Doiteronomio 1:1-46
1 Moshe o ile a bolela le Baisiraele ka moka tikologong ya Noka ya Jorodane kua lešokeng, e lego leganateng ka pele ga Sufa magareng ga Parane le Thofele le Labane le Hatserothe gotee le Ditsahaba.
2 Ge motho a tloga Horebe a eya Kadeshe-baranea go be go tla mo tšea matšatši a 11 ge a sepela ka tsela ya Thaba ya Seire.
3 Ka letšatši la pele, kgweding ya bo-11, ngwageng wa bo-40, Moshe o ile a botša Baisiraele dilo ka moka tšeo Jehofa a bego a mo laetše gore a ba botše tšona.
4 E be e le ka morago ga gore Moshe a fenye Sihoni kgoši ya Baamore yo a bego a dula Heshibone le Ogo kgoši ya Bashani yo a bego a dula Ashitherothe kua Edirei.
5 Moshe o ile a hlalosa Molao wo kua tikologong ya Noka ya Jorodane nageng ya Moaba. O ile a re:
6 “Jehofa Modimo wa rena o ile a bolela le rena kua Horebe a re: ‘Ke kgale le dutše lefelong le leo le nago le dithaba.
7 Tlogang le yeng dithabeng tša Baamore le mafelong ka moka a kgauswi le tšona, e lego Araba, tikologong ya dithabeng, Shefela, Negebe le lebopong la lewatle. Eyang nageng ya Bakanana, sepelang le be le fihle Libanoni le nokeng e kgolo, e lego Noka ya Eforate.
8 Ke le neile naga ye. Tsenang le yo e tšea gore e be ya lena, e lego naga yeo Jehofa a tshepišitšego go e nea botatago lena e lego Aborahama, Isaka, Jakobo le ditlogolwana tša bona ka moka.’
9 “Ka nako yeo ke ile ka re go lena: ‘Ga ke kgone go le etelela pele ke nnoši.
10 Jehofa Modimo wa lena o le dirile ba bantšhi, bjale ke mo lehono le ba bantšhi go swana le dinaledi tša magodimong.
11 Anke Jehofa Modimo wa borakgolokhukhu ba lena a le oketše le be ba bantšhintšhi, le gona anke a le šegofatše go etša ge a tshepišitše.
12 Nka rwala bjang mathata a lena le dingongorego tša lena ke nnoši?
13 Kgethang banna ba bohlale bao ba nago le temogo le kwešišo mo melokong ya lena gore ba le etelele pele.’
14 Lena le ile la nkaraba la re: ‘Seo o re boditšego sona gore re se dire, ke se sebotse.’
15 Ka gona ke ile ka tšea baetapele mo melokong ya lena, e lego banna ba bohlale le bao ba nago le kwešišo, ka ba bea gore e be baetapele ba lena, ya ba balaodi ba batho ba dikete, balaodi ba batho ba makgolo, balaodi ba batho ba masomehlano, balaodi ba batho ba lesome le balaodi ba meloko ya lena.
16 “Ka nako yeo ke ile ka nea baahlodi ba lena ditaelo tše: ‘Ge go na le batho bao ba nago le mathata mo gare ga lena le ba ahlole ka toka, go sa šetšwe gore batho bao le ba ahlolago ke Baisiraele, goba ke Moisiraele le motho yo e sego Moisiraele yo a dulago le lena.
17 Le se ke la kgetholla batho ge le ahlola. Le ahlole modiidi go swana le mohumi. Le se ke la tšhošwa ke batho, ka gobane Modimo ke yena a ahlolago. Le gona, ge e ba go na le molato woo le palelwago ke go o ahlola, le o tliše go nna gomme nna ke tla o ahlola.’
18 Ka nako yeo ke ile ka le botša dilo ka moka tšeo le swanetšego go di dira.
19 “Ke moka ra tloga Horebe ra sepela lešokeng leo ka moka le legolo le leo le boifišago, leo le le bonego tseleng ya dithaba, tikologong ya Baamore, feela bjalo ka ge Jehofa Modimo wa rena a be a re laetše, gomme mafelelong ra fihla Kadeshe-baranea.
20 Ka gona ka re go lena: ‘Le fihlile tikologong ya dithaba ya Baamore, yeo Jehofa Modimo wa rena a re neago yona.
21 Tsebang gore Jehofa Modimo wa lena o le neile naga yeo. Sepelang le yo e tšea e be ya lena, feela bjalo ka ge Jehofa Modimo wa borakgolokhukhu ba lena a le boditše. Le se ke la boifa goba la tšhoga.’
22 “Eupša ka moka ga lena le ile la tla go nna gomme la re: ‘A re romeleng banna ba re ete pele gore ba yo hlola naga, gomme ba tle ba re botše gore re sepele ka tsela efe le gore ke metse ya mohuta mang yeo re tlago go ya go yona.’
