Esitere 4:1-17
4 Ge Morodekai a ekwa ka dilo ka moka tšeo di diragetšego, o ile a kgeila diaparo tša gagwe a apara diaparo tša go dirwa ka masaka a ba a itšhela ka melora. Ke moka a ya gare ga motse a lla gabohloko.
2 O ile a lla go fihlela a fihla keiting ya ka mošate, eupša a se tsene ka gobane go be go se na motho yo a dumeletšwego go tsena ka keiti ya ka mošate a apere diaparo tša go dirwa ka masaka.
3 Diprofenseng ka moka moo batho ba ilego ba kwa seo kgoši e se boletšego le taelo ya yona, Bajuda ba be ba nyamile kudu, ba itima dijo ebile ba lla gabohloko. Ba bantši ba ile ba robala godimo ga diaparo tšeo di dirilwego ka masaka le meloreng.
4 Ge bahlanka ba Kgošigadi Esitere ba banna* le ba basadi ba mmotša ka taba yeo, o ile a kwa bohloko kudu. Ke moka o ile a romela Morodekai diaparo gore a di apare a apole diaparo tšeo di dirilwego ka masaka, eupša yena a di gana.
5 Ka gona Esitere o ile a bitša Hathaka, e lego yo mongwe wa bahlanka ba kgoši, yoo kgoši e bego e mmeile gore a mo hlokomele. Esitere o ile a laela Hathaka gore a ye a botšiše Morodekai gore go direga eng.
6 Ka gona Hathaka o ile a ya go Morodekai mmarakeng wa motse wo o lego ka pele ga keiti ya ka mošate.
7 Ke moka Morodekai a mmotša dilo ka moka tšeo di mo diragaletšego, a mmotša le ka tšhelete yeo Hamani a tshepišitšego gore o tlo e patela e le gore e tsenywe mo go bolokelwago dilo tše bohlokwa tša kgoši gore Bajuda ba tle ba bolawe.
8 O ile a mo nea le kopi ya lengwalo la taelo yeo e bego e dirilwe kua Shushani ya gore ba fedišwe. Hathaka o be a swanetše go bontšha Esitere lengwalo leo, a be a mo hlalosetše seo se diregago ebile a mo laele gore a ye go kgoši a yo kgopela gore e šokele setšhaba sa gabo.
9 Hathaka o ile a boa gomme a botša Esitere seo Morodekai a se boletšego.
10 Ke moka Esitere a botša Hathaka a re a botše Morodekai gore:
11 “Bahlanka ba kgoši ka moka le setšhaba seo se lego diprofenseng tša kgoši ba a tseba gore ge e ba monna goba mosadi le ge e le ofe a eya go kgoši, gomme a tsena lapeng la ka gare a se a bitšwa, go na le molao o tee feela wo o swanetšego go latelwa, ke wa gore motho yoo o swanetše go bolawa. Ke feela ge kgoši e ka mo šupa ka molamo wa gauta moo a ka se kego a bolawa. Ge e le nna, gona bjale ke šetše ke na le matšatši a 30 kgoši e sa mpitše.”
12 Ka morago ga gore Morodekai a botšwe seo Esitere a se boletšego,
13 o ile a re Esitere a botšwe gore: “O se ke wa nagana gore ka gobane wena o ka bogošing, o ka se bolawe le Bajuda ba bangwe ka moka.
14 Ka gobane ge e ba o ka homola mo nakong ye, gona Modimo o tla thuša Bajuda le go ba phološa a diriša tsela e nngwe, eupša ge e le wena le batho ba geno le tla fedišwa. Le gona go tseba mang gore o bile kgošigadi ka lona lebaka le?”
15 Ka gona Esitere a re Morodekai a botšwe gore:
16 “Eya o kgoboketše Bajuda ka moka bao ba lego Shushani gomme le ikone dijo ka baka la ka, le fetše matšatši a mararo le sa je ebile le sa nwe selo bošego le mosegare. Nna le bahlanka ba ka ba basadi le rena re tla ikona dijo. Ka morago ga moo ke tla ya go kgoši, le ge e le gore seo se thulana le molao, gomme ge e ba ke swanetše go hwa, ke tla no hwa.”
17 Ka gona Morodekai a sepela a yo dira dilo ka moka tšeo Esitere a mo laetšego tšona.
Mengwalo ya tlase
^ Phetolelo ya lentšu ka lentšu e re, “baopafatšwa.” Bona Tlhaloso ya Mantšu.
