Genesi 28:1-22
28 Ke moka Isaka a bitša Jakobo a mo šegofatša gomme a re go yena: “O se ke wa nyala mosadi wa Mokanana.
2 Sepela o ye Padana-arama lapeng la Bethuele tatago mmago, gomme gona moo o nyale yo mongwe wa barwedi ba Labane malomeago.
3 Modimo Ramatlaohle o tla go šegofatša, a dira gore o be le bana ba bantši, gomme o tla ba tatago meraforafo.
4 O tla go šegofatša ka ge a tshepišitše Aborahama, o tla šegofatša wena le bana ba gago, e le gore o dule nageng yeo o bego o dula go yona o le motšwantle, e lego naga yeo Modimo a e neilego Aborahama.”
5 Ka gona Isaka a laelana le Jakobo gomme Jakobo a leba Padana-arama, a ya go Labane morwa wa Bethuele wa Moarama, e lego buti wa Rebeka mmago Jakobo le Esau.
6 Esau o ile a bona gore Isaka o šegofaditše Jakobo e bile o mo laetše gore a ye Padana-arama gore a tšee mosadi moo, le gore ge a be a mo šegofatša o ile a mmotša gore: “O se ke wa nyala mosadi wa Mokanana.”
7 Le gona Esau o ile a bona gore Jakobo o be a ekwa tatagwe le mmagwe gomme a eya Padana-arama.
8 Dilo tše ka moka di ile tša bontšha Esau gore Isaka tatagwe o be a sa kgahlwe ke basadi ba Bakanana.
9 Ka gona Esau a ya go Baishimaele a nyala Mahalatha go oketša go basadi ba bangwe bao a bego a na le bona. Mahalatha e be e le ngwanabo Nebayothe e bile e le morwedi wa Ishimaele morwa wa Aborahama.
10 Jakobo a tloga Beresheba a leba Harane.
11 Ge nako e dutše e eya o ile a fihla lefelong le lengwe a robala moo ka gobane letšatši le be le sobetše. Ka gona a tšea le lengwe la maswika a lefelong leo a le samela gomme a robala moo.
12 Ke moka a lora a bona ditepisi tšeo di tlogago mo lefaseng gomme di fihla magodimong, a bona barongwa ba Modimo ba rotoga e bile ba theoga ka tšona.
13 A bona Jehofa a le ka godimo ga tšona, gomme Modimo a re:
“Ke nna Jehofa Modimo wa Aborahama rakgolo wa gago le Modimo wa Isaka. Ke tlo nea wena le bana ba gago naga ye le lefelo leo o robetšego go lona.
14 Bana ba gago e tla ba bantši go swana le lerole la lefase, ba tla phatlalala ka bodikela, bohlabela, leboa le borwa. Ditšhaba ka moka lefaseng di tla šegofatšwa ka baka la gago le bana ba gago.
15 Ke na le wena, e bile ke tla dula ke na le wena kae le kae mo o yago gona gomme ke tla go bušetša nageng ye. Nka se go tlogele e bile ke tla dira seo ke go tshepišitšego sona.”
16 Ke moka Jakobo a tsoga borokong a re: “Ka nnete Jehofa o mo lefelong le gomme nna ke be ke sa tsebe.”
17 O ile a boifa kudu gomme a re: “Ruri lefelo le le a boifiša! Ye ka nnete ke ntlo ya Modimo e bile ke keiti ya magodimo.”
18 Ke moka Jakobo a tsoga ka masa a tšea leswika leo a bego a le sametše a le hloma bjalo ka philara gomme a tšhela makhura godimo ga lona.
19 O ile a re lefelo leo ke Bethele,* eupša mathomong leina la motse woo e be e le Lutsi.
20 Ke moka Jakobo a ena a re: “Ge e ba Modimo a ka tšwela pele a na le nna gomme a ntšhireletša leetong le la ka, a nnea dijo le diaparo,
21 gomme ka boela ntlong ya tate ka khutšo, gona Jehofa o tla be a bontšhitše gore ke Modimo wa ka.
22 Leswika le leo ke le hlomilego bjalo ka philara e tla ba ntlo ya Modimo, gomme se sengwe le se sengwe seo o tlago go mpha sona ruri ke tla go nea karolo ya sona ya lesome.”
Mengwalo ya tlase
^ Leina le le ra gore, “Ntlo ya Modimo.”
