Hosea 1:1-11

  • Mosadi wa Hosea le bana bao a mmelegetšego bona (1-9)

    • Jeseriele (4), Loruhama (6) le Loammi (9)

  • Kholofelo ya gore Isiraele e tla tsošološwa gomme ya ba le botee (10, 11)

1  Jehofa o boletše le Hosea* morwa wa Beeri mehleng ya Usia, Jothama, Ahasi le Hesekia, e lego dikgoši tša Juda, le mehleng ya Jeroboama morwa wa Joashe kgoši ya Isiraele. 2  Jehofa o ile a thoma go bolela le Hosea gomme Jehofa a re: “Sepela o yo nyala mosadi yo a tlago go itshwara bjalo ka mogweba-ka-mmele le yo a tlago go ba le bana le banna ba bangwe, gobane batho ba naga ye ba itshwere bjalo ka bagweba-ka-mmele ka ge ba se ba botegela Jehofa.” 3  Hosea a ya a nyala Gomere morwedi wa Dibilaima, ke moka a ima a mmelegela ngwana wa mošemane. 4  Ke moka Jehofa a re go Hosea: “Mo reele leina la Jeseriele,* gobane e se kgale ke tlo otla ditlogolo tša Jehu ka ge di bolaile batho ba Jeseriele. Le gona ke tlo fediša pušo ya dikgoši tša Isiraele. 5  Letšatšing leo ke tla bolaela mašole a Isiraele Moeding wa Jeseriele.” 6  Gomere a ima gape ke moka a belega ngwana wa ngwanenyana. Modimo a re go Hosea: “Mo reele leina la Loruhama,* ka gore nka se sa kwela bohloko ba ntlo ya Isiraele, ruri ke tla ba raka. 7  Eupša ba ntlo ya Juda ke tla ba kwela bohloko, ka ba phološa, nna Jehofa Modimo wa bona. Eupša nka se ba phološe ka bora goba ka sabola goba ka ntwa le ge e le ka dipere goba ka banamedi ba tšona.” 8  Ka morago ga ge Loruhama a tshwele letswele, Gomere o ile a ima gape gomme a ba le ngwana wa mošemane. 9  Modimo a re: “Mo reele leina la Loammi,* ka gobane lena ga le sa le batho ba ka gomme nna nka se be Modimo wa lena. 10  “Ka gona palo ya Baisiraele e tla swana le santa ya lewatleng yeo go se nago motho yo a ka kgonago go e kala goba go e bala. Lefelong leo ke ba boditšego gore: ‘Ga le sa le batho ba ka’ ke tla ba botša gore: ‘Le bana ba Modimo yo a phelago.’ 11  Ke tla kgoboketša bana ba Juda le bana ba Isiraele ya ba selo setee ke moka ba tla ikgethela moetapele ba tšwa nageng, ka gobane le e tla ba letšatši le bohlokwa go Jeseriele.

Mengwalo ya tlase

^ Khutsofatšo ya leina Hoshaya, leo le rago gore “Go phološwa ke Jah; Jah o Phološitše.”
^ Leina le le ra gore, “Modimo o tla Bjala Peu.”
^ Leina le le ra gore, “Ga se a Bontšhwa Kgaugelo.”
^ Leina le le ra gore, “Ga se Batho ba ka.”
PHETOLELO YA LEFASE LE LEFSA YA MANGWALO A MAKGETHWA
Hosea 1
Sepedi
Bala Beibele Inthaneteng
https://cms-imgp.jw-cdn.org/img/p/1001061103/univ/art/1001061103_univ_sqr_xl.jpg
nwt