Genesi 25:1-34
25 Bjale Aborahama o ile a nyala mosadi yo mongwe, gomme leina la gagwe e be e le Ketura.
2 Ge nako e dutše e eya, mosadi yoo o ile a mmelegela bana. Bana bao e be e le Simurane, Jokoshane, Medane, Midiane, Ishibaka le Shua.
3 Jokoshane ya ba tatago Sheba le Dedane.
Barwa ba Dedane e be e le Baasishuri, Baletushi le Baleu.
4 Barwa ba Midiane e be e le Efaa, Efere, Hanoge, Abida le Elida.
Ba ka moka e be e le barwa ba Ketura.
5 Ka morago Aborahama a nea Isaka dilo ka moka tšeo a bego a na le tšona.
6 Eupša barwa ba basadi ba gagwe ba bangwe bona a ba nea dimpho. Ge Aborahama a be a sa phela, o ile a re barwa bao ba gagwe ba bangwe ba ye ka thoko ya ka Bohlabela e le gore ba be kgole le morwa wa gagwe Isaka.
7 Aborahama o phetše mengwaga e 175 (lekgolo-masomešupa-hlano).
8 Ke moka Aborahama a hlokofala a tšofetše, e le mokgalabje e bile a khoše bophelo, gomme a bolokwa le batho ba gabo.
9 Barwa ba gagwe e lego Isaka le Ishimaele ba mmolokela leweng la kua Makapela serapeng sa Efurone morwa wa Tsohara wa Mohethe, seo se lego kgauswi le Mamure,
10 e lego serapa seo Aborahama a se rekilego go Bahethe. Aborahama le mosadi wa gagwe Sara ba boloketšwe moo.
11 Ka morago ga gore Aborahama a hlokofale, Modimo o ile a tšwela pele a šegofatša Isaka morwa wa gagwe, gomme Isaka o be a dula kgauswi le Beera-lahai-roi.
12 Tše ke ditaba tša mabapi le Ishimaele morwa wa Aborahama, yoo mmagwe e lego Hagara wa Moegepeta mohlanka wa Sara.
13 Bjale maina a barwa ba Ishimaele go ya ka maina a meloko ya bona šea: Morwa wa Ishimaele wa mathomo e be e le Nebayothe, gwa latela Kedara, Adibele, Mibisame,
14 Mishima, Duma, Masa,
15 Hadada, Thema, Jeturi, Nafishi le Kedema.
16 Bona ba ke barwa ba Ishimaele le maina a bona go ya ka mafelo ao ba bego ba dula go ona, le go ya ka ditente tšeo ba bego ba dula go tšona. E be e le baetapele ba 12 go ya ka meloko ya bona.
17 Ishimaele o phetše mengwaga e 137 (lekgolo-masometharo-šupa), ke moka a hlokofala a bolokwa le batho ba gabo.
18 Barwa ba gagwe ba be ba dula go tloga Hafila go fihla Asiria. Hafila e kgauswi le Shuri, gomme Shuri e kgauswi le Egepeta. Ba ile ba dula kgauswi le bana babo bona ka moka.
19 Tše ke ditaba tša mabapi le Isaka morwa wa Aborahama.
Aborahama e bile tatago Isaka.
20 Isaka o be a na le mengwaga e 40 ge a be a nyala Rebeka. Rebeka e be e le morwedi wa Bethuele wa Moarama wa kua Padana-arama, e bile e le ngwana wa gabo Labane wa Moarama.
21 Isaka o be a dula a rapela Jehofa gore a thuše mosadi wa gagwe gore a be le bana, ka gobane o be a sa kgone go belega. Ka gona Jehofa o ile a kwa thapelo ya gagwe gomme mosadi wa gagwe Rebeka a ima.
22 Bana bao a bego a ba imile ba ile ba thoma go lwa ka popelong ya gagwe moo a ilego a re: “Ge e ba ke tlo tlaišega ka tsela ye, gona ke sa phelela’ng?” Ke moka a botšiša Jehofa gore ke ka baka la eng seo se be se direga.
23 Jehofa a re go yena: “Ka popelong ya gago go na le bašemane ba babedi, gomme ba tlo tšwa ditšhaba tše pedi. Setšhaba se sengwe se tla ba le matla go feta se sengwe, gomme mošemane yo mogolo o tla hlankela yo monyenyane.”
24 Mafelelong nako ya gore a belege e ile ya fihla, gomme a belega mafahla.
25 Wa mathomo o ile a belegwa e le yo mohwibidu mo gohle, a swana le kobo ya boya. Ka gona ba mo reela leina la Esau.*
26 Ka morago ga moo, ngwanabo le yena a belegwa gomme seatla sa gagwe se be se swere serethe sa Esau. Ke moka a reelwa leina la Jakobo. Isaka o be a na le mengwaga e 60 ge Rebeka a be a belega bana bao.
27 Ge bašemane bao ba gola, Esau o ile a ba monna yo a kgonago go tsoma e bile a phela nageng. Eupša Jakobo yena, e be e le monna yo a bego a phela a dira dilo tše di lokilego gomme a dula ditenteng.
28 Isaka o be a rata Esau ka gobane a be a tseba gore o tlo hwetša nama ya phoofolo, mola Rebeka yena a be a rata Jakobo.
29 Ka letšatši le lengwe ge Jakobo a be a apeile sopo, Esau a fihla a etšwa nageng a lapile kudu.
30 Ka gona Esau a re go Jakobo: “Hle nnee sopo yeo e khwibidu kapejana ke je, ka gobane ke lapile e bile ke a hwa ka tlala!” Ke ka baka leo a ilego a reelwa leina la Edomo.*
31 Ke moka Jakobo a re: “Thoma pele ka go nthekišetša tshwanelo ya gago ya go ba morwa wa mathomo!”
32 Esau a re: “Ka gore šefa ke a hwa ka tlala, tshwanelo ya go ba morwa wa mathomo e tla nkhola ka eng?”
33 Ke moka Jakobo a re: “Nkenele pele!” Ka gona Esau a enela Jakobo, gomme a mo rekišetša tshwanelo ya gagwe ya go ba morwa wa mathomo.
34 Jakobo a nea Esau senkgwa le sopo ya dinawa, yena a ja a ba a nwa. Ke moka a emelela a sepela. Seo Esau a se dirilego se bontšhitše gore o nyaditše tshwanelo ya gagwe ya go ba morwa wa mathomo.
