Psalme 80:1-19
Ditaelo tšeo di yago go mohlahli: Diriša modumo wa koša yeo e rego: “Dilili.” Koša ya Asafa yeo batho ba swanetšego go e gopola.
80 Wena Modiši wa Isiraele, hle theetša,Wena yoo o hlahlago Josefa bjalo ka mohlape.
Wena yoo o dutšego sedulong sa bogoši godimo* ga bakerubi,Phadimiša seetša sa gago.
2 Bontšha matla a gagoPele ga Efuraime, Benjamini le Manase,Gomme o tle o re phološe.
3 Re kgopela o re amogele gape hle Modimo.Re kwele bohloko gomme o re phološe.
4 Wena Jehofa Modimo wa madira, o tla galefela batho ba gago gomme wa se theetše thapelo ya bona go fihla neng?
5 O ba dirile gore ba je megokgo ya bona tše e kego ba ja dijo,Gomme wa ba dira gore ba nwe megokgo e mentšhi tše e kego ba nwa meetse.
6 O dumeletše gore baagišane ba rena ba lwe ka baka la rena,Gomme manaba a rena a re kwera ka mokgwa wo a ratago ka gona.
7 Wena Modimo wa madira, re kgopela o re amogele gape.Re kwele bohloko gomme o re phološe.
8 O ntšhitše batho ba gago Egepeta bjalo ka ge eka o tumola moterebe.
Wa raka ditšhaba nageng ya tšona gomme wa bjala moterebe woo.
9 O o lokišeleditše lefelo leo o tlago go o bjala go lona,Ke moka wa tsema medu gomme wa tlala naga.
10 Dithaba di be di apešitšwe ke moriti wa wona,Gomme mehlare ya metsedara ya Modimo, e be e apešitšwe ke makala a wona.
11 Makala a wona a be a fihla lewatleng,Gomme makalana a wona a fihla Nokeng.*
12 Go re’ng o phušotše leboto leo le dikologilego serapa sa meterebe,E le gore batho ka moka bao ba fetago moo ba fule dienywa tša wona?
13 Dikolobe tša naga di a o senya,Le diphoofolo tša naga di iphepa ka wona.
14 Wena Modimo wa madira, re kgopela o re amogele gape hle.
Lebelela fase o le legodimong gomme o bone seo se diregago!
Hle hlokomela moterebe wo,
15 Wona mohlare woo o o bjetšego ka seatla sa gago sa le letona,Gomme o lebelele mohlašana woo o o tiišitšego gore wena Modimo o hlomphiwe.
16 Moterebe o remilwe gomme wa tšhungwa ka mollo.
Batho ba fedišitšwe ka ge o be o galefile.
17 Anke seatla sa gago se thekge monna yoo a lego ka letsogong la gago le letona,Le morwa wa motho yoo o mo matlafaleditšego gore wena Modimo o hlomphiwe,
18 Ke moka re ka se go hlanogele.
Re phediše e le gore re rete leina la gago.
19 Wena Jehofa Modimo wa madira, re kgopela o re amogele gape.Re kwele bohloko gomme o re phološe.
