Diema 24:1-34
24 O se ke wa jela batho ba babe mona,Le gona o se ke wa duma go tlwaelana le bona,
2 Ka gobane ba dula ba naganne ka go dira bošoro,E bile ba dula ba bolela ka go dira dilo tše mpe.
3 Ntlo e agwa ka bohlale,E bile moagi o diriša temogo go tiiša ntlo yeo.
4 Tsebo e thuša gore diphapoši tša ntlo yeoDi tlale ka dilo tše dintšhi tše bohlokwa le tšeo di kgahlišago.
5 Monna yo bohlale o na le matla,Le gona tsebo e thuša motho go oketša matla a gagwe.
6 O tla lwa ntwa ya gago o hlahlwa ke motho yo bohlale,Le gona o tla kgona go fenya ntwa ge e ba o na le baeletši ba bantšhi.
7 Lešilo le ka se kgone go hwetša bohlalehlale,Le gona le ka se bolele selo keiting ya motse.*
8 Motho yo a logago maano a mabe,O tla bitšwa mologi yo mogolo wa maanomabe.
9 Maano a motho wa setlaela a feleletša ka sebe,Gomme batho ba hloile motho yo a ratago go kwera.
10 Ge o ka nyama letšatšing leo o tlaletšwego,Gona matla a gago a tla fokotšega.
11 Phološa bao ba išwago lehung,Gomme o thuše bao ba lego kotsing ya go bolawa.
12 Eupša ge e ba o ka re: “Rena re be re sa tsebe,”
Na Modimo yo a hlahlobago dipelo a ka se tsebe seo le se naganago?
Modimo yo a le hlokomelago o tla tseba seo le se naganago.E bile o tla ahlola motho yo mongwe le yo mongwe go ya ka seo a se dirilego.
13 Morwa wa ka, eja todi ya dinose ka gobane e bose.Todi yeo e elelago mamapong e bose.
14 Ka tsela e swanago, bohlale le bjona bo a go hola.
Ge o ka bo hwetša, o tla ba le bokamoso bjo bobotse,E bile o ka se felelwe ke kholofelo.
15 O se ke wa swana le motho yo mobe gomme wa lalela moloki kgauswi le moo a dulago gona.O se ke wa senya lefelo leo a dulago go lona.
16 Moloki le ge a ka wa gašupa, o tla tsoga gape.Eupša motho yo mobe o tla wela sa ruri.
17 Ge lenaba la gago le e wa, o se ke wa thaba,Le gona, o se ke wa thaba ge le kgopša,
18 Ka gobane Jehofa o tla bona seo gomme a se thabe,E bile o tla tlogela go galefela lenaba la gago.
19 O se ke wa kwatišwa ke batho ba babe.Le gona o se ke wa ba jela mona
20 Ka gobane batho ba babe ga ba na kholofelo.Le gona lebone la bona le tla tingwa.
21 Morwa wa ka, boifa Jehofa le kgoši.
O se ke wa gwerana le batho bao ba sa nyakego go fetoga.
22 Ka gobane ba tla welwa ke masetlapelo kapelapela.
Ke mang yo a tsebago gore bobedi bja bona* ba tla fediša manaba ao bjang?
23 Mantšu ao a tšwago go batho ba bohlale šea:
Ge motho a ahlola, ga se a swanela go bontšha kgethollo.
24 Yo a botšago motho yo mobe a re: “Wena o lokile,”
O tla rogwa ke batho gomme a nyatšwa ke ditšhaba.
25 Eupša bao ba mo kgalemelago,Dilo di tla ba sepelela gabotse gomme ba tla šegofatšwa ka dilo tše dibotse.
26 Batho ba tla khisa molomo wa motho yo a bolelago gabotse.*
27 Thoma ka go dira mediro ya gago, gomme o beakanye dilo ka moka tšeo o tlago go di hloka mašemong.Ke moka o age ntlo ya gago.
28 O se ke wa fa bohlatse bja go ganetša ngwaneno o se na mabaka a kwagalago,
O se ke wa bolela maaka.
29 O se ke wa re: “Ke tla mo dira seo a ntirilego sona.Ke tla itefeletša go seo a se dirilego.”
30 Ke fetile mašemong a sebodu,Serapeng sa diterebe sa monna wa lešilo.
31 Ka bona go metše bjang,Go tletše le meetlwa,Gomme leboto la ona leo le dirilwego ka maswika, le wele.
32 Ke ile ka lemoga seo gomme ka naganišiša ka sona.Ka se bona gomme ka ithuta thuto ye:
33 Ge o duletše gore: “Ke sa phutha diatla ganyenyane gore ke khutše,Ke sa otsela, ke sa robala ganyenyane,”
34 Gona o tla hlaselwa ke bodiidi bjalo ka ge eka o hlaselwa ke lehodu,Gomme o tla hloka dilo go swana le lehodu leo le itlhamilego.
Mengwalo ya tlase
^ Le ke lefelo leo banna ba bagolo ba motse ba bego ba kgobokana go lona.
^ Ke gore, Jehofa le kgoši.
^ Goba mohlomongwe, “Go araba karabo e nepagetšego go swana le go khisa motho.”
