Genesi 44:1-34
44 Ka morago Josefa a botša monna yo a bego a hlokomela ntlo ya gagwe a re: “Tlatša mekotla ya banna ba ka dijo tšeo ba ka kgonago go di rwala, gomme o tsenye tšhelete ya yo mongwe le yo mongwe ka mokotleng wa gagwe.
2 Eupša o tsenye komiki ya ka ya silifera ka mokotleng wa yo monyenyane go bona, o be o tsenye le tšhelete ya mabele a gagwe.” Ka gona monna yoo a dira kamoo Josefa a mmoditšego ka gona.
3 Mesong ge go šetše go sele, banna bao ba lokollwa gore ba sepele, bona le ditonki tša bona.
4 Ba be ba se ba tšwa ba fihla kgole le motse ge Josefa a botša monna yoo a hlokometšego ntlo ya gagwe gore: “Sepela o yo rakediša banna bale! Ge o ba hweditše o re go bona: ‘Na ye ke yona tsela yeo le lebogago mong wa ka ka yona?
5 Ke ka baka la’ng le tšere komiki yeo mong wa ka a nwago ka yona, le yeo a e dirišago go bolela e sa le pele dilo tšeo di tlago go direga? Le dirile selo se sebe.’”
6 Mafelelong a ba hwetša gomme a ba botša mantšu ao.
7 Eupša bona ba re go yena: “Go re’ng mong wa rena a bolela ka tsela yeo? Rena bahlanka ba gago re ka se tsoge re dirile selo sa mohuta woo.
8 Ge e ba re tlogile kua Kanana ra tliša tšhelete yeo re e hweditšego ka mekotleng ya rena, na ruri re ka utswetša mong wa gago silifera goba gauta?
9 Ge e ba o ka hwetša gore yo mongwe wa rena o e swere, gona motho yoo a a hwe, gomme rena ka moka re be makgoba a mong wa rena.”
10 Ke moka a re: “A go be ka mokgwa woo le boletšego ka gona. Yoo komiki yeo e tlago go hwetšwa go yena e tla ba lekgoba la ka, eupša lena ba bangwe ka moka le ka se bonwe molato.”
11 Kapejana yo mongwe le yo mongwe a theošetša mokotla wa gagwe fase gomme a o bula.
12 Monna yoo a phuruputša ka mekotleng ya bona, a thoma ka wa yo mogolo a feleletša ka wa yo monyenyane. Mafelelong komiki yeo ya hwetšwa ka mokotleng wa Benjamini.
13 Ke moka ba gagola diaparo tša bona ba nyamile gomme yo mongwe le yo mongwe a bušetša morwalo tonking ya gagwe, ba boela motseng.
14 Ge Juda le bana babo ba tsena ka ntlong ya Josefa, o be a sa le ka moo, ka gona ba ile ba wela fase pele ga gagwe.
15 Bjale Josefa a re go bona: “Ke ka baka la’ng le ntirile selo se se sebe? Na le be le sa tsebe gore monna wa go swana le nna o kgona go bolela e sa le pele dilo tšeo di tlago go direga?”
16 Ke moka Juda a re: “Re tla re’ng go wena mong wa rena? Re ka go hlalosetša bjang taba ye? Re ka dira’ng go go bontšha gore ga re na molato? Modimo wa nnete o bone molato woo re o dirilego nakong e fetilego. Gona bjale re makgoba a gago mong wa rena, rena le yoo a hweditšwego a swere komiki ya gago.”
17 Eupša Josefa a re: “Nka se le dire makgoba a ka ka moka ga lena! Eupša monna yoo komiki e hweditšwego go yena ke yena e tlago go ba lekgoba la ka. Ge e le lena ba bangwe ka moka le ka ikela go tatago lena.”
18 Bjale Juda a mmatamela gomme a re: “Ke a go rapela mong wa ka, ke kgopela o ntheetše hle, ka ge o na le matla ao a lekanago le a Farao ke kgopela o se ke wa nkgalefela.
19 Wena mong wa ka o ile wa re botšiša gore: ‘Na tatago lena o sa phela goba na le na le ngwanabo lena yo mongwe?’
20 Rena ra re go wena mong wa ka: ‘Tatago rena o sa phela e bile re na le ngwanabo rena yo monyenyane yo a bilego le yena a šetše a tšofetše. Eupša ngwanabo o ile a hlokofala gomme gwa šala yena a nnoši go bana ba mmagwe, le gona tatagwe o mo rata kudu.’
21 Ka morago ga moo wa re go rena: ‘Mo tlišeng mo go nna gore ke tle ke mmone.’
22 Eupša rena ra re go wena: ‘Mošemane yoo a ka se kgone go tlogela tatagwe. Ge a ka mo tlogela, tatagwe o tlo hwa.’
23 Ke moka wena wa re go rena: ‘Ge ngwanabo lena yo monyenyane a ka se tle mo le lena, gona le se ke la boa mo pele ga ka.’
24 “Ke moka rena ra ya go tatago rena, gomme ra mmotša seo o se boletšego.
25 Ka morago tatago rena a re: ‘Boelang Egepeta le yo re rekela dijo.’
26 Eupša rena ra re: ‘Re ka se kgone go boela morago. Ge e ba ngwanabo rena yo monyenyane a sepela le rena, gona re tla ya, ka gobane re ka se kgone go ya pele ga monna yola ge e ba ngwanabo rena a se na le rena.’
27 Ke moka tate a re go rena: ‘Le tseba gabotse gore mosadi wa ka o mpelegetše barwa ba babedi feela.
28 Ka morago yo mongwe wa bona o ile a ntlogela gomme ka re: “Joo nna, o swanetše go ba a bolailwe ke sebata!” Ga sa nka ka mmona go ba go fihlela lehono le.
29 Ge e ba le ka tšea le yo gomme a welwa ke kotsi a hlokofala, gona le tla mpoloka ke tšofetše e bile ke nyamile.’
30 “Tatago rena o rata mošemane yo kudu gomme a ka se kgone go phela ntle le yena. Bjale ge e ba nka boela go tate ke sa sepele le mošemane yo,
31 gona e tla re gateetee ge a bona gore mošemane yo ga a gona, o tlo hwa, gomme ra mmoloka a tšofetše e bile a nyamile.
32 Nna lekgoba la gago ke boditše tate gore ke tla šireletša mošemane yo, gomme ka re go yena: ‘Ge e ba nka se mmušetše go wena, gona ke tla be ke go diretše sebe bophelo bja ka ka moka.’
33 Bjale hle ke kgopela gore go šale nna go ena le gore go šale mošemane yo e le lekgoba la gago, gore mošemane yo a boele morago le bana babo.
34 Nka boela bjang go tate ke sa sepele le mošemane yo? Ga ke nyake go bona tate a ekwa bohloko.”
