Jobo 11:1-20
11 Tsofara wa go tšwa Naama a araba a re:
2 “Na o nagana gore go ka se be le motho yo a arabago dilo tšeo o di boletšego?Goba na go bolela dilo tše dintšhi go tla dira gore motho e be yo a lokilego?
3 Na dilo tša go se re selo tšeo o di bolelago di ka dira gore batho ba homole?
Le gona na o ka dulela go kwera ba bangwe gomme gwa se be le yo a go phošollago?
4 E bile o re: ‘Seo ke se rutago ke nnete,Le gona Modimo o a tseba gore ga ke na molato.’
5 Eupša ge nkabe Modimo a be a ka bolela,Gomme a boledišana le wena,
6 O be a tla go botša diphiri tšeo di tlago go dira gore o be bohlale,Ka gobane ga go bonolo go kwešiša bohlale bja nnete.
Ke moka, o tla tseba gore Modimo o kgetha go se gopole e mengwe ya melato ya gago.
7 Na o ka kwešiša bohlale bjo bo tseneletšego bja Modimo,Goba wa kwešiša dilo ka moka ka Modimo Ramatlaohle?
8 Bohlale bjoo bo phagame go feta legodimo. Wena o ka dira’ng?
Bo tlasetlase go feta Lebitla.* Wena o ka tseba’ng?
9 Ke bjo botelele go feta lefase,Bo phatlaletše go feta lewatle.
10 Ge e ba Modimo a ka feta gomme a swara motho a mo sekiša,Ke mang yo a ka mo thibelago?
11 Ka gobane yena o tseba ge batho ba se na nnete.
Na a ka se bone ge dilo tše mpe di direga?
12 Eupša le setlaela se ka se kgone go kwešišaGo no swana le ge tonki e ka se tsoge ya tswala motho.
13 Ge e ba wena o ka lokiša pelo ya gago,Gomme wa rapela Modimo o mo emišeditše diatla,
14 Le gona ge e ba o dira selo se sebe, tlogela go se dira,Gomme o se ke wa dumelela dilo tšeo di sa lokago di dirwa ditenteng tša gago.
15 Ka gobane ge o ka dira bjalo, o tla kgona go tsoša sefahlego sa gago o sa hlabje ke dihlong,O tla ema o tiile o sa tšhoge selo.
16 O tlo lebala mathata a gago,O tla a lebala go swana le ge o lebala meetse ao a fetilego le noka.
17 Bophelo bja gago bo tla phadima go feta seetša sa mosegare,Le matšatši a thata bophelong bja gago, a tla swana le seetša sa mesong.
18 O ka se sa boifa selo ka gobane o tla be o na le seo o se tshepilego,Ke moka o tla lebelela ka mo le ka mo, gomme wa robala o šireletšegile.
19 O tla robala boroko, go se na motho yo a go tšhošago.Batho ba tla go swara ka tsela yeo e tlago go dira gore le wena o ba sware gabotse.
20 Eupša mahlo a batho ba babe a ka se sa bona gabotse,Gomme ba ka se hwetše lefelo leo ba ka tšhabelago go lona.E bile selo feela seo ba se tshepilego e tla ba go no letela lehu.”
Mengwalo ya tlase
^ Bona Tlhaloso ya Mantšu.