23 Ke ile ka bona kgopolo yeo e le e botse, ka gona ka kgetha banna ba 12 mo go lena, ka kgetha o tee molokong o mongwe le o mongwe.
24 Ke moka ba tloga ba rotogela dithabeng ba fihla Moeding wa Eshikolo, gomme ba hlola naga.
25 Ba ile ba tšea tše dingwe tša dienywa tša naga yeo ba tla le tšona, gomme ba re botša ba re: ‘Naga yeo Jehofa Modimo wa rena a re neago yona ke e botse.’
26 Eupša le ile la gana go ya nageng yeo, gomme la se kwe taelo ya Jehofa Modimo wa lena.
27 Le ile la dulela go ngongorega ditenteng tša lena, la re: ‘Jehofa o re hloile, ke ka baka leo a re ntšhitšego nageng ya Egepeta gore a dumelele Baamore gore ba re fediše.
28 Re ya lefelong la mohuta mang? Banababo rena ba ile ba dira gore re boife kudu ka go re botša gore: “Batho ba moo ba na le matla e bile ke ba batelele go re feta, le gona metse ya bona ke e megolo e bile e šireleditšwe go fihla magodimong. Le gona re ile ra bona le Baanaki moo.”’
29 “Ka gona ke ile ka re go lena: ‘Le se ke la tšhoga goba la ba boifa.
30 Jehofa Modimo wa lena o tla le eta pele e bile o tla le lwela, feela bjalo ka ge a ile a le lwela kua Egepeta pele ga mahlo a lena.
31 Le gona le bone kamoo Jehofa Modimo wa lena a ilego a le hlokomela ka gona kua lešokeng, go swana le ge monna a hlokomela morwa wa gagwe. O ile a le hlokomela kae le kae moo le ilego la ya gona go ba go fihla lefelong le.’
32 Eupša go sa šetšwe dilo tše ka moka, ga se la ka la ba le tumelo go Jehofa Modimo wa lena,
33 yena yo a bego a le etile pele tseleng go yo le hlolela lefelo leo le tlago go hloma ditente go lona. O be a le etile pele ka mollo bošego, gomme mosegare a le etile pele ka leru gore a le bontšhe tsela yeo le swanetšego go sepela go yona.
34 “Nakong yeo ka moka Jehofa o ile a kwa dingongorego tša lena. Ka gona o ile a galefa gomme a ena a re:
35 ‘Ga go le o tee wa batho ba ba babe yo a tlago go bona naga e botse yeo ke ennego gore ke tla e nea botatago lena,
36 ka ntle le Kalebe morwa wa Jefune. Yena o tla e bona, gomme ke tla nea yena le barwa ba gagwe naga yeo a sepetšego go yona, ka gobane o latetše Jehofa ka pelo ya gagwe ka moka.
37 (Le nna Jehofa o ile a nkgalefela ka baka la lena gomme a re: ‘Le wena o ka se tsene nageng yeo.
38 Joshua morwa wa Nuni, yena mohlanka wa gago,* ke yena a tlago go tsena nageng yeo.’ Mo matlafatše, ka gobane o tla dira gore Baisiraele ba hwetše naga yeo e le bohwa.)
39 Modimo o ile a re go lena: “Le gona bana ba lena bao le boletšego ka bona la re ba tla thopša, gotee le barwa ba lena bao lehono ba sa tsebego seo se lokilego le se sebe, bona ba tla tsena nageng yeo gomme ke tla ba nea yona ya ba ya bona.
40 Eupša ge e le lena, boelang morago le ye lešokeng ka tsela ya Lewatle le Lehwibidu.”’
41 “Ka gona lena la re go nna: ‘Re diretše Jehofa sebe. Bjale rena re tla ya go lwa, feela bjalo ka ge Jehofa Modimo wa rena a re laetše!’ Ka gona yo mongwe le yo mongwe wa lena a tšea dibetša tša gagwe tša ntwa e le ge le nagana gore go tla ba bonolo go ya dithabeng.
42 Eupša Jehofa a re go nna: ‘Ba botše o re: “Le se ke la yo lwa ka gobane nka se be le lena. Ge le ka ya manaba a lena a tlo le fenya.”’
43 Ka gona ke ile ka bolela le lena eupša la se ntheetše. Go e na le moo le ile la se kwe taelo ya Jehofa, gomme la ba le manganga la leka le go ya thabeng.
44 Ke moka Baamore bao ba bego ba dula thabeng yeo ba tla ba le gahlanetša ba le hlasela go swana le dinose, gomme ba le phatlalatša Seire go fihla ka Horoma.
45 Ka morago ga moo le ile la boa la lla pele ga Jehofa, eupša Jehofa a se le theetše.
46 Ke ka baka leo le ilego la no tšwela pele le dula Kadeshe ka nako e telele.
Mengwalo ya tlase
^ Phetolelo ya lentšu ka lentšu e re, “yo a emego mo pele ga gago.”
