Jesaya 13:1-22
13 Molaetša wa mabapi le go ahlola motse wa Babilona woo Jesaya morwa wa Amotse a o bonego ponong šo:
2 “Emišang leswao thabeng yeo e se nago mehlare.
Ba bitšeng le ba emišetšeng matsogo,Gore ba kgone go tsena ka dikeiti tša dintona.
3 Ke neile bao ke ba kgethilego taelo.
Ke biditše mašole a ka ao a thabilego le ao a ikgantšhago,Gore a tle a otle bao ba ntirago gore ke galefe.
4 Theetšang! Dithabeng go kwagala lešataLeo ekego ke la batho ba bantšhi kudu!
Theetšang! Mebušo e tsošitše mpherefere,Ke mpherefere wa ditšhaba tšeo di kgobokanego!
Jehofa wa madira o kgobokanya mašole gore a ye ntweng.
5 Ba tla ba etšwa nageng ya kgole,Ba tšwa lefelong la kgolekgole ka tlase ga magodimo,Jehofa o tla le dibetša tša gagwe tšeo a di dirišago ge a galefile,Ba tletše go senya lefase ka moka.
6 “Llang, ka gobane letšatši la Jehofa le batametše!
Letšatšing leo Modimo Ramatlaohle o tla fediša dilo ka moka nageng ya lena.
7 Ke ka lebaka leo diatla tša batho ka moka di tlago go golofala,Gomme dipelo tša bona tša boifa kudu.
8 Batho ba gakanegile,
Ba a tšewatšewa e bile ba kwa bohloko,Go swana le mosadi yo a swerwego ke lešoko.
Ba lebelelana ka go makala,Gomme ba bonagala ba tšhogile mo difahlegong tša bona.
9 “Tsebang gore letšatši la Jehofa le a tla,E tla be e le le lešoro, le befile e bile e le le bogale,Le tlo dira gore naga e boifiše,E bile le tlo fediša badiradibe mo nageng.
10 Dinaledi tša magodimong le dihlopha tša tšona,Di ka se dire gore go be le seetša,Go tla no swiswala le ge letšatši le hlabile,Gomme seetša sa ngwedi se ka se bonege.
11 Ke tla sekiša bao ba dulago lefaseng ka baka la dilo tše mpe tšeo ba di dirago,Ka ba ka sekiša le batho ba babe ka baka la melato ya bona.
Ke tla dira gore batho bao ba ikgogomošago ba se sa ikgogomoša,E bile ke tla kokobetša batho bao ba gatelelago ba bangwe.
12 Ke tla dira gore motho a bonwe ka sewelo go feta gauta e hlwekilego,E bile batho ba tlo bonwa ka sewelo go feta gauta ya Ofira.
13 Ke ka baka leo nna Jehofa wa madira ke tlago go dira gore magodimo a thothomele,Gomme letšatšing la ge ke galefile kudu,Ke tla dira gore lefase le šikinyege gomme le šuthe madulong a lona.
14 Motho yo mongwe le yo mongwe o tla boela setšhabeng sa gabo,Gomme yo mongwe le yo mongwe a tšhabela nageng ya gabo,Go no swana le kgama* yeo e tsongwago, le go swana le mohlape wa dinku le dipudi woo o se nago modiši.
15 Motho le ge e le ofe yo a hwetšwago ke manaba o tla hlabja gomme a hwa,E bile motho le ge e le ofe yoo manaba ao a ka mo swarago, o tla bolawa ka lerumo.
16 Manaba a tla rathaganya bana ba bona mo pele ga mahlo a bona,A tšea dithoto tšeo di lego ka dintlong tša bona,Gomme a kata le basadi ba bona.
17 “Ke dira gore Bamede,Bao ba tšeago silifera e se selo,E bile ba sa kgahlwe le ke gauta, ba lwe le bona.
18 Bora bja bona bo tla rathaganya masogana,E bile ba ka se šokele bana ba bona bao ba tšwilego dipopelong tša bona,E bile ba ka se ba kwele bohloko.
19 Babilona yeo e nago le letago go feta mebušo e mengwe,E lego motse o mobotse woo Bakaladea ba ikgantšhago ka wona,O tla swana le Sodoma le Gomora ge Modimo a be a di fediša.
20 Go ka se sa ba le motho yo a dulago go wona,E bile go ka se be le motho yo a agago go wona go tloga molokong o mongwe go ya go o mongwe.
Le Moarabia a ka se hlome tente ya gagwe moo,E bile ga go na badiši bao ba tlago go fudiša mehlape ya bona moo.
21 Dibata tša leganata di tla robala moo,Dintlo tša batho di tla tlala maribiši.
Dimpšhe di tla dula moo,Gomme dipudi tša naga tšona di tla tshelatshela moo.
22 Diphoofolo tša nageng di tla lla di le ka dintlong tša bona tša ka bogošing,Gomme diphukubje tša lla di le ka mošate.
Motse wa Babilona o kgauswi le go ahlolwa, gomme matšatši a wona a badilwe.”
Mengwalo ya tlase
^ Kgama ke phoofolo yeo e nyakilego e swana le phala.
