ke swanetšego go mo patela?
Dilo ka moka tšeo di lego ka tlase ga magodimo ke tša ka.
12 Nka se lese go bolela ka maoto a yona,Goba go bolela ka matla a yona le kamoo e bopegilego ka tsela e makatšago.
13 Ke mang yo a e tlošitšego letlalo la yona le lekoto?
Ke mang yo a ka batamelago kgauswi le molomo ya yona?
14 Ke mang yo a ka e gapeletšago go bula molomo wa yona?
Meno a yona ka moka a a tšhoša.
15 Mokokotlong wa yona go na le dikgapetla tšeo di dutšego ka go latelana,Tšeo di swaraganego.
16 Di swaragane gabotse,Gaešita le moya o ka se tsene mo gare ga tšona.
17 Di kgomarelane,Di swaragane e bile di ka se aroganywe.
18 Ge e ethimola seetša se a phadima,Gomme mahlo a yona a etša mahlasedi a mesong.
19 Ka ganong ga yona go tšwa seetša sa legadima,E bile go tšwa le ditlhase tša mollo.
20 Ka dinkong tša yona go tšwa muši,Bjalo ka ge eka ke muši woo mollo wa wona o goditšwego ka mahlakanoka.
21 Mohemo wa yona o dira gore magala a tuke,E bile ka ganong ga yona go tšwa kgabo ya mollo.
22 Molala wa yona o na le matla a magolo,Gomme diphedi ka moka tšeo di kopanago le yona di tlo tšhoga kudu.
23 Letlalo la mpa ya yona le tiile.Ke le le thata bjalo ka ge eka ke tšhipi, e bile le ka se tlošwe.
24 Pelo ya yona ke e thata bjalo ka ge eka ke leswika.Ke e thata go swana le lwala la go šila.
25 Ge e tsoga, le batho bao ba nago le matla ba a tšhoga.Ge e šikinya mosela wa yona ka matla ba a gakanega.
26 Ga go selo seo se ka e kwešago bohloko,E ka ba sabola, lerumo, mosebe goba sebetša le ge e le sefe.
27 E tšea tšhipi e le bjalo ka bjang,Gomme koporo e le bjalo ka kota yeo e bodilego.
28 Mosebe ga o dire gore e tšhabe,Go yona maswikana a seragamabje a fetoga mahlakana.
29 Go yona molamo o swana le lehlaka.E a sega ge e ekwa modumo wa lerumo leo le betšwago.
30 Dimpa tša yona di swana le dikarolwana tšeo di nago le dintlha tša moeta wo o pšhatlegilego.E pitikana ka lerageng tše e kego ke selei* sa go fola.
31 Ge e tsena ka lewatleng meetse a ba le maphiloBjalo ka ge eka ke pitša ya makhura e bela.
32 Mo e fetilego gona, go šala tsejana ya go phadima.
Motho a ka nagana gore meetse ao a na le moriri o mošweu.
33 Ga go na sephedi seo se swanago le yona mo lefaseng.Modimo o e dirile gore e se ke ya boifa selo.
34 E lebelela phoofolo e nngwe le e nngwe e sa boife selo.
Ke kgoši ya dibata ka moka tše kgolo tša nageng.”
