Doiteronomio 27:1-26
27 Moshe le banna ba bagolo ba Baisiraele ba ema pele ga setšhaba. Ke moka Moshe a re: “Le latele taelo e nngwe le e nngwe yeo ke le neago yona lehono.
2 Letšatšing la ge le tshela Noka ya Jorodane le tshelela nageng yeo Jehofa Modimo wa lena a le neago yona, le ipeeleng maswika a magolo gomme le a poleistere.*
3 Mo godimo ga ona le ngwale mantšu ka moka a Molao wo, e le gore le tsene nageng yeo Jehofa Modimo wa lena a le neago yona, e lego naga yeo e elago maswi le todi ya dinose, feela bjalo ka ge Jehofa Modimo wa borakgolokhukhu ba lena a le tshepišitše.
4 Ge le šetše le tshetše Noka ya Jorodane, le beeng maswika ao Thabeng ya Ebala gomme le a poleistere, feela bjalo ka ge ke le laela lehono.
5 Gona moo le agele Jehofa Modimo wa lena aletare ya maswika. Le se ke la diriša dilo tša tšhipi go betla maswika ao.
6 Le age aletare ya Jehofa Modimo wa lena ka maswika ao a sego a betlwa gomme le direle Jehofa Modimo wa lena dibego tša go fišwa godimo ga yona.
7 Le direng dihlabelo tša go dira khutšo le Modimo le di jeleng moo, gomme le thabeng pele ga Jehofa Modimo wa lena.
8 Godimo ga maswika ao le ngwale gabotse mantšu ka moka a molao wo.”
9 Ke moka Moshe le baperisita bao e lego Balefi, ba bolela le Baisiraele ka moka ba re: “Theetšang lena Baisiraele. Lehono le fetogile setšhaba sa Jehofa Modimo wa lena.
10 Le theetše Jehofa Modimo wa lena gomme le latele ditaelo tša gagwe le melao ya gagwe yeo ke le neago yona lehono.”
11 Letšatšing leo Moshe a botša setšhaba a re:
12 “Bao ba tlago go ema ba šegofatša setšhaba Thabeng ya Geritsima ge le šetše le tshetše Noka ya Jorodane ke moloko wa Simeone, wa Lefi, wa Juda, wa Isakara, wa Josefa le wa Benjamini.
13 Bao ba tlago go ema Thabeng ya Ebala gomme ba rogaka setšhaba ke moloko wa Rubeni, wa Gada, wa Ashere, wa Sebulone, wa Dani le wa Nafutali.
14 Ke moka Balefi ba tla bolela le setšhaba ka moka sa Baisiraele ka lentšu la go hlaboša ba re:
15 “‘Go rogakwe motho yo a dirago seswantšho se se betlilwego goba modimo wa seswantšho ke moka a se rapela ka sephiring, e lego selo se se dirilwego ke mmetli seo se šišimišago Jehofa.’ (Setšhaba ka moka se re: ‘Amene!’)
16 “‘Motho yo a nyatšago tatagwe goba mmagwe a rogakwe.’ (Setšhaba ka moka se re: ‘Amene!’)
17 “‘Motho yo a ka oketšago goba a fokotša moo naga ya moagišane wa gagwe e felelago gona, a rogakwe.’ (Setšhaba ka moka se re: ‘Amene!’)
18 “‘Motho yo a ka dirago gore sefofu se sepele tseleng yeo e sego yona, a rogakwe.’ (Setšhaba ka moka se re: ‘Amene!’)
19 “‘Motho yo a ka ahlolago motho yo e sego Moisiraele, tšhiwana goba mohlologadi ka go hloka toka, a rogakwe.’ (Setšhaba ka moka se re: ‘Amene!’)
20 “‘Motho yo a robalago le mosadi wa tatagwe o dira gore tatagwe a nyatšege, ka gona motho yoo a rogakwe.’ (Setšhaba ka moka se re: ‘Amene!’)
21 “‘Motho yo a robalago le phoofolo le ge e le efe a rogakwe.’ (Setšhaba ka moka se re: ‘Amene!’)
22 “‘Motho yo a robalago le sesi wa gagwe goba moratho wa gagwe, e lego morwedi wa tatagwe goba morwedi wa mmagwe, a rogakwe.’ (Setšhaba ka moka se re: ‘Amene!’)
23 “‘Motho yo a robalago le mmatswalagwe a rogakwe.’ (Setšhaba ka moka se re: ‘Amene!’)
24 “‘Motho yo a itiago yo mongwe a mmolaya a sa bonwe ke motho, a rogakwe.’ (Setšhaba ka moka se re: ‘Amene!’)
25 “‘Motho yo a amogelago pipamolomo gore a bolaye motho yo a se nago molato, a rogakwe.’ (Setšhaba ka moka se re: ‘Amene!’)
26 “‘Motho yo a sa latelego Molao wo a rogakwe.’ (Setšhaba ka moka se re: ‘Amene!’)
Mengwalo ya tlase
^ Goba, “le a tlotše ka motaga.”
