Jeremia 27:1-22
27 Ge Jehoyakima morwa wa Josia, kgoši ya Juda, a be a thoma go buša, Jehofa o ile a bolela le Jeremia.
2 Ke moka Jeremia a re: “Jehofa o mpoditše gore: ‘Itirele dithapo le dijoko gomme o di rwale molaleng wa gago.
3 O di romele go kgoši ya Edomo, go kgoši ya Moaba, go kgoši ya Baamoni, go kgoši ya Tiro le go kgoši ya Sidone o diriša batho bao ba tlilego Jerusalema go Kgoši Tsedekia wa Juda.
4 O ba botše gore ba botše dikgoši tša bona ba re:
“‘“Jehofa wa madira, yena Modimo wa Isiraele, o re le botšeng dikgoši tša lena le re:
5 ‘Ke nna ke dirilego lefase, batho le diphoofolo ka moka tšeo di lego lefaseng ke diriša seatla sa ka se matla le matla a ka a magolo, gomme ke di neile motho le ge e le ofe yo ke nyakago go mo nea tšona.
6 Bjale nna ke neile mohlanka wa ka Kgoši Nebukadinetsara wa Babilona dinaga tše ka moka, ke mo neile le diphoofolo tša naga gore di mo hlankele.
7 Ditšhaba ka moka di tla hlankela yena, morwa wa gagwe le setlogolo sa gagwe go fihlela mmušo wa gagwe o fela. Ka morago ga moo ditšhaba tše dintšhi le dikgoši tše dikgolo di tla mo dira lekgoba la tšona.’
8 Jehofa o re: “‘“‘Ge go ka ba le mmušo goba setšhaba seo se ganago go hlankela Kgoši Nebukadinetsara wa Babilona le seo se ganago go rwala joko ya kgoši ya Babilona, ke tla otla setšhaba seo ka sabola, tlala le bolwetši, go fihlela ke se fedišitše ka seatla sa gagwe.’
9 “‘“‘Ka gona, le se ke la theetša baporofeta ba lena, batho bao ba rego ba kgona go bolela dilo tšeo di sa tlago go direga, bao ba lorago ditoro, bao ba tsebago maleatlana le baloi bao ba rego: “Le ka se hlankele kgoši ya Babilona.”
10 Ka gobane ba le porofetela maaka e le gore le išwe kgole le naga ya lena, gomme nna ke tla le phatlalatša le go le fediša.
11 Jehofa o re: “‘“‘Eupša setšhaba seo se tlago go rwala joko ya kgoši ya Babilona le go e hlankela, ke tla dira gore se se ke sa tloga nageng ya sona, gomme se tla e lema le go dula go yona.’”’”
12 Gaešita le Kgoši Tsedekia wa Juda ke mmoditše ka wona mokgwa woo, ka re: “Rwalang joko ya kgoši ya Babilona melaleng ya lena gomme le hlankele yona le batho ba yona, ke moka le tla tšwela pele le phela.
13 Ke ka baka la’ng wena le batho ba gago le swanetše go bolawa ka sabola, tlala le bolwetši, go ya ka seo Jehofa a se boletšego ka setšhaba seo se ka se hlankelego kgoši ya Babilona?
14 Le se ke la theetša seo baporofeta ba le botšago sona ge ba re: ‘Le ka se hlankele kgoši ya Babilona,’ ka gobane seo ba le porofetelago sona ke maaka.
15 Jehofa o re: “‘Ga se ka ba roma, eupša bona ba porofeta maaka ba diriša leina la ka, ka baka leo ke tla le phatlalatša ka ba ka le fediša, lena gotee le baporofeta bao ba le porofetelago.’”
16 Ke ile ka botša baperisita le batho ba ka moka, ka re: “Jehofa o re: ‘Le se ke la theetša dilo tšeo baporofeta ba lena ba le porofetelago tšona ba re: “Tsebang gore dibjana tša ntlo ya Jehofa di kgauswi le go bušwa Babilona!” Ka gobane ba le porofetela maaka.
17 Le se ke la ba theetša. Hlankelang kgoši ya Babilona gomme le tla tšwela pele le phela. Goreng motse wo o swanetše go fetoga mašope?
18 Eupša ge e ba ka nnete baporofeta ba ba bolela molaetša wo o tšwago go Jehofa, gona anke ba kgopele Jehofa wa madira gore dibjana tšeo di šetšego ntlong ya Jehofa, ntlong ya kgoši ya Juda le Jerusalema di se ke tša išwa Babilona.’
19 “Ka gobane Jehofa wa madira o boletše mabapi le diphilara, sebjana se segolo sa koporo, dikariki le dibjana tšeo di šetšego motseng wo,
20 tšeo Kgoši Nebukadinetsara wa Babilona a sego a di tšea ge a be a thopa Jekonia morwa wa Jehoyakima, kgoši ya Juda, a mo thopa Jerusalema a mo iša Babilona. O ile a thopa yena gotee le bakgomana ka moka ba Juda le ba Jerusalema.
21 Jehofa wa madira, yena Modimo wa Isiraele, o boletše mabapi le dibjana tšeo di šetšego ntlong ya Jehofa, le ntlong ya kgoši ya Juda le Jerusalema gore:
22 ‘“Di tla išwa Babilona gomme tša ba moo go fihlela ke tlo di tšea,” o realo Jehofa. “Ke moka ke tla di buša gomme ka di bea lefelong la tšona.”’”
