Psalme 74:1-23
Maskile.* Koša ya Asafa.
74 Wena Modimo, o re’ng o re lahletše sa ruri?
Go re’ng o galefela mohlape wo o bego o o diša?*
2 Gopola batho ba gago bao o ikgethetšego bona kgale,Batho bao o ba lopolotšego gore e be bohwa bja gago,
Gopola Thaba ya Tsione yeo o dulago go yona.
3 Eya lefelong leo le senyeditšwego sa ruri.
Lenaba le sentše dilo ka moka lefelong la gago le lekgethwa.
4 Batho bao ba go hloilego ba hlabile lešata lefelong leo o rapelwago go lona.
Ba itlhometše maswao a phenyo gona moo.
5 Ba swana le banna bao ba emišitšego dilepe tša bona gore ba reme dihlašana.
6 Ba pšhatlile dilo tšeo di bego di kgabišitše tempele ya gago ka dilepe le didirišwa tše dingwe tša tšhipi.
7 Ba fišitše tempele ya gago ka mollo.
Ba goboša ntlo yeo e nago le leina la gago ka go e wišetša fase.
8 Bona le bana ba bona ba ile ba kwana gomme ba re:
“Re tla tšhuma mafelo ka moka a Modimo ao go rapelwago go ona.”*
9 Maswao ka moka a tlošitšwe.Ga go sa na moporofeta le o tee,Le gona ga go na yoo a tsebago gore go tla ba ka mokgwa woo go fihlela neng.
10 Wena Modimo, lenaba le tla dulela go go kwera go fihlela neng?
Na le tla nyatša leina la gago go ya go ile?
11 Ke ka baka la’ng o gomiša seatla sa gago sa le letona?
Se tloše sehubeng sa gago gomme o ba fediše.
12 Modimo ke Kgoši ya ka go tloga kgalekgale,Yena yoo a phološago bahlanka ba gagwe lefaseng ka moka.
13 O huduile lewatle ka matla a gago.O pšhatlaganyeditše dihlogo tša diphedi tšeo di tšhošago ka lewatleng.
14 O rathagantše hlogo* ya Lebiathane.*Wa e fa batho bao ba dulago maganateng gore e be dijo tša bona.
15 O butše meedi gomme meetse a elela bjalo ka a ka nokaneng,Wa gopiša dinoka tšeo di dulago di elela.
16 Ke wena o dirilego gore go be le bošego le mosegare,
O dirile seetša le letšatši.
17 O dirile mellwane ka moka ya lefase,Wa ba wa dira gore go be le selemo le marega.
18 Wena Jehofa, gopola gore lenaba le a go kweraLe gore batho ba ditlaela ba nyatša leina la gago.
19 Re swana le maeba a nageng, hle o se ke wa re tlogela ka diatleng tša manaba a rena ka gobane a swana le dibata
O se ke wa lebalela sa ruri batho ba gago bao ba gateletšegilego.
20 Gopola kgwerano yeo o e dirilego le rena,Ka gobane mafelo a leswiswi a mo lefaseng a fetogile madulo a batho ba šoro.
21 Anke yo a nyamilego kudu a se ke a gomela morago a swabile.Anke motho wa maemo a tlase le modiidi ba tumiše leina la gago.
22 Emelela hle Modimo, gomme o kgonthišetše gore go ba le toka.
Gopola kamoo batho ba ditlaela ba go kwerago letšatši ka moka.
23 O se ke wa lebala dilo tšeo manaba a gago a di bolelago.
Lešata la bao ba sa go kwego le tšwela pele le golela godimo.
Mengwalo ya tlase
^ Bona Tlhaloso ya Mantšu.
^ Phetolelo ya lentšu ka lentšu e re, “mohlape wa mafulo a gago.”
^ Goba, “mafelo ka moka ao Modimo a rapelwago go ona.”
^ Phetolelo ya lentšu ka lentšu e re, “dihlogo.”
^ Bona Tlhaloso ya Mantšu.
