Genesi 15:1-21
15 Ka morago ga dilo tše Jehofa a bolela le Aborama ponong a re: “Aborama o se ke wa boifa. Ke tla go šireletša.* Ditšhegofatšo tša gago e tlo ba tše dintši kudu.”
2 Ke moka Aborama a re: “Mmuši Morena Jehofa, o tla ntšhegofatša ka eng ka ge e le mo ke se na ngwana e bile Eliesere wa kua Damaseko e le yena e tlago go ba mojabohwa wa dilo tša ka?”
3 Le gona Aborama a re: “Ga se wa mpha bana, e bile mohlanka wa lapeng la ka ke yena e tlago go ba mojabohwa.”
4 Ke moka Jehofa o ile a mo araba a re: “Monna yo e ka se be mojabohwa wa gago, eupša bohwa bja gago bo tla jewa ke morwa wa gago.”
5 Ke moka Modimo a botša Aborama gore a ye ka ntle gomme a re go yena: “Hle lebelela magodimong, o bale dinaledi ge e ba o ka kgona go di bala.” Ke moka a re go yena: “Le bana ba gago e tla ba ba bantši ba lekana le tšona.”
6 Aborama a ba le tumelo go Jehofa, gomme Modimo a mmona a lokile.
7 Le gona Modimo a re go yena: “Ke nna Jehofa yo a go ntšhitšego Uri ya Bakaladea gore ke go nee naga ye e be ya gago.”
8 Aborama a araba a re: “Mmuši Morena Jehofa, ke tla tseba ka’ng gore e tla ba ya ka?”
9 Modimo a re go yena: “Ntlišetše kgomo e tshadi ya mengwaga e meraro, pudi e tshadi ya mengwaga e meraro, nku e tona ya mengwaga e meraro, leeba la nageng le leebana.”
10 A tšea diphoofolo tšeo a di ntšha diripa tše pedi tše pedi, ke moka a bea diripa tšeo gore di lebane eupša dinonyana a se di ripaganye.
11 Dinonyana tše dikgolo tša go ja nama tša theogela diphoofolong tšeo di hwilego, eupša Aborama a di raka.
12 Ka moragonyana ge letšatši le be le le kgauswi le go sobela, Aborama a ya ka boroko, gomme a aparelwa ke leswiswi le legolo la go tšhoša.
13 Modimo a re go Aborama: “Tseba gore bana ba gago ba tla dula nageng yeo e sego ya gabo bona gomme batho ba moo ba tla ba dira makgoba le go ba tlaiša ka mengwaga e 400 (makgolonne).
14 Eupša setšhaba seo se tlago go ba dira makgoba ke tla se otla, ka morago ga moo bana ba gago ba tla tloga nageng yeo le dithoto tše dintši.
15 Ge e le wena o tlo hlokofala ka khutšo ka morago ga ge o phetše nako e telele, wa bolokwa le borakgolokhukhu ba gago.
16 Eupša molokong wa bone bana ba gago ba tla boa mo, ka gobane nako ya go otla Baamore ga se ya tšwa e fihla.”*
17 Ge letšatši le sobetše gomme go swiswetše kudu, gwa bonala sebešo seo se thunyago muši le serumula sa mollo gomme tša feta magareng ga diripa tšela tša diphoofolo.
18 Letšatšing lona leo Jehofa a dira kgwerano le Aborama a re: “Bana ba gago ke tla ba nea naga ye, go tloga ka noka ya Egepeta go fihla ka noka e kgolo, e lego noka ya Eforate.
19 Ke tla ba nea naga ya Bakeni, Bakenitsi, Bakadamoni,
20 Bahethe, Baperetse, Barefai,
21 Baamore, Bakanana, Bagirigashe le Bajebusi.”
Mengwalo ya tlase
^ Phetolelo ya lentšu ka lentšu e re, “Ke nna kotse ya gago.”
^ Goba “molato wa Baamore ga se wa tšwa o felela.”
