Jesaya 46:1-13
46 Modingwana yo a bitšwago Bele o khuname, le yo a bitšwago Nebo o iname,
Diswantšho tša yona tša medingwana di beilwe godimo ga diruiwa le ditonki,E bile di swana le merwalo yeo e imelago diphoofolo tše di lapilego.
2 Medimo yeo e tla inama gomme ya khunama gotee,E ka se kgone go phološa merwalo yeo,Gomme yona ka boyona e tla išwa bothopša.
3 “Ntheetšeng, lena ditlogolwana tša Jakobo, lena bao le šetšego ba lapa la Isiraele,Lena ke le rwelego ga e sa le go tloga mathomong gomme ka le hlokomela go swana le ge mma a hlokomela leseana la gagwe.
4 Ke tla dula ke na le lena le ge le tšofetšeE bile le na le meriri e mešweu.
Ke tla le rwala, ka le thekga ka ba ka le phološa bjalo ka ge ke šetše ke ile ka dira bjalo.
5 Le tla ntshwantšha le mang goba la ntekanya le mang,Le gona le tla mpapiša le mang yo nna le yena re ka swanago?
6 Go na le bao ba tšhollago gauta ka bontšhi go tšwa dipekeng tša bona,Ba kala silifera sekaleng.
Ba hira motho wa go šoma ka tšhipi gomme a dira modimo ka yona.
Ke moka ba a o khunamela gomme ba o rapela.
7 Ba o rwala magetleng a bona,Ba o bea lefelong la wona gore o eme.
Ga o šuthe moo o emego gona.
Le ge ba o llela, ga o arabe.Ga o kgone go phološa motho mathateng a gagwe.
8 “Gopolang dilo tše gomme le be le sebete.
Naganišišang ka tšona lena bao le sa latelego molao.
9 Gopolang dilo tša kgalekgale,Gore ke nna Modimo gomme ga go na Modimo yo mongwe ka ntle le nna,
E bile ga go na Modimo le ge e le ofe yo a swanago le nna.
10 Go tloga mathomong ke bolela e sa le pele dilo tšeo di tlago go direga,E bile go tloga kgale ke bolela dilo tšeo di sego tša tšwa di direga,
Ke re: ‘Ye ke phetho ya ka, e bile e tla direga,’Le gona ke dira dilo ka moka tšeo di nkgahlago.
11 Ke bitša nonyana ya go ja nama go tšwa ka bohlabatšatši,Ke bitša motho go tšwa nageng ya kgole gore a tlo dira seo ke se phethilego.
Ke boletše e bile ke tla dira gore selo seo ke se boletšego se direge.
Ke dirile phetho e bile ke tla e phethagatša.
12 “Ntheetšeng lena ba dihlogo tše thata,Lena bao le lego kgole le go dira seo se lokilego.
13 Nako ya gore ke le bontšhe go loka ga ka e batametše.Ga e kgole,Le gona nako ya gore ke tle ke le phološe e ka se diege.
Ke tla phološa Tsione, ka nea Isiraele botse bja ka.”
